Green kry groen lig vir Eagles

Tielman van LillDie senior Eagles-span sal vanaf einde vandeesweek hul krieketvernuf en veggees teen die Ontluikende Suid-Afrika krieketspan in die Castle Lite-toer op die proef stel.Gerhard Erasmus en sy spanmaats sal van Vrydag af behoorlik deur die besoekers getoets word, eers in drie T20-botsings en daarna drie eendagwedstryde.Pierre de Bruyn, hoofafrigter van die Eagles, het hoofsaaklik sy span behou wat twee weke gelede die Ugandese Kraanvoëls oordonder het. Die enigste byvoeging is die aanvangskolwer Zane Green, wat van ’n plantar fascia-besering (voetligament) herstel het. Green se terugkeer is geen verrassing nie, want as kolwer en paaltjiewagter is hy die afgelope seisoen puik op dreef en hy is ’n belangrike speler vir die Eagles. Die Namibiese groep is van 18 tot 17 spelers verklein, met Michau du Preez en Divan la Cock die twee weglatings.Die SA span word deur Malibongwe Maketa afgerig, bygestaan deur Imraan Khan van die Dolphins as hulpafrigter.Maketa het gesê: “Dit is ’n fantastiese geleentheid vir ons hoëprestasiespelers om hul vernuf ten toon te stel. Vir die bestuur van ons HP-program is dit ’n kans om skouers met dié spelers te skuur en meer van hul behoeftes te leer.“Die Namibiërs was nog altyd ’n mededingende span. Ons het met hulle te doen gekry toe hulle vir die T20-Wêreldbeker wou kwalifiseer. Om teen ’n volsterkte Eagles-span in hul agterplaas te speel, sal ongetwyfeld taai en ’n regte toets vir ons spelers wees. Dit is presies wat ons en die spelers nodig het om na ’n hoër vlak te vorder.”In reaksie op die bekendmaking van die Ontluikende RSA-kombinasie het De Bruyn gesê: “Dit lyk na ’n goeie, belowende jong span wat hulle gekies het en ons sien uit na die 16 spelers se besoek. Hul kolflys is baie sterk en heelwat van die spelers het al provinsiale asook franchisekrieket gespeel.“Die Eagles moet hul vernuf teen sterker teenstanders toets, want dit is die enigste manier hoe ons gaan verbeter. Die ganse reeks teen Uganda was eenvoudig te maklik. As ons kompeterend op internasionale vlak wil wees en met die T20 Wêreldbeker in gedagte, moet die Eagles regtig teen die beste moontlike krag getoets word.“Die teenstand moet van so ’n aard wees dat die Eagles deurgaans onder druk verkeer en dit is al hoe ons spelers beter gaan word, deur uit ondervinding te leer. “Dit sal nie maklik wees nie en die reeks gaan ’n baie taai uitdaging aan ons spelers rig.“Vir my gaan regtig nie oor die uitslag teen die SA span nie, maar wat die Eagles op die veld teen baie sterk opposisie gaan leer. Nie net as ’n span in geheel nie, maar vir elke speler in sy individuele rol op die veld.“Ons sal beslis antwoorde op onbeantwoorde vrae kry en daarvolgens planne beraam. Die manne het hard gewerk en ek glo hulle sal die geleentheid benut.“Ek het maande gelede met onderhandeling begin om die toer te reël en ek wil vir Vincent Barnes, van Suid-Afrika, bedank wat ingestem en dit moontlik gemaak het.”ONTLUIKENDE SA SPANStefan Tait (25 jaar, linkerarmsnelbouler, Oos-Kaap Warriors)Thando Ntini (20, regterarmsnelbouler, Cape Cobras)Grant Roelofsen (24, kolwer, paaltjiewagter, Dolphins)Joshua Richards (22, kolwer, regterarmdraaibalbouler, Highveld Lions)Jonathan Bird (20, topkolwer, linkerarmdraaibalbouler, Cape Cobras)Jason Smith (26, topkolwer, regterarmnaatbouler, Cape Cobras)Tshepo Ntuli (25, regterarmwegbreekbouler, Knights)Kabelo Sekhukhune (23, kolwer, regterarmwegbreekbouler, Oostelikes)Lifa Ntanzi (19, regterarmsnelbouler, Dolphins)Matthew Breetzke (22, kolwer, paaltjiewagter, Warriors)Dayyaan Galiem (24, kolwer, regterarmnaatbouler, Cape Cobras)Bryce Parsons (20, kolwer, linkerarm ortodokse draaier, Gauteng)Sinethemba Qeshile (22, topkolwer, paaltjiewagter, Proteas/Warriors)Wandile Makwetu (22, kolwer, paaltjiewagter, Titans)Gregory Mahlokwana (26, linkerarmdraaibalbouler, Northerns) Delano Potgieter (24, kolwer, regterarmnaatbouler, Gauteng).EAGLES-GROEPGerhard Erasmus (k), Tangeni Lungameni, JP Kotzé, Mauritius Ngupita, JJ Smit, Jan Frylinck, Karl Birkenstock, Ben Shikongo, Bernard Scholtz, Nicol Loftie-Eaton, Craig Williams, Michael van Lingen, Stephen Baard, Dewald Nell, Ruben Trumpelmann, Zane Green, Shaun Fouché.TOERPROGRAMVrydag, Saterdag en Sondag (13:00) by Wanderers: Drie T20-wedstryde. Dinsdag 27 en Donderdag 29 April, asook Saterdag 1 Mei (10:00) by Wanderers: Drie eendagwedstryde.– tielman@republikein.com.na

Green kry groen lig vir Eagles

Kommentaar

Republikein 2025-04-28

Meld asseblief aan om kommentaar te lewer

Green kry groen lig vir Eagles

Kommentaar

Republikein 2025-04-28

Meld asseblief aan om kommentaar te lewer

MELD AAN

Advertensie