'Geen opleiding, net werk'
Yochanaan Coetzee - Die strydkinders is te oud vir opleiding en wil net werk hê.
So sê die groep wat Sondag by die Zoo Park in Windhoek kamp opgeslaan het.
Pres. Hage Geingob het in September verlede jaar N$11 miljoen beskikbaar gestel vir die opleiding van strydkinders by die jeugopleidingsentrum op Berg Aukas.
Volgens die groep se woordvoerder, mnr. Tuhafeni Nhinda, het die sekretaris van die kabinet, mnr. George Simataa, tydens 'n vergadering op 2 Desember 2016 belowe 400 poste sal eksklusief vir die strydkinders beskikbaar wees.
In 'n versoekskrif wat gister aan Simataa oorhandig is, vra die groep wat van dié poste geword het. Ook erken die strydkinders hulle verkies om te werk bo die opleiding wat die regering aanbied.
“Hulle kan nie nou praat van poste wat bevries is nie; wat het van die 400 poste geword?” het Nhinda gesê. Volgens hom wou die regering nooit verduidelik wat die opleiding behels nie. Hy het voorts gesê lede van die groep is almal ouer as 24 jaar en kan dus nie vir diens in die polisie of weermag aansoek doen nie. Die strydkinders het geweier om na die Ndilimani-kamp by Brakwater terug te keer, omdat hulle glo in hongersnood leef en “geen manier het om vir kos of geld daar te bedel nie”. “Ons is moeg, honger en soek antwoorde,” het me. Ndapandula Phineas (32) gesê.
Volgens Nhinda is die geleenthede vir die groep om vir kos te bedel beter in die dorp as by Brakwater. “Ons gaan nie daar bly nie, want daar is nie kos nie.”
Die versoekskrif volg twee weke nadat 'n stropersbende bestaande uit strydkinders 'n droogtehulpskenking aan inwoners van die Mixed informele nedersetting onderbreek en die mense van hul kos beroof het.
“Desember het ons niks van Swapo ontvang nie, nie kos of ander voorraad nie. As dit nie vir ons bure Pashecka en die mense by die Indraai-abattoir was nie, sou ons vergaan het,” het nog 'n strydkind gesê.
Volgens die adjunksekretaris van die kabinet, mnr. Neville Itope, is die vakante poste slegs vir kandidate wat vir opleiding by Berg Aukas gaan. Dit sluit tegniese opleiding in.
“Ons sal eers die versoekskrif deeglik lees en die vereistes oorweeg alvorens ons daarop kan reageer.”
So sê die groep wat Sondag by die Zoo Park in Windhoek kamp opgeslaan het.
Pres. Hage Geingob het in September verlede jaar N$11 miljoen beskikbaar gestel vir die opleiding van strydkinders by die jeugopleidingsentrum op Berg Aukas.
Volgens die groep se woordvoerder, mnr. Tuhafeni Nhinda, het die sekretaris van die kabinet, mnr. George Simataa, tydens 'n vergadering op 2 Desember 2016 belowe 400 poste sal eksklusief vir die strydkinders beskikbaar wees.
In 'n versoekskrif wat gister aan Simataa oorhandig is, vra die groep wat van dié poste geword het. Ook erken die strydkinders hulle verkies om te werk bo die opleiding wat die regering aanbied.
“Hulle kan nie nou praat van poste wat bevries is nie; wat het van die 400 poste geword?” het Nhinda gesê. Volgens hom wou die regering nooit verduidelik wat die opleiding behels nie. Hy het voorts gesê lede van die groep is almal ouer as 24 jaar en kan dus nie vir diens in die polisie of weermag aansoek doen nie. Die strydkinders het geweier om na die Ndilimani-kamp by Brakwater terug te keer, omdat hulle glo in hongersnood leef en “geen manier het om vir kos of geld daar te bedel nie”. “Ons is moeg, honger en soek antwoorde,” het me. Ndapandula Phineas (32) gesê.
Volgens Nhinda is die geleenthede vir die groep om vir kos te bedel beter in die dorp as by Brakwater. “Ons gaan nie daar bly nie, want daar is nie kos nie.”
Die versoekskrif volg twee weke nadat 'n stropersbende bestaande uit strydkinders 'n droogtehulpskenking aan inwoners van die Mixed informele nedersetting onderbreek en die mense van hul kos beroof het.
“Desember het ons niks van Swapo ontvang nie, nie kos of ander voorraad nie. As dit nie vir ons bure Pashecka en die mense by die Indraai-abattoir was nie, sou ons vergaan het,” het nog 'n strydkind gesê.
Volgens die adjunksekretaris van die kabinet, mnr. Neville Itope, is die vakante poste slegs vir kandidate wat vir opleiding by Berg Aukas gaan. Dit sluit tegniese opleiding in.
“Ons sal eers die versoekskrif deeglik lees en die vereistes oorweeg alvorens ons daarop kan reageer.”
Kommentaar
Republikein
Geen kommentaar is op hierdie artikel gelaat nie