Goeie vooruitsigte vir 'jong' projek

Tanja Bause – Skaars sewe maande gelede het 12 vroue die Otavi Woman in Textile-projek op die been gebring en vandag vaar hulle uitstekend. Eintlik het hulle reeds twee weke ná hulle daarmee begin het, ’n trofee as beste SME by die Otavi-ekspo ingeoes.
Hul stalletjie het ook baie aandag gelok by die onlangse Koperfees op Tsumeb, waar hul produkte soos soetkoek verkoop het.
“Ons maak klere, kussingslope, beddegoed, tradisionele rokke, trourokke en werksklere. Ons maak ook broeke korter en maak verstellings - veral aan uniforms van die Namibiese weermag,” het me. Blondine Tsuses, die projek se opsigter, gesê.
Volgens haar doen hulle ook borduurwerk wat hulle by me. Susann du Toit, ook van Otavi, geleer het.
“Sy het ingekom en ons vir twee weke verniet opgeleiding gegee. Sy doen baie vir die projek en die mense op die dorp. Sy is soos ons eie ma.”
Die vroue werk nie vir ’n salaris nie. Hulle bank die geld wat hulle met hul verkope verdien, en materiaal en ander benodigdhede word vir die projek gekoop. Elke drie maande word ’n deel van die geld gelykop tussen die vroue verdeel.
“By hierdie projek werk ons dat die stof staan. Ons is elke dag vanaf 08:00 tot 17:00 agter ons naaldwerkmasjiene en as die bestellings baie is, dan werk ons langer in die aande en ook op Saterdae om die werk betyds klaar te kry,” het Tsuses.
Die vroue wat by die projek betrokke is, het almal naaldwerk by hulle ma’s en oumas geleer en as hulle iets nie weet nie, dan wys ander vroue hulle hoe.
Die naaldwerkmasjiene en die huur van die perseel is deur die Maatskaplike Voorsorgkommissie (SSC) se UND Trust betaal. Die huur van die gebou is tot volgende jaar Maart vooruitbetaal.
Die vroue wil volgende jaar met ’n klein wassery begin.
“Op Otavi word daar nie so ’n diens gelewer nie en ons sal dit bekostigbaar vir almal op die dorp kan maak. Daar is beslis ’n mark vir só ’n besigheid.”
Volgens Tsuses word die projek baie mooi deur die gemeenskap van Otavi en veral die boere van die omgewing ondersteun. Daaronder tel ’n bestelling vir 1 500 sakkies vir die druiwe wat op die Thonningii-wynplaas geproduseer word.
“Die boere van die omgewing ondersteun ons geweldig. Hulle kom stop hier by die gebou en bring vir ons groente en vleis sodat ons vir onsself kan kos maak.
“Werk kom na niemand toe aangehardloop nie. Jy moet eers self begin en wys dat jy gewillig is om te werk, dan sal goeie dinge volg.”
Volgens Tsuses is al die vroue elke dag op hul pos en dan word gewérk.
“Ek hoef hulle nooit aan te praat nie. Hulle sit nie rond, drink koffie en knoop geselsies aan nie, want hulle weet hoe meer hulle lewer, hoe meer geld sal hulle ontvang,” het Tsuses gesê.