Gim raap trofee teen St. Paul’s op

Tielman van LillDie eindronde van die African Personnel Services (APS) nasionale sesmanspankompetisie vir onder-elf-, dertien- en sestienkrieketspanne, is die afgelope naweek in die hoofstad saam met Krieket Namibië by drie venues in Pionierspark afgehandel.Die o.11-wedstryde is by die CCD-veld beslis, terwyl die o.13-spelers sake by die krieketveld van Windhoek Afrikaanse Privaatskool (Affiespark) sake uitgespook het.Die o.16-finaal by Wanderers is deur Windhoek Gimnasium op besondere wyse gewen toe hulle met 18 lopies teen ’n vegtende St. Paul’s College gewen het. Gim wat eerste gekolf het, het ’n reusetelling van 124 lopies vir twee paaltjies in sy toegelate agt boulbeurte opgestapel.Die openingspaar Dirkie Theunissen en Gerhard Janse van Rensburg het vinnig die telbord met skitter kolfwerk aan die brand geslaan. Veral Theunissen met sy 30 lopies van 15 aflewerings het opnuut gewys waartoe hy instaat is. Ongelukkig vir Gim, is Janse van Rensburg op 14 van tien balle van Jack Parker se boulwerk uitgevang voor hy verdere skade kon aanrig.Met die openingskolwers terug in die kleedkamer het Lu-Hendro de Waal en Dylan Leicher die lopiejaagtog teen ’n blitsige 15 lopies per boulbeurt voortgesit. De Waal jaag etlike aflewerings vir 31 lopies van net agt aflewerings na en oor die grenstou voor hy volgens die kompetisiereëls moet uittree.Leicher is ewe verwoestend met die wilgerlat en slaan 28 onoorwonne lopies van agt balle saam met Dian Jacobs wat agt lopies van sewe aflewerings bydra voordat hy deur Hansie de Villiers geboul word.St. Paul’s se openingskolwers Ryan Moffet en Alex Volschenk lewer briljante spel en slaan 61 lopies in vyf boulbeurte om St. Paul’s se aanslag opkoers te hou. Hul kolftempo van net meer as 12 per boulbeurt is net-net kort van die teiken (15,5 per beurt) en St. Paul’s moet in die oorblywende drie beurte bykans die onmoontlike vermag.Jack Parker op nommer drie en Raymond McDonald op nommer vier, laat nie op hulle wag nie en teken onderskeidelik 19 (7 aflewerings, vang Dian Jacobs, boul Theunissen) en elf (nie uit nie) van ses balle aan om 106/1 te haal.Alhoewel St. Paul’s die knie moes buig, het die seuns uitmuntende krieket gespeel en hul man teen ’n sterk Gim-span gestaan. Mnr. Robert de Villiers van APS, die hoofborg, sê die toernooi sal ’n jaarlikse instelling word.“Ek is baie opgewonde oor die sukses van die kompetisie. Weens die Covid-19-inperkings, was daar van die meer as 90 spanne wat sou deelneem, net 58 wat ingeskryf het. Volgende jaar sal ons beslis meer spanne in die kompetisie hê en ek glo 120 sal aan die drie verskillende afdelings deelneem. Die spelers en toeskouers het dit geweldig geniet, want dit is ’n vinnig en opwindende formaat wat daarop gemik is om meer jong spelers na dié sport te lok.“Die talent wat ons in aksie gesien het, is ongelooflik en Riaan Minnie van die APS-krieketakademie het video’s gemaak en aan Pierre de Bruyn, die hoofafrigter van die senior mansspan, aangestuur. Ons is regtig opgewonde oor die talent wat te siene was. Die spelers is opgewonde oor die viere en sesse wat hulle kon slaan en dit is presies wat ons wil hê. “Ons is daar om jong talent te ontwikkel en volgende jaar sal ons die kompetisie oor ’n langer tydperk moet aanbied om almal ’n regverdige kans te gee,” het De Villiers aan Republikein vertel.Mnr. Johan Muller, hoofbeampte van Krieket Namibië, het die spanne vir hul bydrae geloof en APS, asook die media bedank.“Daar het aanvanklik 58 spanne vir die kompetisie ingeskryf wat verlede naweek landswyd begin het. Ek wil die afrigters en elkeen van julle vir jul bydrae bedank en gelukwens. Die toekoms van krieket in Namibië lê in ons jeug.“Ek wil ons hoofborg, APS, vir sy ondersteuning bedank wat die kompetisie moontlik en suksesvol gemaak het. Mnr. Robert de Villiers van African Personnel Services is reeds vir etlike jare ’n getroue vennoot van Krieket Namibië. Ek wil ook die tellinghouers en die skeidsregter vir hul tyd en moeite bedank wat die heeldag in die son gestaan het,” het Muller gesê.In die o.11-afdeling het Gim teen St. Paul’s gewen en Pro Ed Akademie van Swakopmund is teen Affies die o.13-APS-kampioene. Die wenspanne het goue medaljes en ’n wisseltrofee ontvang om volgende jaar te verdedig. Die naaswenners spog elkeen met ’n silwermedalje om die nek. - tielman@republikein.com.na

Gim raap trofee teen St. Paul’s op

Kommentaar

Republikein 2024-12-27

Meld asseblief aan om kommentaar te lewer

Gim raap trofee teen St. Paul’s op

Kommentaar

Republikein 2024-12-27

Meld asseblief aan om kommentaar te lewer

MELD AAN

Advertensie