'Ek het jou doodsbevel geteken' - regter

Hy was in ’n stadium ’n wêreldbekende sportdokter wat Amerika se beste gimnaste behandel het, maar nou sal Larry Nassar (54) die res van sy lewe in die tronk wees.
CNN berig Larry Nassar, voormalige dokter van die Amerikaanse gimnastiekspan en Michigan State University, gaan tussen 40 en 175 jaar agter tralies sit, nadat 150 vroue en meisies getuig het hoe hy hulle oor twee dekades seksueel aangerand het.

“Ek dink nie jy verstaan dat jy ’n gevaar is en ’n gevaar sal bly nie,” het regter Rosemarie Aquilina Woensdag in die hof in Lansing, Michigan, gesê.

Nassar het skuld beken op sewe aanklagte van seksuele oortredings in die Ingham-distrik in Michigan, berig CNN. Hy het ook erken hy het sy pos misbruik om vroue aan te rand en te molesteer onder die vaandel van mediese behandeling.

Nassar is toegelaat om sy slagoffers in die hof aan te spreek.

“Wat ek voel, is nie naastenby so erg soos jul pyn, trauma en emosionele verwoesting nie,” het hy volgens ITV News gesê.

“Daar is geen woorde om te beskryf hoe jammer ek is oor wat gebeur het nie. ’n Aanvaarbare verskoning aan julle almal is onmoontlik om te skryf of oor te dra.

“Ek sal jul woorde vir die res van my lewe saamdra.”

Verlede week het Simone Biles, wat ’n goue medalje by 2016 se Olimpiese Spele in Rio gewen het, gesê sy is deur Nassar aangerand. Jordyn Wieber, wat deel was van die 2012-span, het ook by vonnisoplegging getuig, berig ITV News.

Voordat Aquilina haar vonnisoplegging gelewer het, het sy ’n brief hardop in die hof gelees wat onlangs deur Nassar geskryf is, berig CNN. In hierdie brief het hy sy mediese behandeling geregverdig en dat hy “gemanipuleer” is om skuld te erken en het aangevoer die slagoffers lieg.

“Ek was ’n goeie dokter omdat my behandeling gewerk het. Die slagoffers wat nou getuig, was juis dié wat my werk geloof het en keer op keer teruggekom het,” lui die brief.

Nassar het verder geskryf die media het die slagoffers oorreed om teen hom te getuig.

“Hulle voel ek het die vertrouensverhouding gebreek. Hell hath no fury like a woman scorned.”

Aquilina het, nadat sy die brief klaar gelees het, gesê dat sy voel Nassar verstaan steeds nie wat hy verkeerd gedoen het nie.

“Ek sal nie eens my honde na jou toe stuur nie,” het sy vir Nassar gesê.

Hierna het Aquilina Nassar gevonnis – ’n minimum van 40 jaar tot ’n maksimum van 175 jaar in ’n tronk in Michigan, berig The Washington Post. Prakties gesproke beteken dit ’n lewenslange vonnis.

“Ek het pas jou doodsbevel geteken,” het Aquilina gesê.

En met dit het die regter ’n buitengewone saak afgesluit wat opnuut nasionale aandag gevestig het op ’n saak waar die feite oor die afgelope jaar bevestig is.

Volgens The Washington Post was die saak veronderstel om vier dae te duur met 88 verklarings deur slagoffers, maar het dit uiteindelik ’n week lank geduur, nadat meer as 160 vroue en meisies uiteindelik na vore gekom het. Baie het hul stories in die hof self vertel en hul molesteerder stip in die oë gekyk. Dit was die slagoffers wat Nassar in die hof wou konfronteer en hulle het een vir een hul storie kom vertel.

Een se pa het selfmoord gepleeg nadat hy uitgevind het wat met sy kind gebeur het en een van die slagoffers self het ook selfmoord gepleeg, het haar ma kom getuig. Ander het getuig oor dwelmmisbruik, skuldgevoelens en ander sielkundige probleme nadat hulle, baie jare lank, deur Nassar betas is in die naam van behandeling wat hy verkoop het as ’n “deurbraak” op mediese gebied. – Netwerk24

Kommentaar

Republikein 2025-04-20

Geen kommentaar is op hierdie artikel gelaat nie

Meld asseblief aan om kommentaar te lewer