‘Ek het nie Fishrot-geld nodig vir my sukses’

Ronelle Rademeyer - Die invloedryke Swapo-sakeman mnr. Vaino Ngipondoka wat binne die bestek van twee dekades ’n sakeryk met belange in konstruksie, agribesigheid, inligtingstegnologie en toerisme opgebou het, ontken hy was ’n begunstigde in die Fishrot-skandaal.Ngipondoka was in die visier van die Finansiële Intelligensiesentrum (FIC) en die Teenkorrupsiekommissie (ACC) ná ’n bedrag van N$7,63 miljoen na bewering op 3 Desember 2015 uit die trustrekening van die suksesvolle Windhoekse prokureur mnr. Sisa Namandje na Babyface Investments CC, ’n beslote korporasie in sy naam gevloei het.Dit is benewens ’n bedrag van N$2,1 miljoen wat na bewering uit dieselfde trustrekening aan die prokureursfirma Van der Westhuizen & Greeff op Otjiwarongo oorbetaal is vir die aankoop van die plaas Apostle. Dié plaas naby Otjiwarongo word besit deur Ngipondoka se maatskappy, Profile Investment Holdings. ’n Reuse- kunsmisaanleg is sedertdien daar opgerig en dit word as Growmax Agri Fertilizers bedryf.Die oorbetalings van N$9,73 miljoen tot voordeel van Ngipondoka is gemaak kort nadat N$15 miljoen deur die National Fishing Corporation of Namibia (Fishcor) na die trustrekening van die regsfirma Sisa Namandje & Company Incorporated oorbetaal is.Inligting oor hoe die N$15 miljoen verdeel is, word deur me. Retha Steinmann, direkteur van die Regsgenootskap van Namibië (LSN), in ’n beëdigde verklaring uiteengesit. Dit is by die hoërhof ingedien as deel van ’n ex parte-aansoek waarin sy die hof ingevolge die regspraktisynswet vir ’n lasbrief vra om die finansiële rekords van Sisa Namandje & Co Inc. se trustrekening te ondersoek.Benewens die N$9,73 miljoen waarby Ngipondoka gebaat het, is N$5,21 miljoen op 3 Desember 2015 ook aan die Gwashihwemwa Family Trust oorbetaal. Mnr. Armas Amukwiyu, Swapo se streekkoördineerder in die Oshikotostreek en voorsitter van die forum van Swapo-streekkoördineerders, is ’n trustee en begunstigde van dié trust. Namandje se regsfirma het intussen aangedui dat hy die aansoek teenstaan.Steinmann sê in haar verklaring “die betalings wek agterdog in die lig van die Fishrot-skandaal en die inligting wat onthul is oor skenkings aan Swapo in ruil vir viskwotas en -regte deur Yslanders met belange in die visbedryf”.Ngipondoka het by navraag ontken dat hy een van die elite is wat gebaat het by hierdie smeergeld. Hy het aan Republikein gesê die geld is aan hom oorbetaal as delging van ’n lening wat hy aan sy vriend, mnr. James Hatuikulipi, gemaak het. Laasgenoemde is in 2014 deur die gewese minister van visserye en mariene hulpbronne, mnr. Bernard Esau, as voorsitter van Fishcor aangestel.“James is my vriend. Ek is ’n sakeman wat aan hom geld geleen het en hy het die geld terugbetaal. Ek is ’n suksesvolle sakeman in eie reg. Ek het nie Fishrot-geld nodig gehad om te kom waar ek is nie. Ek het my kant van die saak aan die ACC gestel,” het Ngipondoka gesê.Amukwiyu wou by navraag nie die N$5,21 miljoen wat vanaf Fishcor via Namandje aan hom oorbetaal is, bespreek nie. Volgens hom is hy “nie in ’n posisie om enige verdere kommentaar te lewer nie”, aangesien hy ’n verklaring aan die ACC gemaak het.Hatuikulipi en Esau is in November verlede haar saam met die gewese minister van justisie, mnr. Sacky Shanghala, asook Esau se skoonseun, mnr. Tamson (Fitty) Hatuikulipi, en mnre. Ricardo Gustavo en Pius Mwatelulo in verband met die Fishrot-skandaal in hegtenis geneem. N$24,5 MILJOEN ONDERSOEKBenewens die N$15 miljoen wat op 1 Desember 2015 deur Fishcor aan Namandje se firma betaal is, stel die LSN ook belang in twee verdere betalings op 4 en 28 Augustus 2017 van onderskeidelik N$2,5 miljoen en N$5 miljoen. Die eerste bedrag afkomstig van Fishcor word op die bankrekonsiliasie aangedui as “direct deposit – Lemon” (Lemon Square Fishing) en die tweede deur Mermaria Seafood Namibia is met dieselfde verwysing gerekonsilieer. Mermaria Seafood se direkteurs is Yslanders, terwyl Namandje ’n direkteur en ook die openbare beampte van Lemon Square Fishing is.Steinmann sê ’n transaksie wat veral kommer wek, is ’n betaling van N$1,1 miljoen van dié geld na die huisleningsrekening wat geopen is vir uitbreiding en opknappings aan Sisa Namandje & Co Inc. se kantoorgebou. “Dit laat die vraag ontstaan op watter gronde geld vanaf Fishcor aan Lemon Square Fishing, deur die firma gebruik kon word vir ’n betaling na die leningsrekening wat dit (die firma) by die bank het.” Steinmann sê so ’n direkte oorbetaling uit die trustrekening is ontoelaatbaar.Namandje het intussen só op ’n skriftelike navraag hieroor gereageer: “Al die aantygings van onregmatige optrede is merkbaar onwaar. Ons het te alle tye wettig opgetree.“Die Regsgenootskap moet te alle tye wettig, billik en deursigtig optree. Ongelukkig is dit nie gedoen nie. Dit het geen reg om ons aan te moedig en uit te lok om ons aan ongeregtighede en onwettighede te onderwerp nie. Verder het die genootskap ook op groot skaal honderde van ons kliënte se vertroulikheid en voorregte geskend. Ons sal dié selfdienende aantygings in die hof bespreek, en nie in die media nie.”Hy sê Sisa Namandje & Co Inc. sal sy beantwoordende eedsverklaring op of voor 23 April by die hof indien. “Daar is ’n klomp feitelike wanvoorstellings en verkeerde aannames in die Regsgenootskap se verklaring.”Die aansoek dien op 7 Mei in die hoërhof.- ronelle@republikein.com.na

‘Ek het nie Fishrot-geld nodig vir my sukses’

Kommentaar

Republikein 2025-04-07

Meld asseblief aan om kommentaar te lewer

‘Ek het nie Fishrot-geld nodig vir my sukses’

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie