Hoër onderwys trek die gordel styf

Augetto Graig - Die ministerie van hoër onderwys, opleiding en vernuwing se begroting kan met 40% gesny word. Die minister, dr. Itah Kandjii-Murangi, het gister aan die pers gesê haar ministerie se begroting kan met N$1,5 miljard verminder word.“In daardie geval sal die ministerie gedwing word om moeilike besluite te neem. Sekere projekte sal gestaak moet word,” het sy gewaarsku. Volgens Kandjii-Murangi is die situasie nog houdbaar.Sy beplan om vanjaar nóg twee tegniese opleidingsentrums te bou – een op Khorixas en een in Omuthiya. Kandjii-Murangi wil so 'n sentrum ook in die Hardapstreek laat bou, maar of dit moontlik is, is nog nie finaal besluit nie.Een finansieringsbron wat lyk of dit nie gou gaan opdroog nie, is die VET-heffing wat besighede moet betaal om werkerkwalifikasies te verbeter. Teen die einde van 2016 het 2 703 werkgewers sowat N$809 miljoen aan VET-heffings betaal. Besighede wat kan bewys dat hul werknemers opleiding ontvang, kan tot 50% van dié bedrag terugeis. Nog 35% van die geld word aan tegniese opleiding en beroepsonderwys bestee, terwyl die res na die nasionale opleidingsowerheid (NTA) gaan.Die minister het die versekering gegee dat finansiële hulp vir studente steeds deur die Finansiële Hulpfonds vir Namibiese Studente (NSFAF) beskikbaar sal wees. “Ten spyte van die ekonomiese las is ons ministerie vasbeslote om finansiële steun aan studente te verskaf wat dit nodig het,” het sy gesê. Sy verwag ook dat daar al meer behoeftige studente sal wees.VORDERINGKandjii-Murangi het genoem dat vordering met tegniese opleiding en beroepsonderwys hoogtepunte van 2016 was. 'n VTC is in Eenhana teen N$25,2 miljoen gebou, en nog een in Rundu teen N$45 miljoen. Die minister het gesê N$140 miljoen is bestee aan die diens van 'n erf wat deur die Omaheke-streeksgoewerneur vir die bou van 'n tegniese opleidingsentrum opsy gesit is. Volgens haar is 58 vakkenners verlede jaar gesertifiseer, terwyl 57 nuwe private opleidingsentrums goedgekeur is. Die raad vir standaarde, assessering en sertifikasie het ook 128 vakkenners geregistreer, sê sy. Landbou is ook nou op die nasionale kwalifikasieraamwerk geregistreer. AKKREDITERINGDie ministerie is hard aan die werk om 'n sentrum vir uitnemendheid in beroepsonderwys en tegniese opleiding op te rig. Terselfdertyd sal die Namibiese universiteit van wetenskap en tegnologie (NUST) se tegnologiese beroepsonderwys en tegniese opleidingseenheid in 'n fakulteit omskep word. Verlede jaar is 13 van NUST en 13 van Unam se programme ook hersien en geakkrediteer. Ses nuwe privaatinstansies vir hoër onderwys is geregistreer en 35 opvoeders aan universiteite is bygestaan om hul kwalifikasies te verbeter.

Hoër onderwys trek die gordel styf

Kommentaar

Republikein 2025-04-24

Meld asseblief aan om kommentaar te lewer

Hoër onderwys trek die gordel styf

Kommentaar

Republikein 2025-04-24

Meld asseblief aan om kommentaar te lewer

MELD AAN

Advertensie