Erindi se verkoop steeds duister

Denver Kisting – In die eerste plek kán die regering nie vir Erindi verkoop nie omdat die spogwildreservaat nie aan hom behoort nie.So sê dr. Saara Kuugongelwa-Amadhila, die eerste minister.Dit het verlede week rugbaar geword ’n buitelandse miljardêr is warm op die Erindi private wildreservaat se spoor.Die regering het reeds te kenne gegee hy stel nie belang om self die grond aan te skaf nie.Volgens ’n verklaring van mnr. Servaas van den Bosch, ’n plaaslike skakelbeampte, is die verkooptransaksie in ’n gevorderde stadium en onderhewig aan ’n besluit deur die Mededingingskommissie.Kuugongelwa-Amadhila het gister gesê die verkoop en aankoop van kommersiële grond word deur wetgewing gereguleer waarvolgens die regering magtiging moet gee as ’n buitelander sulke grond wil koop.Volgens haar is daardie magtiging nie gegee nie. Sy het op ’n vergadering in Windhoek gesê die regering “sal niks doen wat die belang van ons mense in die gedrang kan laat kom nie”.Sy het benadruk die nasionale grondberaad het verlede jaar ooreengekom om na die belange van grondlose Namibiërs om te sien. Dié doelwit is steeds op die agenda, het sy gesê.‘2% MET OPE ARMS ONTVANG’Kuugongelwa-Amadhila het oor die gewraakte 2%-pleidooi gesê: “Ons het positiewe terugvoering van ’n aantal belanghebbendes ontvang.”Die regering het twee weke gelede skokgolwe deur die land gestuur toe ’n uitnodiging deur die eerste minister aan vakbondleiers uitgelek het.Kragtens dié uitnodiging is ’n kabinetsbesluit onthul waarvolgens die regering alle Namibiese werknemers vra om vrywillig 2% van een maand se basiese salaris te skenk.Dié geld sal glo onder meer vir droogtehulp aangewend word.Gister het die eerste minister beweer “mense is optimisties” oor dié pleidooi. Sy het ook gesê die vergadering het goed verloop, maar vakbondleiers was dit eens hulle het nie die mandaat om namens werkers in te stem tot die 2%-versoek nie.Volgens haar het hulle nie die inisiatief in beginsel afgeskiet nie.Mnr. Job Muniaro, die sekretaris-generaal van die Nasionale Unie vir Namibiese Werkers (NUNW), het verlede week bevestig hulle het hulle nie tydens die vergadering met die premier tot ’n antwoord verbind nie.Vanweë die aard en omvang van die kwessie het hulle besluit om eers met die ganse vakbondleierskap te beraadslaag, het hy by navraag aan Republikein gesê.Talle volgelinge van die koerant se Facebookblad het gister ergerlik gereageer op Kuugongelwa-Amadhila se weergawe dat die pleidooi met ope arms verwelkom word.Een sosialemediagebruiker wou weet: “Wie het gesê ek het gesê dis oukei? Laat daai antie ophou.”Intussen berig Augetto Graig die minister van inligting en kommunikasietegnologie, mnr. Stanley Simataa, het ook gister oor die vrywillige 2%-bydrae uitgewei. “Dit is nie elke jaar dat die regering so ver sal gaan om burgers te vra om hande diep in hul sakke te steek en by te dra nie. “Die bestee van die bydraes sal tot die huidige inisiatief (droogtehulp) beperk word sodat werksaamhede in hierdie sleutelbedryf nie tot stilstand kom nie. Ons het markte oral ter wêreld vir ons landbouprodukte verseker. As landbou toegelaat word om inmekaar te stort, sal daar langtermyngevolge vir die land wees. “Van tyd tot tyd kry ons ook ondersteuning van ander lande. Hoe dink julle kry hulle die geld? Van die bydraes van hul burgers. Ek het nog nooit Namibië so troosteloos gesien nie. Hierdie droogte is een van die ergstes in my ervaring. Die geld kom nie na ons politici toe nie,” het hy gesê. DROOGTE-UITROLPLAN KLAARIntussen sê Kuugongelwa-Amadhila die regering het sy plan van aksie voltooi oor hoe droogtehulp versprei sal word.Op streekvlak word weerlose inwoners tans geïdentifiseer om veral na dié mense toe uit te reik, het sy gesê.Volgens haar het die Namibiese weermag reeds personeellede en vragmotors beskikbaar gestel.Private diensverskaffers sal net betrek word as daar ’n tekort is, sê sy.

Erindi se verkoop steeds duister

Kommentaar

Republikein 2025-04-08

Meld asseblief aan om kommentaar te lewer

Erindi se verkoop steeds duister

Kommentaar

Republikein 2025-04-08

Meld asseblief aan om kommentaar te lewer

MELD AAN

Advertensie