Ekonome oor Moody’s: dis ingewikkeld

Elvira Wood – Om af te gradeer of nie, dit is die vraag wat Moody’s Investor Service op 29 Maart gaan moet antwoord.Ekonome vra ook duidelik hierdie vraag met net sewe van die 13 ekonome (54%) wat aan Netwerk24 se peiling oor dié kwessie deelgeneem het, wat voorspel die kredietgradeerder gaan wél die land se skuld tot rommel afgradeer.Die ander ses (46%) meen weer Moody’s gaan net soos voorheen eers wag en kyk wat gaan gebeur.Die wat nié meen Moody’s gaan die land se skuld afgradeer nie, voorspel wel dat die vooruitsig van stabiel na negatief verander gaan word.Moody’s is tans die enigste van die drie groot kredietgradeerders wat nog nie Suid-Afrika se staatskuld tot onder beleggingsgraad – of rommelstatus – afgegradeer het nie.Hy handhaaf tans ’n gradering van Baa3 met ’n stabiele vooruitsig.Standard & Poor’s Global Ratings gradeer staatskuld in buitelandse geldeenhede reeds op twee vlakke (BB) en skuld in rand (BB+) op een vlak onder beleggingsgraad. Sy vooruitsig is stabiel.Fitch Ratings gradeer al Suid-Afrika se staatskuld op een vlak onder beleggingsgraad (BB+), ook met ’n stabiele vooruitsig.Elna Moolman, senior ekonoom by Standard Bank is een van die ekonome wat meen Moody’s gaan sy gradering onveranderd laat.“Suid-Afrika is volgens Moody’s se graderingsmetodiek, nog ’n beleggingsgraderingsland. Ons ekonomiese en fiskale posisie het wesenlik verswak, maar dis nog binne die band waarbinne Moody’s ’n land as bó beleggingsgraad ag,” sê sy.Manfred Venter, ’n onafhanklike ekonoom, verskil egter van haar.Hy meen Moody’s gaan al Suid-Afrika se staatskuld, ongeag in watter geldeenheid dit is, tot rommel afgradeer.“Die regering kon nie bewys dat hy beheer kon kry oor staatsondernemings nie. Staatskuld beweeg steeds opwaarts en korrupsie bly aan die orde van die dag. Geen beleid of wetgewing word ingestel om enige van dié probleme te hanteer nie,” sê hy.Hy voorspel dat sou sy voorspelling waar word, die rand onmiddellik teenoor ander geldeenhede en veral die dollar gaan verswak, inflasie en rentekoerse dramaties sal styg, en dat die land weer ’n ekonomiese resessie sal binnegaan.Sy vooruitsig strook met dié van Dawie Roodt, hoofekonoom by die Efficient Group, wat op 19 Maart gesê het soos sake tans staan met veral die kragkrisis, gaan Suid-Afrika binnekort ’n resessie binnegaan en gaan Moody’s die land se kredietgradering dié maand nog afgradeer.Prof. Jannie Rossouw, hoof van die skool vir ekonomiese en sakewetenskappe by die Universiteit van die Witwatersrand, sê reguit hy verwag ook ’n afgradering.“Die graderingsagentskappe het hul geduld met Suid-Afrika verloor. Ek verwag ook verdere afgraderings deur S&P en Fitch, met Suid-Afrika wat verder wegsak in rommelstatus. “Maar dit lyk asof die ANC-regering nie verstaan dat daar grade van rommelstatus is nie en dat dit nog slegter met die land kan gaan nie.”EskomHoewel ekonome se verwagting oor presies wat Moody’s op die 29ste gaan aankondig verskil, stem hulle almal wel oor één ding saam: die huidige probleme by Eskom gaan sonder twyfel ’n groot rol speel in wat die kredietgradeerder ook al besluit.“Die huidige elektrisiteitskrisis gaan bepaald ’n invloed op Suid-Afrika se ekonomiese groei hê, veral indien die krisis langdurig gaan wees,” sê Thea Fourie, senior ekonoom by IHS Markit.“Dit sal uiteraard ’n invloed op Moody’s se skuldmatrikse hê en die kans op ’n afgradering verhoog.”Fourie sê sy verwag egter dat vir die oomblik gaan Moody’s net die vooruitsig van stabiel na negatief verander, sonder om die kredietgradering self aan te pas.“ ’n Afgradering kan voorkom word indien Moody’s gemaklik voel dat die herstruktureringsplanne wat die staat vir Eskom het op ’n meer volhoubare pad geplaas kan word. Dit sal beteken dat Eskom minder aanspraak sal maak op finansiële hulp van die staat af.”Abri du Plessis, ekonoom en portefeuljebestuurder by Gryphon, stem saam met Fourie.“Ek verwag dat die vooruitsig van stabiel na negatief verander gaan word en dat daar nie tans ’n afgradering van die kredietgradering gaan wees nie. Ek verwag dat Moody’s Suid-Afrika tot die einde van die jaar gaan kans gee om Eskom en ander SOE’s te herstruktureer.”Johan Willemse, ekonoom by Agrimark Consultants, som die situasie op as volg: “Die realiteit is dat fabrieke nie teen hul volle kapasiteit bedryf word nie, boere ly erge skade want hulle kan nie genoeg water besproei nie weens beperkte ure, terwyl ander besighede soos restaurante en winkels tussen 20% en 30% van hul werksdag weens beurtkrag verloor. Tóg moet hulle steeds hul werkers en oorhoofse koste betaal.“Beurtkrag + laer ekonomiese groei = laer inkomste vir staat. Dit verminder dus die staat se vermoë om sy skuld te diens.” – Netwerk24

Ekonome oor Moody’s: dis ingewikkeld

Kommentaar

Republikein 2025-01-10

Meld asseblief aan om kommentaar te lewer

Ekonome oor Moody’s: dis ingewikkeld

Kommentaar

Republikein 2025-01-10

Meld asseblief aan om kommentaar te lewer

MELD AAN

Advertensie