Griffons sal geen Welkom-bord uithou

Andrew Poolman - Die Welwitschias staan opnuut voor ’n groot toets om môre met ’n behoorlike vertoning in hul Curriebeker eerste liga wegwedstryd teen die Griffons op Welkom vorendag te kom.
Die Noord-Vrystaters het vroeër dié seisoen vir ’n stukkie onaangename geskiedenis gesorg deur die eerste honderdtal teen ’n senior Namibiese span op die Hage Geingob-stadion te kom aanteken.
Om sake te vererger, is die Welwitschias met 101-0 punteloos gehou (rustyd 54-0).
Afrigter John Williams se wedstrydgroep môre sluit egter altesame 15 spelers in wat reeds toetsrugby vir Namibië gespeel het – plus Hauta Veii wat al toerwedstryde teen Argentinië-A gespeel, asook in toetse op die reserwebank gesit het sonder om opgestuur te word.
Van die genoemde 15 is Johann Wohler ook die enigste wat nie vanjaar die Namibiese toetstrui oor sy kop getrek het nie.
Gevolglik sal dit hierdie keer nie maklik wees om met aanvaarbare verskonings vir ’n wegholtelling vorendag te kom nie.
Madagaskar kan as ’n voorbeeld dien van wat gedoen kan word. Dié span se eerste ontmoeting met Namibië was ’n eensydige loesing van 112-0 in Windhoek. Drie jaar later het hulle in Windhoek met 55-17 verloor en toe Namibië in 2012 vir die eerste keer daar gaan toer, is hy met 57-54 geskok.
Wiskundig het die Welwitschias (een punt) nog ’n kans om die top-vier van die Curriebeker eerste liga te haal, hoewel dit ’n merkwaardige ommeswaai van hul vertonings hierdie seisoen sal kos.
Die Griffons het immers aan die einde van Mei gewys dat hulle klinies genoeg kan speel om die Namibiërs geen kans te gun nie. Voorlangs sal die Welwitschias ’n stewige grondslag vir die aanvalswerk moet lê, terwyl die agterspelers opnuut in die kollig sal wees op aanval en veral die verdediging.
Vir die eerste keer dié seisoen draf die Griffons môre op die veld sonder hul “pocket rocket”, die vlugvoetige klein drieëvraat Selvyn Davids wat ’n boudspier beseer het.
Die Perstruie is onder druk om nie net te wen nie, maar om ’n groot telling aan te teken om te verseker dat hulle na die uitspeelrondte deurdring.
Davids het net twee gedruk uit die Griffons se 15 drieë in Windhoek, met Warren Williams wat ’n driekuns aangeteken het en George Whitehead wat 13 drieë verdoel het.
Davids se plek op heelagter word deur Reinhard Erwee ingeneem, wat in die kwalifiserende ronde nog die Vrystaat Cheetahs se 15-trui teen Namibië gedra het.
Op haker is Khwezi Mkhafu in die plek van Elandré Huggett gekies.
Windhoek Draught Welwitschias: 1 Hauta Veii, 2 Gerhard Lotter, 3 AJ de Klerk (kapt), 4 Denzil van Wyk, 5 Ruan Ludick, 6 Zayne Groenewaldt, 7 Morné Blom, 8 Leneve Damens, 9 Eugene Jantjies, 10 Justin Nel, 11 Phillip Nashikaku, 12 Darryl de la Harpe, 13 Lesley Klim, 14 Gino Wilson, 15 Chrysander Botha.
Reserwes: Petri Burger, Collen Smit, Muniovita Kasiringua, Johann Wohler, Cameron Klassen, Shaun Kaizemi, Malcolm Moore.
Griffons (15-1): Reinhard Erwee; Vuyo Mbotha, Joubert Engelbrecht, Japie Nel, Warren Williams; George Whitehead, Boela Abrahams; De Wet Kruger, Boela Venter, Vince Maruping, Dennis Visser, Gavin Annandale, Gerhard Engelbrecht, Kwhezi Mkhafu, Danie van der Merwe.
Reserwes: Hennie Venter, George Marich, Boela Serfontein, Louis Venter, Duan Pretorius, Tertius Kruger.