Hond voor baas geskiet

Tanja Bause’n Veiligheidswag het Saterdagmiddag ’n hond langs haar eienaar doodgeskiet. Die voorval het by die Nautilus-woonbuurt op Lüderitz gebeur.Me. Cerenity de Klerk was besig om klere op te hang toe die man by haar erf verbygeloop het. “My pitbull-reun (2) en tien maande oue pitbull-teef, Phoebe, het geblaf en na hom toe gehardloop. Die agterkant van ons erf het nie ’n heining op nie en ek het agter hulle aangehardloop en vir hom geskree hy moet niks doen nie, hulle sal nie byt nie en is skadeloos. Die reun het omgedraai en terug na my toe gekom, maar die teef het aangehou om te blaf en die man het sy vuurwapen uitgeruk en geskree hy sal haar skiet. Toe ek langs haar staan, het hy haar doodgeskiet.” De Klerk sê daar was baie klippe wat hy na haar kon gooi as hy vir sy lewe gevrees het. Hy het ook stewels aangehad; hy kon haar skop as hy wou. “Almal in die woonbuurt ken my honde en weet hulle is nie aggressief nie. Hulle het nog nooit iemand gebyt nie. Hy beweer sy lewe was in gevaar. Dis absolute snert. Ek vra jou, ’n volwasse man se lewe is in gevaar van ’n tien maande oue teef wat daarby nog swanger is? Ek het nie woorde nie. Ek kan nie beskryf hoe ek voel nie. Phoebe was nie net ’n hond nie, sy was my baba. Ek het onlangs ’n miskraam gehad en nou kom dié man en vat ook nog my baba voor my oë weg.” Volgens De Klerk het sy langs Phoebe gestaan en was hulle sowat vyf tree van die man toe hy die skoot afgevuur het. Die De Klerk-egpaar wou ’n klag by die polisie aanhangig maak, maar volgens die polisiebeamptes was die krag af en hulle kon nie ’n klag lê nieHulle het wel later terug na die polisiekantoor gegaan en ’n klag van poging tot moord en dieremishandeling aanhangig gemaak. De Klerk sê die man beweer Phoebe het hom gebyt, wat onwaar is omdat sy die hele tyd vir hom gekyk het. Hy het glo ook nie enige bytmerke gehad nie.Die wag beweer ook die hond het hom agtervolg terwyl hy weggehardloop het.“Dis weer eens snert, omdat ek die hele tyd vir haar gekyk en langs haar gestaan het toe hy haar geskiet het.” Die veiligheidsonderneming waar die man in diens is, sê die vuurwapen is die wag se persoonlike eiendom aangesien hulle geen vuurwapens aan hul personeel uitreik nie. “Geen amptelike klag is by ons kantoor teen die verdagte aangemeld nie en daarsonder kan ons nie ’n interne ondersoek van stapel stuur nie,” het die toesighouer van die maatskappy gesê. Die koördineerder van misdaadondersoeke in die ||Kharasstreek, adj.komm. Crispin Mubebo, sê dit is onwettig om ’n vuurwapen in ’n munisipale gebied af te vuur. “’n Saak van dieremishandeling, die afvuur van ’n vuurwapen in ’n munisipale gebied en die doelbewuste beskadiging van eiendom, is teen die man aanhangig gemaak. Hy is nie in hegtenis geneem nie, omdat die man beweer hy het uit selfverdediging opgetree. Die ondersoek duur nog voort,” het Mubebo gesê. – tanja@republikein.com.na

Hond voor baas geskiet

Kommentaar

Republikein 2025-04-07

Meld asseblief aan om kommentaar te lewer

Hond voor baas geskiet

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie