Fietsryer sterf ná vragmotor haar tref

Henriette Lamprecht – ’n Sweedse fietsryer is dood nadat ’n vragmotor haar Vrydag op die pad tussen Aus en Rosh Pinah raakgery het.

Nog twee buitelanders wat saam met die 32-jarige vrou ook op hul fietse deur die vragmotor getref is, verkeer elk in ’n kritieke toestand.

Die drie fietsryers is Vrydag omstreeks 07:30 op die C13-hoofpad 24 km buite Aus onderweg na Rosh Pinah deur ’n vragmotor van Coleman Transport getref. Die vrou is op slag dood, terwyl 'n Noorweegse en 'n Sweedse man ernstig beseer is. Die Noorweër is met ’n noodvlug na Windhoek vir ’n noodoperasie vervoer. Die Sweedse man moes ook ’n noodoperasie weens ernstige kopbeserings ondergaan en is later vir X-strale na Keetsmanshoop vervoer, waarna hy na Windhoek gebring is.

Die name van die oorledene sowel as die twee beseerdes is nog nie bekend gemaak nie, omdat die Namibiese polisie deur hul onderskeie ambassades te werk moet gaan om hul families in die buiteland van hul dood te verwittig. Volgens hoofinspekteur Douglas Hanze van die polisie in die ||Kharasstreek is alle inligting van die oorledene en die twee beseerdes aan die onderskeie ambassades oorhandig om om hul familie in kennis te stel. ’n Saak van strafbare manslag word teen die vragmotorbestuurder ondersoek. – [email protected]