Gehr's - eg Namibiese likeur

Eugen Gehr het saam met sy vrou Angelika vir 25 jaar ’n hotel in Duitsland bestuur, waar hy ook vir etlike jare ondervinding in die stook van vrugte-schnapps opgedoen het. Na hul eerste besoek aan Namibië, het die egpaar op die land verlief geraak. Vir weke na hul terugkeer, het hul steeds na die land bly hunker. “Ek het in die kombuis gestaan en aan Namibië gedink en hoe ons dalk daar ’n lewe kan voer,” vertel Eugen. Toe hy vir sy vrou van sy dagdrome vertel het, het sy erken dat ook sy al vir weke dieselfde gedagtes koester. Eugen en Angelika het al hul besittings in Duitsland verkoop, die plaas Ousema-Süd, 95 km buite Otjiwarongo, gekoop en sak en pak na Namibië verhuis. In Duitsland het Eugen “schnapps” van verskillende vrugtesoorte gemaak en hy was oortuig dat die vrug van die turksvy, wat ruig op die plaas gegroei het, ’n unieke en lekker proe-schnapps sal maak. Gewone turksvysap en -konfyt het toe reeds in oormaat die lig op die plaas gesien. Hy het ’n distilleringsketel uit Duitsland ingevoer en met die distillering van die vrug begin. Die turskvye word jaarliks vanaf Mei tot Augustus geoes wanneer dit ryp is. “Dan moet ons vinnig wees, anders vreet die bobbejane al die vrugte op,” vertel Angelika. Om die duisende klein dorings te vermy, word die donkerpers vrugte met lang braaitange van die kaktusplant afgepluk. Dit word dan goed gewas en gepers. Gis word by die pulp gevoeg wat dan vir twee weke in vate gelaat word sodat dit kan gis. Na die gisproses word die pulp in ’n groot ketel geskep wat oor ’n waterbad verhit word. Die dampe koel in koperspirale af en word vloeistof. Dit is die eerste distillering van die schnapps. Tydens die verdamping skei die “ligte” en die “swaar” alkohol van mekaar. Die “swaar” alkohol vloei terug in die ketel en word weer verhit en gedistilleer. Omdat die vrugtepulp twee maal gedistilleer word, kry die schnapps ’n gladde en ryk smaak. Eugen maak twee tipes turksvy-schnapps. Die deurskynende een het ’n alkoholinhoud van 40 persent. “Dit is net die regte ding om na ’n goeie of ryk maaltyd te drink, want die schnapps help met die vertering,” sê Eugen. Die ander een is helder pers van kleur en het ’n baie ligter alkoholinhoud van 22 persent. Dit het ook ’n baie sagter en meer vrugtige smaak, omdat dit uit ’n mengsel van die een schnapps en turksvysap bestaan. “Die likeur gaan baie goed saam met nageregte en is heerlik oor roomys,” het Eugen bygevoeg. ’n Sopieglas van dié likeur in ’n glasie droë vonkelwyn, maak volgens Eugen ’n heerlik, verfrissende, vrugtige en ware Namibiese skemerkelkie.Dit is egter nie net uit turksvye waarvan Eugen schnapps maak nie. Ook op die plaas is ’n paar suurlemoenbome en kort voor lank is ook dit in ’n schnapps en likeur verwerk.Die suurlemoenbome op die plaas was te min om in die aanvraag na dié likeur te voorsien en by buurplase is vir nog voorraad aangeklop. Die turksvy- asook die suurlemoen-schnapps word van begin tot einde met die hand gemaak uit vrugte wat organies gekweek word. Die suurlemoenpulp moet vir ses weke gis voordat dit ook twee keer gedistilleer word. Die skille word in 80 persent alkohol geweek sodat dit die kleur en smaak van die skille aanneem. Dan word dit by die gedistilleerde schnapps gevoeg wat dit ’n liggeel kleur en ’n baie sterk suurlemoensmaak gee. Soos met die turksvy-likeur, word suurlemoensap by van die schnapps gevoeg om dit ’n sagter, vrugtige suurlemoen-likeur te maak. Eugen en Angelika maak ook schnapps uit lemoene wat hulle van ’n plaas in die Hochfeld-omgewing kry. Dit kom egter nie in ’n likeur nie. Die vyf soorte schnapps en likeure wat op Ousema-Süd gemaak word, kan by uitgesoekte drankwinkels in Windhoek, Swakopmund, Omaruru, Grootfontein, Otjiwarongo en Otavi gekoop word. Dit is ook by verskeie lodges en gasteplase beskikbaar. “Ons grootste verkoper is egter die belastingvrye winkel wat die toeriste op die Internasionale Lughawe Hosea Kutako bedien,” sê Eugen. Dié eg Namibiese produkte is ook vir sewe jaar na Duitsland uitgevoer. Die man wat die invoere hanteer het, het egter afgetree en die Gehr’s is op soek na ’n nuwe verspreider. “Ons is ’n baie klein besigheid, maar ons is baie trots op ons 100 persent Namibiese produk wat deur Namibiërs gemaak word,” spog Eugen.

Gehr's - eg Namibiese likeur

Kommentaar

Republikein 2025-04-29

Meld asseblief aan om kommentaar te lewer

Gehr's - eg Namibiese likeur

Kommentaar

Republikein 2025-04-29

Meld asseblief aan om kommentaar te lewer

MELD AAN

Advertensie