Geen teken van vermiste kaptein

Otis Finck op Walvisbaai – Die soektog na kaptein Carlo Gordon van die vissersboot Resplendent wat Dinsdag in die diepsee naby Walvisbaai gesink het, is drieuur gistermiddag afgelas.Gordon is nie gevind nie, het die Ohlthaver & List-groep se woordvoerder, me. Roux-ché Locke, bevestig.Anders as die 26 ander bemanningslede, was hy nie so gelukkig om dit betyds na die veiligheid van die ontplooide rubberbote te maak nie.“Ons was besig om die net uit die water te trek toe water by die agterskip begin instroom het.“Ons het probeer om die water met noodpompe uit te pomp, maar was nie suksesvol nie. Die alarm het afgegaan en ons het ons veiligheidsbaadjies gegryp en ons na die dek gehaas om die reddingsbote te ontplooi.”Só het een van die geskokte bemanningslede gister by die Welwitschia private hospitaal op Walvisbaai vertel.Volgens die bemanningslede kon hulle twee reddingsbote betyds ontplooi. Die ander twee rubberbote het eers na die oppervlak gekom en oopgevou toe die Resplendent onder die water verdwyn het.Dié stokvisboot van Hangana Seafood het om 13:00 Dinsdag ’n noodsein uitgestuur en kort daarná gesink.“Die bemanningslede was verspreid in die water. Diegene wat dit tot by die reddingsbote gemaak het, het ander uit die water tot binne-in die rubberbote getrek. Dit het alles baie vinnig gebeur. Die vissersboot het so vinnig vol water geword dat dit in minder as vyf minute gesink het. Dit het sywaarts gekantel en na onder gesink,” het die bemanningslid vertel.Van sy medebemanningslede stem saam dat mooiweerstoestande in hul guns getel het. “As die see stormagtig was, kon dinge anders verloop het. Ons was ook baie gelukkig dat ander bote in die gebied visgevang het,” sê hy.Die Ohlthaver & List-groep aan wie Hangana Seafood behoort, het gister bevestig die vissersboot Fisher Bank het om 06:30 gister met 26 van die 27 oorlewende bemanningslede aan boord in die hawe by Walvisbaai vasgemeer.Die groep se woordvoerder, me. Roux-ché Locke, sê sewe bote het in die omgewing waar die Resplendent onder die water verdwyn het, na Gordon gesoek.“Die 24 uur lange prosedurele soektog sal tot 15:00 vandag (gister) voortduur. Die Hangana-span onder aanvoering van die besturende direkteur, mnr. Herman Theron, het die Gordon-familie besoek en sal die nodige ondersteuning bly verleen. ’n Volledige ondersoek is van stapel gestuur,” het sy by navraag gesê.Verligte familielede van die oorlewendes het hulle gister by die Welwitschia private hospitaal waarheen hulle vir waarneming geneem is, bygestaan. Die geskokte bemanningslede is met hul aankoms in die hawe van droë klere voorsien. Nadat hulle berading gekry het, is hulle na dié hospitaal geneem om ondersoek te word. Drie van die bemanningslede is vir verdere waarneming verwys aangesien hulle beseer is.Een van die familielede het vertel die bekommerde families en vriende het van 14:15 Dinsdag af begin bel om uit te vind wat gebeur het. “Eers toe die fabriek sê die bemanning is veilig, het ek kalm geword.”Beamptes van die department maritieme aangeleenthede in die ministerie van werke en vervoer was teenwoordig toe die bemanning in die hawe aankom. Hulle sal vandag (Donderdag) begin om verklarings af te neem.Mnr. Julius Ngweda, woordvoerder van dié ministerie, sê die Resplendent het in die viswaters van die Namibië Eksklusiewe Ekonomiese Sone gesink.Volgens hom is dit nog nie duidelik wat gebeur het nie. ’n Veiligheidsertifikaat is op 30 Oktober 2019 vir die Resplendent uitgereik en dit is tot 23 Oktober vanjaar geldig.“Die ministerie sal ’n volledige ondersoek instel om in ooreenstemming met die wet op handelskepe te bepaal wat die omstandighede van hierdie ongelukkig voorval was. Die ministerie het ook deur die maritieme reddingsentrum ’n navigeringswaarskuwing aan vaartuie uitgereik om nie in dié gebied te vaar nie, en dit te rapporteer indien hulle die vermiste bemanningslid gewaar.” – otis@erongo.com.na

Geen teken van vermiste kaptein

Kommentaar

Republikein 2025-04-21

Meld asseblief aan om kommentaar te lewer

Geen teken van vermiste kaptein

Kommentaar

Republikein 2025-04-21

Meld asseblief aan om kommentaar te lewer

MELD AAN

Advertensie