Geldtekort belemmer veilige drinkwater
Die meeste lande het te min geld en menslike hulpbronne om beleidsrigtings vir water, sanitasie en higiëne te implementeer.
Henriette Lamprecht
Meer moet gedoen word om in sterk stelsels vir drinkwater en sanitasie te belê.
'n Gebrek aan voldoende sanitasiegeriewe en skoon drinkwater is een van die grootste struikelblokke in Namibië se stryd om die hepatitis E-uitbreking hok te slaan wat sedert Desember 2017 woed.
Die meeste gevalle kom in informele nedersettings soos Havana en Goreangab in Windhoek voor, asook in die DRC op Swakopmund en soortgelyke nedersettings waar toegang tot skoon water, sanitasie en higiëne beperk is.
Volgens 'n verslag van die Wêreldgesondheidsorganisasie (WHO) en UN-Water wat vir Waterdag vrygestel is, kniehalter swak regeringstelsels, asook 'n gebrek aan menslike hulpbronne en geld pogings om gesondheid vir almal te verseker. UN-Water koördineer die werksaamhede van Verenigde Nasies-entiteite en internasionale organisasies wat fokus op water- en sanitasiekwessies.
Die verslag, “Globale evaluering en ontleding van sanitasie en drinkwater”, bekend as die GLAAS-verslag, het 115 lande en gebiede betrek wat 4,5 miljard mense verteenwoordig.
Volgens die verslag word dienslewering vir water, sanitasie en higiëne (WASH) nie net deur die toestand van infrastruktuur bepaal nie, maar ook deur komplekse stelsels vir instellings, regerings en finansiële bestuur. Die groot klip in die pad is steeds onvoldoende menslike en finansiële hulpbronne om planne en beleidsrigtings vir WASH te implementeer. Hoewel baie lande die koste van die implementering van hul nasionale WASH-planne beraam het, het minder as 15% van lande nie genoeg geld om dit te implementeer nie.
“Planne word selde deur die nodige finansiële en menslike hulpbronne ondersteun, wat gevolglik die implementering en uitkoms van WASH-dienslewering kortwiek,” lui die verslag.
Hoewel die meeste lande ook nasionale standaarde ingestel het vir drink- en afvalwater, is die instellings wat dit moet reguleer se kapasiteit te min om die nodige toesig te doen. Slegs 12% van lande kon volgens die verslag bevestig dat hul monitering van water volledig en gereeld gedoen word. Minder as 'n derde van owerhede wat in beheer hiervan staan, publiseer openbare verslae oor drinkwater en sanitasie. Ook hier speel onvoldoende fondse en menslike hulpbronne 'n rol, met owerhede wat selde optree teen dié wat nie water en sanitasie monitor nie. Groot gapings heers ook tussen wat nodig is om WASH-doelwitte te behaal en die geld wat hiervoor beskikbaar is. Twintig lande het 'n begrotingsgaping van tot 61% tussen geïdentifiseerde behoeftes en beskikbare geld.
“Te veel mense het nie toegang tot betroubare en veilige drinkwater, toilette en geriewe vir hande was nie. Dit hou 'n risiko in vir die opdoen van dodelike infeksies en belemmer vooruitgang in openbare gesondheid,” sê die WHO se direkteur-generaal, dr. Tedros Adhanom Ghebreyesus.
“Water en sanitasiestelsels verbeter en red nie net lewens nie, maar is ook 'n kritieke komponent om stabiele, veilige en vooruitstrewende samelewings te bou,” het hy gesê.
- [email protected]
Meer moet gedoen word om in sterk stelsels vir drinkwater en sanitasie te belê.
'n Gebrek aan voldoende sanitasiegeriewe en skoon drinkwater is een van die grootste struikelblokke in Namibië se stryd om die hepatitis E-uitbreking hok te slaan wat sedert Desember 2017 woed.
Die meeste gevalle kom in informele nedersettings soos Havana en Goreangab in Windhoek voor, asook in die DRC op Swakopmund en soortgelyke nedersettings waar toegang tot skoon water, sanitasie en higiëne beperk is.
Volgens 'n verslag van die Wêreldgesondheidsorganisasie (WHO) en UN-Water wat vir Waterdag vrygestel is, kniehalter swak regeringstelsels, asook 'n gebrek aan menslike hulpbronne en geld pogings om gesondheid vir almal te verseker. UN-Water koördineer die werksaamhede van Verenigde Nasies-entiteite en internasionale organisasies wat fokus op water- en sanitasiekwessies.
Die verslag, “Globale evaluering en ontleding van sanitasie en drinkwater”, bekend as die GLAAS-verslag, het 115 lande en gebiede betrek wat 4,5 miljard mense verteenwoordig.
Volgens die verslag word dienslewering vir water, sanitasie en higiëne (WASH) nie net deur die toestand van infrastruktuur bepaal nie, maar ook deur komplekse stelsels vir instellings, regerings en finansiële bestuur. Die groot klip in die pad is steeds onvoldoende menslike en finansiële hulpbronne om planne en beleidsrigtings vir WASH te implementeer. Hoewel baie lande die koste van die implementering van hul nasionale WASH-planne beraam het, het minder as 15% van lande nie genoeg geld om dit te implementeer nie.
“Planne word selde deur die nodige finansiële en menslike hulpbronne ondersteun, wat gevolglik die implementering en uitkoms van WASH-dienslewering kortwiek,” lui die verslag.
Hoewel die meeste lande ook nasionale standaarde ingestel het vir drink- en afvalwater, is die instellings wat dit moet reguleer se kapasiteit te min om die nodige toesig te doen. Slegs 12% van lande kon volgens die verslag bevestig dat hul monitering van water volledig en gereeld gedoen word. Minder as 'n derde van owerhede wat in beheer hiervan staan, publiseer openbare verslae oor drinkwater en sanitasie. Ook hier speel onvoldoende fondse en menslike hulpbronne 'n rol, met owerhede wat selde optree teen dié wat nie water en sanitasie monitor nie. Groot gapings heers ook tussen wat nodig is om WASH-doelwitte te behaal en die geld wat hiervoor beskikbaar is. Twintig lande het 'n begrotingsgaping van tot 61% tussen geïdentifiseerde behoeftes en beskikbare geld.
“Te veel mense het nie toegang tot betroubare en veilige drinkwater, toilette en geriewe vir hande was nie. Dit hou 'n risiko in vir die opdoen van dodelike infeksies en belemmer vooruitgang in openbare gesondheid,” sê die WHO se direkteur-generaal, dr. Tedros Adhanom Ghebreyesus.
“Water en sanitasiestelsels verbeter en red nie net lewens nie, maar is ook 'n kritieke komponent om stabiele, veilige en vooruitstrewende samelewings te bou,” het hy gesê.
- [email protected]
Kommentaar
Republikein
Geen kommentaar is op hierdie artikel gelaat nie