Gobabis bly 200% tydrenkontrei

Tielman van Lill op Gobabis - Wilro Dippenaar met sy Shell V-Power S3-klas Toyota Auris is Saterdag by die Omateko Lodge oos van Gobabis vir die derde keer as koning van die derde Shell V-Power Gobabis-tydren bekroon.
Vyftien inskrywings is in verskeie klasse ontvang, maar net 14 spanne het in die strawwe tydren weggespring. Hoewel die roetes dalk vir die toeskouers makkerig kon lyk, wys net sewe bittereinders wat klaargemaak het hoe straf die tydren werklik was.
Die eerste sneldeel was baie tegnies en is grotendeels binne die skouterrein gery waar beide navigator en bestuurder hul storie moes ken. Vreemd genoeg het heelwat spanne juis hier letterlik die pad byster geraak en verkeerd gery, terwyl Bertie Smit en navigator Dewald Venter se kragtige BSCS V8 S4 Mazda-bakkie selfs op sy dak te lande gekom het.
Toeskouers was blitsig by om Smit se bakkie weer op sy wiele te draai en nadat die Mazda ’n paar blou oliewolke uitgespoeg het, was hy reg om die broers Labuschagne (Stefan en navigator Lappies) se Gobabis Auto Truck and Tractor S4 V8 Land Rover die stryd aan te sê. Smit het nie moed opgegee nie en tweede in sy klas geëindig (1 uur 42 minute 37 sekondes), terwyl die Labuschagne’s die eerste plek in 1:36:48 opgeraap het.
Die vierde sneldeel is in die dorp op teer en grond gehou, wat groot byval by inwoners gevind het. Dit was gou duidelik dat heelparty van die motors toe al met hul nukke begin het. Gelukkig kon hul diensspanne gedurende die nag wonderwerke doen om die spanne aan die gang te hou.
Saterdagoggend was die spanne met mening terug vir die eerste sneldeel by Piet Brand en die volgende by Die Dam, waar toeskouers in groot getalle na die verbysnellende tydrenmotors kon kyk.
Die volgende sneldele was in die nywerheidsgebied, op die Leonardville-pad, by die vliegveld, gholfbaan asook Drimiopsis- en Buitepospad, waar toeskouers kon kies waar hulle die aksie wou volg. Die organiseerders verdien lof vir ’n byeenkoms wat goed georganiseer was en soos ’n glad geoliede masjien geloop het.

TAKTIES
Die grootste stryd was in die S3-klas waar Allan Martin, Wilro Dippenaar en Jaco Redelinghuys mekaar probeer uitoorlê het.
Martin het goed gejaag om sy S3 JP Hydraulics VW Polo behendig deur die draaie te gooi. Ongelukkig het hy reeds Vrydagaand meganiese probleme ondervind en Saterdagmiddag moes hy in sneldeel 10 halt roep toe die enjin gestaak het. Dippenaar het met ’n tyd van 1:17:56 die eerste plek in die S3-klas opgeraap en algeheel eerste geëindig, terwyl Jaco Redelinghuys met sy S3 Toyota Gobabis RunX algeheel tweede en ook tweede in sy klas was (1:18:45).
In die S2-klas het Etienne van der Heever en navigator Willy van Wyk (1800 Toyota RunX), Tinus Malan en navigator Eugene Marais (Atlas Copco 2L Toyota MR2), Jan Everson en navigator Fanie Botes (Seal Consulting Engineers 2L VW Polo) asook Jannie Coetzee en navigator George Coetzee (West Coast Aluminium and Glass, 2L Ford Focus) die pap dik aangemaak.
Vir die ander spanne het sake nie glad verloop nie en die Coetzee-broers is die enigste wat die ongeluksvalbyl vryspring om hul klas in 2:14:50 te wen.
Roland Himmel en navigator Juan Erlank (1.6L Toyota Etios R2) wat die S1-klas in 1:27:53 opgeraap het, het ook die algehele derde plek behaal. In dié klas moes Pieter Greeff en navigator Steven Robinson (Seal Consulting Engineers, 1.6L Toyota Corolla) tevrede wees om bykans vier minute later (1:46:16) tweede klaar te maak.
Die kampioen, Wilro Dippenaar, was agterna beskeie.
“Dit was weerens ’n baie lekker byeenkoms. Ek moet die organiseerders asook my hoofborg Shell V-Power bedank en so ook my ander borge soos PZN Panelbeaters, Fast Sign, 24/7 Recovery en DJ Droopy wat dit vir ons moontlik maak om deel te kan neem.”
Die spanne wat weens meganiese probleme moes onttrek: Jan Everson/Fanie Botes (S2-VW Polo); Allan Martin/Melvin Gouws (S3-VW Polo); Hanré Myburgh/Geon Ellis (S1-VW Polo); Tinus Malan/Eugene Marais (S2-Toyota MR2); WJ Oosthuizen/JJ Oosthuizen (S4-Ford Sapphire); Etienne van der Heever/Willy van Wyk (S2-Toyota RunX); Welmie Kuhn/ST Kuhn (S1-Kuhn Paneelkloppers).