Gevaarligte vir smokkel van hout, dwelms

Elvira Hattingh – Alhoewel Namibië minder onder georganiseerde misdaad as die meeste ander lande deurloop, wys 'n ontleding dat gevaarligte flikker oor die onwettige handel in eksotiese hout, kokaïen asook sintetiese dwelms.Terselfdertyd bestaan goed gevestigde kriminele netwerke met sindikate wat op “nywerheidskaal” werk om hout na Oos-Asië te smokkel en Namibië as 'n “uitvoermiddelpunt” gebruik.Volgens die jongste globale indeks vir georganiseerde misdaad deur die Wêreldwye Inisiatief teen Transnasionale Georganiseerde Misdaad (GI-TOC), vaar Namibië egter beter as die meeste lande in die wêreld met 'n misdaadtelling van 4,33 uit tien. Die wêreldwye gemiddeld is 4,88. Die indeks vir die jaar 2020 is Dinsdag bekend gestel. Volgens GI-TOC is die mark vir eksotiese hardehout een van die grootste onwettige bedrywe in Namibië en loop dit parallel met die wettige markte vir hout en houtskool.FLORAMISDADEAs dit by die omgewing kom, is die georganiseerde misdaadsyfers of die sogenaamde “floramisdaadsyfer” egter so hoog as 6,5, terwyl faunamisdaad 'n telling van 4,5 kry. Die verslag sê dít is weens verskeie besendings onwettige hout wat vanaf die noorde van die land in 2020 na China en Viëtnam uitgevoer is. “Misdade rondom Namibië se plantlewe is volop. “Korrupte bosbou-amptenare reik vals permitte uit vir die oes en uitvoer vir spesifiek eksotiese palissanderhout. Die handel daarvan word gefasiliteer deur plaaslike misdadigers asook Chinese kartelle en word gestimuleer deur 'n hoë en groeiende vraag daarna in Oos-Asië,” lui die verslag.“Walvisbaai is ook 'n deurvoerpunt vir ander hout uit Afrikalande soos Mosambiek en Angola wat na Asië moet gaan.”MENSEHANDEL, WILDMISDADE“Kriminele netwerke is goed gevestig en werk oraloor onwettige markte, veral in mensehandel en wildmisdade.”“Sindikate wat hout na Oos-Asië smokkel, is klaarblyklik goed georganiseerd en werk op nywerheidskaal. Hulle gebruik Namibië as 'n uitvoermiddelpunt.“Daar is staatsgebaseerde elemente wat die werk van die kriminele netwerke fasiliteer. Die Fishrot-sage van 2019 is 'n voorbeeld hiervan.“Buitelandse kriminele elemente in Namibië sluit Suid-Afrikaanse bendes (sintetiese dwelms) asook Chinese burgers (hout) in. Angolese, Zambiese en Kongolese-groepe is ook betrokke in Namibië se markte vir dwelm- en mensehandel.”GI-TOC sê daar is min bewyse dat Namibië oor “mafiatipe-misdaadgroepe” beskik.DWELMSDwelms is ook 'n toenemende probleem in Namibië, met 'n misdaadtelling van 4,5 spesifiek vir handel in kokaïen asook sintetiese dwelms. Namibië se betrokkenheid by die handel van kokaïen het gegroei, beide in terme van plaaslike verbruik en ook as 'n deurvoerpunt na ander lande. “Namibië is 'n klein deurvoerpunt vir die verskeping van kokaïen uit Suid-Amerika na Suid-Afrika,” lui die verslag.“Die beskikbaarheid van sintetiese dwelmmiddels groei vinnig, veral in stedelike gebiede en in toerismesentrums. Die bedryf is afhanklik van invoere vanaf Suid-Afrika en mandrax word dikwels deur owerhede gekonfiskeer.“Die gebruik van sintetiese dwelms het waarskynlik toegeneem toe die regering alkohol tydelik tydens die Covid-19-pandemie verban het,” wys die ontleding.“Namibië is 'n groeiende deurvoerpunt vir die verskeping van Afghaanse heroïen, wat die land vanaf die Suide binnekom. Hiervandaan gaan dit of na Wes-Afrika, of word dit na Europese markte verskeep. “Daarbenewens groei plaaslike verbruik van die dwelm, veral in terme van nagemaakte of goedkoper weergawes daarvan,” lui die verslag.Namibië is glo ook nie 'n groot deurvoerpunt van dagga nie, alhoewel dit die dwelmmiddel is waarop die meeste beslag gelê word. Die meeste dagga wat plaaslik gekonfiskeer word, kom van eSwatini.ANDERGI-TOC sê Namibië het 'n groot mark vir ivoor, renosterhorings en ietermagos. Tog blyk dit dat die onwettige handel in dierespesies oor die afgelope jare afgeneem het.Volgens GI-TOC bestaan 'n mark vir mensehandel in Namibië, maar dit is nie wydverspreid nie. Die land het dan ook 'n relatiewe lae misdaadtelling van 3,5 in die verband gekry.“Dit is meestal beperk tot bevolkingsgroepe soos die San en die Zemba asook tot sekere gebiede, soos Windhoek en Walvisbaai. Kinders loop die grootste risiko en word as geforseerde landbou- en sekswerkers verkoop. Namibië het 'n groot mark vir onwettige diamante en ander edelstene, tog bestaan daar nie groot diamantsmokkel-sindikate nie.Kommer bestaan oor eienaarskap van vuurwapens in Namibië, hoofsaaklik omdat daar oënskynlik net soveel eienaars van ongelisensieerde vuurwapens as van gelisensieerdes is.– elvira@republikein.com.naFOTOVolgens GI-TOC is die mark vir eksotiese hardehout een van die grootste onwettige ondernemings in Namibië. FOTO ARGIEF

Gevaarligte vir smokkel van hout, dwelms

Kommentaar

Republikein 2025-01-27

Meld asseblief aan om kommentaar te lewer

Gevaarligte vir smokkel van hout, dwelms

Kommentaar

Republikein 2025-01-27

Meld asseblief aan om kommentaar te lewer

MELD AAN

Advertensie