Duisende baat by voedselhulp

Henriette Lamprecht - Byna 80 000 mense (18 974 huishoudings) trek sedert Julie verlede jaar voordeel uit die verspreiding van droëvoedselitems in sewe Khomas-kiesafdelings. Die begunstigde kiesafdelings sluit Tobias Hainyeko, Moses Garoeb, Samora Machel, John Pandeni, Katutura-Oos, Katutura-Sentraal en Khomasdal in. Die ministerie is besig met ’n volledige evualering van die loodsprojek met die doel om die rigting vir voedselverspreiding in al 14 streke van die land aan te dui. ’n Totaal van N$3,23 miljard, 98,7% van die ministerie se begroting, sal gebruik word vir maatskaplike hulp, voedselvoorsiening en die implementering van spesiale programme. “Honger is die laagste vorm van armoede en die ministerie sal voortgesette programme in noue samewerking met relevante rolspelers implementeer om te verseker dat geen Namibiër honger gaan slaap nie.” Volgens die minister van armoede-uitwissing en maatskaplike welsyn is ’n model van ’n maatskaplike straatkomitee uit Kuba vir die voedselbank aanvaar. Eerwaarde emeritus Zephania Kameeta sê hoofsaaklik werklose jeugdiges word gebruik vir die identifisering van begunstigdes en die gevolglike verspreiding van voedsel. Die voedselbank word huidig deur 305 straatkomiteelede ondersteun.Skenkings “Die doel is om die jeug binne hul eie gemeenskappe te bemagtig en nie net met verspreiding te help nie, maar ook by bykomende maatskaplike ontwikkelingsprogramme binne hul gemeenskappe te betrek.” Volgens hom is daar ook van die komiteelede wat by verskillende opleidingsinstellings ingeskryf het om hul kwalifikasies te verbeter. Tot op hede het die ministerie voedselitems ter waarde van N$9,5 miljoen vir die voedselbank ontvang. “Die oproep van president Hage Geingob twee jaar gelede vir ’n oorlog teen armoede en ongelykheid het baie in die hart getref en ’n gees van deel in Namibië geskep.” ’n Totaal van N$2,1 miljoen is ook in kontantskenkings ontvang. Hy het ’n inwoner van die Kunenestreek uitgesonder wat maandeliks N$500 tot dié rekening bydra. Die rekening word in ooreenstemming met die Wet op Staatfinansies en Tesourie-instruksies bestuur. Geld in die rekening sal gebruik word vir die implementering van spesiale programme vir gemeenskapsontwikkeling. Dit sluit die konstruksie van ’n skuiling, geldelike hulp vir begrafnisse en ander noodgevalle vir mense in uiterste armoede, sanitasie en watervoorversiening vir arm en geraakte gemeenskappe, sowel as geldelike hulp vir die verskaffing van klere en komberse vir arm en weerlose mense en kinders in. Twee boorgate is ook in die Oshikotostreek met behulp van die skenkingsrekening gesink. Sowat 204 025 bejaardes en gestremdes in Namibië het tot Maart vanjaar by maatskaplike toelaes gebaat. Hiervan was 164 832 bejaardes en 39 193 mense met gestremdhede. Kameeta het voorts gewys op ’n algehele verbetering in die totale dekking van maatskaplike toelaes aan begunstigdes, met die dekking van toelaes aan bejaardes wat tot 99,7% gestyg het. Die dekking van toelaes vir gestremdes het tot 71% gestyg. Kameeta was aan die woord tydens die motivering van sy ministerie se begroting van N$3,27 miljard. Volgens Kameeta is die nasionale bloudruk vir verspreiding van rykdom en uitwissing van armoede ook gefinaliseer. Die bloudruk dien as beleidsraamwerk vir aktiwiteite van die ministerie. “Die bloudruk bevat die menings en voorstelle van die Namibiese nasie wat tydens die nasionale dialoog op rykdomverspreiding en armoede-uitwissing versamel is.”Ingrypings Die voorstelle en menings is in ses belangrike strategiese ingrypings saamgevat. Dit is die versterking van maatskaplike beskermingstelsels; die beëindiging van hongersnood en armoede; verbeterde toegang tot basiese maatskaplike dienste; onderwys, opleiding en ontwikkeling van vaardighede; werkskepping en inklusiewe groei en geslagsgelykheid en vrouebemagtiging. Volgens Kameeta het die ministerie ’n implementeringsplan vir die bloudruk met die direkte betrokkenheid van tegniese personeel van verwante regeringskantore, ministeries en agentskappe opgestel wat onder meer aan kerke en die private sektor vir voorstelle en insette voorgelê is. Die vyfjaar bloudruk-implementeringsplan gaan in die huidige boekjaar geïmplementeer word.Volgens Kameeta is ’n aksieplan vir die ontwikkeling van ’n raamwerk vir ’n maatskaplike beskermingsbeleid opgestel. Uitreikingsprogramme na verafgeleë gebiede sal opgeskerp word om te verseker dat geraakte mense die nodige nasionale dokumente vir registrasie van toelaes bekom.

Duisende baat by voedselhulp

Kommentaar

Republikein 2025-04-09

Meld asseblief aan om kommentaar te lewer

Duisende baat by voedselhulp

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie