Geslagsgeweld die 'norm'

Mariselle Stofberg - Byna 4 000 gevalle van geslagsgeweld (GBV) is sedert verlede jaar in Namibië aangemeld. Die 3 976 voorvalle het vanaf verlede jaar tot op hede plaasgevind, met die uitvoerende direkteur van die Vroue-aksie vir Ontwikkeling (WAD) wat maan nie 'n week gaan verby sonder gevalle van verkragting, grusame moord en huishoudelike geweld teen Namibiërs deur Namibiërs wat daagliks die nuus haal nie. Volgens mnr. Saltiel Shinedima tel die land onder dié waar geweld teen vroue en kinders die norm geraak het. “Wanneer jy kyk na die grusaamheid, laat dit jou wonder wat met ons gebeur het en wanneer ons so harteloos geword het.”Die ministerie van justisie het in 2016 bevestig 70% van die sake wat by die hoërhof aangemeld is, was aan GBV verwant. Shinedima het die belangrikheid van onderrig by ouerhuise beklemtoon, veral op die manier waarop jong seuns grootgemaak word. “Gewelddadigheid is nie inherent tot die mens se natuur nie. Dit word aangeleer, wat ook beteken ons kan dit afleer. Respek vir vroue en kinders moet reeds vanaf ’n jong ouderdom by seuns ontwikkel word.” Shinedima het met die aanvang van die 16 Dae van Aktivisme teen Geslagsgeweld gesê alkohol- en dwelmmisbruik dra grootliks tot die geweld by, hetsy as primêre of onderliggende faktore."Dit verlaag jou inhibisies en keer jou om oordeelkundige keuses te maak," het hy gesê.Intussen het die verteenwoordiger van die Verenigde Nasies (VN) se Ontwikkelingsprogram (UNDP) tydens dieselfde geleentheid gesê misdade soos verkragting en aanranding word teen vroue gepleeg "bloot omdat hulle vroue is".Volgens me. Anita Kiki Gbeho speel bemagtigde vroue ’n deurslaggewende rol in die ontwikkeling en verbetering van lewensstandaarde van toekomstige generasies. "Navorsing toon GBV kan 2% van die land se bruto binnelandse produk kos," het Gbeho gesê. Volgens statistieke trou 7% van meisies in Namibië voor die ouderdom van 18, 'n derde van verkragtingslagoffers is jonger as 18 jaar, terwyl 33% van vroue tussen die ouderdomme van 15 en 49 reeds een of ander vorm van geweld ervaar. Ghebo het die insameling van data beklemtoon en gemaan "ons kan dit nie beheer as ons dit nie kan meet nie”. Word volledige data versamel, kan volgens haar bepaal word watter stappe gedoen en wette en beleide aangepas kan word om GBV te verhoed. Inligting sluit onder meer in wie die oortreder was en waar die voorval plaasgevind het. Voorts is die ondersteuning van veldtogte teen geweld noodsaaklik in die stryd teen GBV. Volgens me. Annemarie Naida, adjunk-inspekteur-generaal van die Namibiese polisie, was daar sedert verlede jaar ’n toename van 23% in sake wat met GBV verband hou en by die polisie aangemeld is.

Geslagsgeweld die 'norm'

Kommentaar

Republikein 2025-04-07

Meld asseblief aan om kommentaar te lewer

Geslagsgeweld die 'norm'

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie