Hof verbied deportasie van Dukwi-vlugtelinge

Elvira Hattingh - Botswana se hoërhof het Woensdag weer beslis dat dié land se regering nie Dukwi-vlugtelinge na Namibië mag deporteer nie.Dít volg nadat die datum vir hul vrywillige repatriasie uit Botswana op dieselfde dag verstryk het, waarna die vlugtelinge as onwettige immigrante deur Botswana se regering beskou word. Die Dukwi-groep het hulle tot die hoërhof op Lobatse gewend om ‘n interdik teen hul deportasie te kry en sê hulle sal nie terugkeer alvorens hulle die versekering gegee kan word dat geeneen van hulle met hul aankoms in hegtenis geneem sal word nie.Die Namibiese menseregte-aktivis, mnr. Phil ya Nangoloh, het Vrydag aan Republikein bevestig ‘n hofaansoek met die doel om die regering se planne vir die deportering van die vlugtelinte te kantel, het geslaag.Botswana se regering wou ook in 2015 sowat 900 vlugtelinge in die kamp deporteer, toe dié land se hoërhof dit die eerste keer verbied het.Ya Nangoloh het gesê sowat 47 vlugtelinge het aangedui dat hulle vrywillig na Namibië wil terugkeer en minstens 40 van hulle het intussen daad by die woord gevoeg.Op die vraag of die terugkerende vlugtelinge voor die hof gedaag sal word met hul terugkoms, het Nangoloh geantwoord “nie onmiddellik nie”.“Die Namibiese regering se doel is om die ringleiers van die afstigters te kry om terug te keer Namibië toe. Tot dusver is hulle nie onder dié wat vrywillig teruggekeer het nie, en hou hierdie mense nie ‘n groot bedreiging in nie,” het hy geantwoord.AMNESTIE INTERNASIONAAL Die internasionale menseregteorganisasie Amnestie Internasionaal (AI) het ‘n beroep op Botswana se regering gedoen om Caprivi-vlugtelinge nie te dwing om na Namibië terug te keer solank die risiko bestaan dat hulle vervolg gaan word of hul menseregte geskend gaan word nie. Die Verenigde Nasies (VN) se Hoëkommissariaat vir Vlugtelinge (UNHCR) het intussen ook aangekondig hulle gaan ondersteuning in die vorm van kosrantsoene en toegang tot mediese sorg in die Dukwi-kamp staak.“Hierdie mans, vroue en kinders moenie gedwing word om huis toe te gaan as hul persoonlike veiligheid nie gewaarborg kan word nie,” het AI se adjunkdirekteur vir Suider-Afrika, me. Muleya Mwananyanda, Woensdag gesê.“Daar is baie op die spel. As Botswana mense dwing om na Namibië terug te keer waar hul menseregte geskend kan word, sal dié land sy internasionale en nasionale wetlike verpligtinge oortree.”Sowat 900 vlugtelinge, onder wie 400 kinders wat nog nooit in Namibië gewoon het nie, leef reeds vir bykans 20 jaar by die Dukwi-vlugtelingkamp. Dié vlugtelinge word verbind met ’n poging in 1999 om die destydse Caprivistreek van die res van die land af te stig.Botswana se The Voice berig dat spanning tussen die Botswana-regering en die Dukwi-vlugtelinge die afgelope maande toegeneem het en die vlugtelinge onlangs ‘n vergadering met die buurland se minister van verdediging, justisie en sekuriteit, Shaw Kgathi, geboikot het.Kgathi het vantevore gesê die Botswana-regering beskou Namibië as ‘n stabiele, veilige land met regeringsinstansies wat goed funksioneer en gehoor gee aan die oppergesag van die gereg. Namibië se minister van binnelandse sake, mnr. Frans Kapofi, het onlangs aan Namibian Sun gesê planne vir die veilige terugkeer van hierdie vlugtelinge is beraam ent daar saam met die buurland se regering en die UNHCR gewerk word om hul terugkeer op ‘n waardige manier te verseker.VERVOLGING?Alvorens die media berig het dat die Zambezi-goewerneur, mnr. Alufea Sampofu, vroeër die vlugtelinge daarvan verseker het dat hulle Namibiese burgers is en dit hulle dus vrystaan om huis toe te kom, het die minister van justisie intussen aangedui vlugtelinge sal met hul terugkoms rekenskap móét gee.“Wanneer diegene wat vanweë die Caprivi-afstigtingskomplot in 1999 landuit gevlug het, na Namibië terugkeer, sal hulle voor die gereg gebring word om hul skuld of onskuld te bewys.” Só het die minister van justisie, mnr. Sacky Shanghala, in April vanjaar in die Nasionale Vergadering (NV) geantwoord op 'n mondelinge vraag van die president van die Popular Democratic Movement (PDM) en leier van die amptelike opposisie, mnr. McHenry Venaani.Die Namibiese polisie en die prokureur-generaal, dr. Albert Kawana, het ook vroeër vandeesweek gesê die regering neem sterk standpunt in teen afstigting van enige deel van Namibië.Namibiërs het na Botswana gevlug nadat ‘n gewapende konflik in Augustus 1999 in die destydse Caprivi tussen die Caprivi Liberation Army (CLA) en die Namibiese regering uitgebreek het. Op 2 Augustus het die CLA 'n aanval op Katima Mulilo geloods, die staatsradiostasie en 'n polisiestasie beset, en die Wanella-grenspos en ‘n weermagbasis aangeval. Namibiese gewapende magte het binne ‘n paar dae dié poging tot afstigting gestuit.

Hof verbied deportasie van Dukwi-vlugtelinge

Kommentaar

Republikein 2025-01-13

Meld asseblief aan om kommentaar te lewer

Hof verbied deportasie van Dukwi-vlugtelinge

Kommentaar

Republikein 2025-01-13

Meld asseblief aan om kommentaar te lewer

MELD AAN

Advertensie