Fishcor-baas kry trekpas

Ogone Tlhage en Ronelle RademeyerMet nog 'n hoë wat in die lig van grootskaalse bedrog in die visbedryf geskors is, hou die Law Society of Namibia (LSN) verwikkelinge noukeurig dop met die oog op 'n moontlike ondersoek teen regslui wat geïmpliseer word.Fishcor se uitvoerende hoof, mnr. Mike Nghipunya, is Maandag geskors ná inligting deur Al Jazeera se ondersoekspan getoon het hy het glo sy posisie as hoof van dié staatsbeheerde vismaatskappy gebruik om viskwotas in ruil vir omkoopgeld toe te ken.In die Al Jazeera-dokumentêr, Anatomy of a Bribe, beloof Nghipunya viskwotas aan die ondersoekende joernalis, ene Johnny, wat hom as 'n belegger voorgedoen het.Hy sou Fishcor daarvoor gebruik. Mnr. Bernhard Esau, die gewese minister van visserye en mariene hulpbronne wat verlede week in hegtenis geneem is, het na bewering verskeie private maatskappye van viskwotas ontneem en dit aan Fishcor toegeken.Laasgenoemde maatskappy staan sentraal in die bewerings dat dit 'n groot deel van sy visvangregte aan die Yslandse vismaatskappy, Samherji, toegeken het. In ruil daarvoor is smeergeld glo aan sleutelspelers by Fishcor, asook politici betaal.Van die maatskappye wat hul viskwotas verloor het, was genoodsaak om van hul werknemers af te dank.Die Al Jazeera-span het drie maande lank onder die dekmantel van beleggers gewerk met die doel om dié reusekorrupsie oop te vlek. Nghipunya was een van die amptenare met wie hulle private vergaderings gehou het. Video-opnames is in die geheim daarvan gemaak.Die waarnemende voorsitter van Fishcor se direksie, mnr. Bennet Kangumu, het aan Namibian Sun bevestig stappe is teen Nghipunya gedoen.“Die uitvoerende hoof is met verpligte verlof gestuur terwyl die ondersoek aan die gang is. Die direksie sal vergader en in die lig van die nuwe bewyse, die weg vorentoe bepaal,” het Kangumu gesê.Intussen het mnr. Paulus Noa, uitvoerende direkteur van die Teenkorrupsiekommissie (ACC), gister by navraag bewerings ontken dat lasbriewe vir die inhegtenisneming van nóg sewe mense bekom is.“Ons is besig met die ondersoek. Maar ons is nog nie by die punt waar verdere inhegtenisnemings gemaak gaan word nie,” het hy gesê.Dr. Meyer van den Berg, voorsitter van die LSN, het gister in 'n verklaring gesê dié vereniging is in die lig van die Fishrot-skandaal, soos dit allerweë bekend staan, met navrae om kommentaar oorval.Die Walvisbaaise prokureur mnr. Sacky Kadhila Amoomo word in die dokumentêr as die transaksieknoper (dealmaker) beskryf. Hy sê daarin: “Hy (Ngipunya) sal seker maak jy kry die kwota. Dit is in sy belang, want deur sy 20% (aandeel) is hy deel van die besigheid.”Amoomo is ook die besturende direkteur van Omualo Fishing. Nghipunya erken in die video hy het Amoomo in die verlede gehelp om visvangkwotas vir Omualu Fishing te kry.Verder moedig Nghipunya die “belegger” aan om die geld deur Amoomo na hom te kanaliseer. Laasgenoemde gebruik 'n frontmaatskappy, SPK Consulting, sodat daar nie 'n verband tussen die belegger en Nghipunya gevind kan word nie, word in die video onthul.“Wat ons probeer doen, is om seker te maak die hele transaksie word met Sacky gedoen. Dan is dit onafhanklik en ek is net daar om jou met die kwota by te staan,” sê Nghipunya aan die “belegger”. Hy beloof ook solank hy Fishcor se uitvoerende hoof is, sal die “belegger” van kwotas verseker wees.Van den Berg sê tot dusver is geen skriftelike klag by die LSN teen enige prokureur in verband met hierdie bedrogskandaal ingedien nie.Hy sê die vereniging kan 'n ondersoek van stapel stuur ná 'n skriftelike klag, of as die LSN voel 'n lid het hom aan ongeoorloofde gedrag skuldig gemaak.Hy sê verdere inligting word tans ingesamel en gesprekke word met ander instellings gevoer om te besluit wat sy optrede gaan wees.Die twee voormalige ministers, Esau en mnr. Sacky Shanghala, voorheen van justisie, en hul medebeskuldigdes, die voormalige Fishcor-voorsitter, mnr. James Hatuikulipi, sy neef, mnr. Tamson “Fitty” Hatuikulipi, wat met Esau se dogter, Ndapandula getroud is, asook die geskorste Investec Asset Management Namibia-bestuurder, mnr. Ricardo Gustavo, en mnr. Pius “Taxa” Mwatelulo se saak is tot 20 Februarie 2020 uitgestel.– ronelle@republikein.com.na; ogone@namibiansun.com

Fishcor-baas kry trekpas

Kommentaar

Republikein 2024-11-25

Meld asseblief aan om kommentaar te lewer

Fishcor-baas kry trekpas

Kommentaar

Republikein 2024-11-25

Meld asseblief aan om kommentaar te lewer

MELD AAN

Advertensie