Grootste mielie-oes ooit

Elvira HattinghNamibië sal na verwagting vanjaar die grootste mielie-oes in sy geskiedenis hê, met altesaam 94 235 ton mielies wat in beide kommersiële en kommunale gebiede geoes sal word.Die Namibiese Akkerbouraad (NAB) se akkerboubestuurder en markontwikkelaar, me. Loyde Uahengo, het gister aan Republikein bevestig dat hul oesverwagting uit die kommersiële sektor sedert Junie van 74 700 ton mielies na 82 735 ton verhoog het. “Dit is 'n nuwe rekord vir kommersiële produksie en meestal te danke aan verbeterde produksie uit sentrale dele van die land,” het sy gesê.Sy sê die opgedateerde oesskatting is moontlik omdat Namibië nou reeds in die derde maand van sy oesseisoen verkeer.Volgens 'n verslag deur die ministerie van landbou, water en bosbou oor die land se gewas- en voedselsekuriteitsvooruitsigte wat Donderdag aan die media uitgereik is, was die vorige kommersiële rekord in die 2016–'17-seisoen, toe 76 700 ton afgehaal is.Verlede jaar is 51 600 ton mielies geoes, terwyl die langtermyngemiddeld 38 500 ton is. Volgens die verslag is 54% van die mielies in die kommersiële gebied onder besproeiing geproduseer, terwyl die res droëlandproduksie is.Mnr. Gernot Eggert, voorsitter van die Akkerbouprodusentevereniging (APV), stem saam goeie oeste word vanjaar van die kommersiële mielieprodusente in die ooste van die land verwag. Hy het gesê hulle is nog besig met opnames van die werklike oeste.“By Summerdown, Gobabis, Hochveld het hulle fantastiese oeste afgehaal. In die Noorde het enkele produsente baie goed geoes, maar talle het gesukkel met versuiptoestande. Ons het baie reën gehad en nie almal het betyds geplant nie,” het hy gesê. Daar is egter oor groter gebiede geplant, het Eggert bygevoeg. Eggert sê produsente is ook gereed vir die volgende mielieplantseisoen, met veral die feit dat die grond nog vog bevat van die vorige seisoen, wat hulle in 'n baie goeie posisie plaas. “My gevoel is dat baie mielies geplant kan word. Kunsmis het egter 'n faktor geraak – dit het baie duur geword. Dit sal ons koste verhoog,” het hy gesê.KOMMUNALE REKORDKommunale gebiede sal na verwagting vanjaar ook die meeste mielies ooit oes teen 11 500 ton. Dit is 55% méér as wat kommunale gebiede verlede jaar geoes het en ook 77% bó hul langtermyngemiddeld van 6 500 ton. Volgens die verslag is die verbetering veral toe te skryf aan die Zambezistreek wat vanjaar 123% méér mielies as hul langtermyngemiddeld sal oes. Ongelukkig sal die Kavango-Oos- en -Wesstreek na verwagting 30% minder as verlede seisoen en ook 88% minder as hul gemiddeld oes. Die redes wat hiervoor gegee word, is té veel reën, die uitbreking van sprinkane en skade deur muise toe die mieliepitte moes ontkiem. ANDER GEWASSEVerwagtinge vir Namibië se totale graanoes is vanjaar egter 5% minder as verlede jaar, alhoewel dit steeds 26% beter as die langtermyngemiddeld is. Die oesverwagting vir mahangu is 'n geraamde 55 200 ton – sowat 39% minder as verlede seisoen se 90 800 ton en ook 3% minder as die langtermyngemiddeld van 57 000 ton. Die kleiner oes word toegeskryf aan swak reën in die sentrale dele in die noorde van die land, asook die feit dat die reënseisoen hier laat begin het en lang droë tydperke tussen reënneerslae.Die oesverwagting vir sorghum op 8 200 ton is ook 16% méér as verlede seisoen en 21% bó die langtermyngemiddeld. Koring is 'n wintergewas en dus sal oesverwagtinge hiervoor later bekend gemaak word. Die ministerie se Eenheid vir Agro Sake-inligtingsdienste het die tweede naoes-opname vir huishoudelike sekuriteit tussen 10 Mei en 7 Junie vanjaar afgehandel. Die Zambezistreek het verlede jaar ook vir 8% van die mielie-oes gesorg, terwyl die Suide gewoonlik ook mielies produseer, maar verlede jaar die pas makeer het. Namibië verbruik egter jaarliks sowat 154 308 ton mielies en moes in 2020 steeds N$483 miljoen se mielies invoer.– elvira@republikein.com.na

Grootste mielie-oes ooit

Kommentaar

Republikein 2025-04-18

Meld asseblief aan om kommentaar te lewer

Grootste mielie-oes ooit

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie