Hoër rentekoers onwaarskynlik, meen ekonome

Hanlie Stadler - Die Suid-Afrikaanse Reserwebank gaan na alle waarskynlikheid môre die rentekoers onveranderd laat.Van belang is egter nie soseer wát die Reserwebank gaan sê nie, maar hóé.Peter Attard Montalto, ontleder van Nomura, tel onder die meerderheid ontleders wat nie tans ’n rentekoersverhoging verwag nie. Hy sê egter hy verwag dat die Reserwebank klem gaan lê daarop dat hy steeds in ’n rentekoersverhogingsiklus is. Dis iets wat die mark op die oomblik “nie wil aanvaar nie”, sê Montalto, en baie ontleders begin praat daarvan dat die stygings verby is of dat laer rentekoerse selfs oorweeg moet word.“Ons ervaar ’n mate van frustrasie in die instelling … (weens) misverstande en misinterpretasie van toesprake as duifagtig wanneer hulle eintlik neutraal of effens valkagtig was. Die Reserwebank het Donderdag die geleentheid om dié probleme reg te stel.”Montalto sê die Reserwebank sal heel moontlik baie klem lê daarop dat hy tot 18 maande vooruit kyk na inflasie en dat daar baie interne en eksterne risiko’s is wat die rand kan laat verswak en inflasie kan laat handuit ruk. Dit sluit in politieke onstuimigheid, hoër rentekoerse in die VSA, die Amerikaanse presidentsverkiesing, China se ekonomiese groei en die besluit van die kredietgradeerders later vanjaar.BarometerVolgens Nedbank se tweemaandelikse rentekoersbarometer is die kans 70% dat die plaaslike rentekoers onveranderd sal bly. Die barometer weeg 13 ekonomiese faktore op wat ’n impak kan hê op die Reserwebank se besluit en nege van die faktore dui tans daarop dat die rentekoers onveranderd moet bly. Mohammed Nalla en Reezwana Sumad van Nedbank se korporatiewe en beleggingsbank sê skerp stygende kospryse en die verwagting dat inflasie steeds gaan styg, is die enigste twee moontlike redes waarom die Reserwebank Donderdag moontlik die rentekoers sal verhoog. Dié kans word egter as net 17% beskou. “Die Reserwebank sal na ons mening waarskynlik herhaal dat dit net ’n pouse in ’n verhogingsiklus is,” sê Nalla en Sumad in die ontleding van die barometer.Inflasieverwagtinge word as belangrik beskou omdat dit ’n selfvervullende profesie is: As vakbonde byvoorbeeld hoër inflasie verwag, eis hulle hoër loonskikkings, wat dan tot inderdaad tot hoër inflasie lei. Eweneens verreken baie maatskappye inflasievooruitsigte wanneer hulle die prys van goedere en dienste vasstel.Die swak aanbod (soos gewys deur mynbou- en vervaardigingsproduksie vir Julie) en trae vraag (soos gewys deur trae kleinhandelverkope) is die enigste twee faktore wat ’n rentekoersverlaging regverdig, maar die kans dat dít gebeur, word as baie laag (slegs 13%) beskou.“Die vooruitsig (vir mynbou en vervaardiging) bly droewig. Hoewel uitvoer vir die grootste deel van die jaar positief was, sal dit na verwagting begin verander soos wat die vraag taan,” sê die ontleders, met verwysing na sowel plaaslike as internasionale vraag.Nalla en Sumad verwag dat die Reserwebank sy inflasieverwagting vir 2016 en 2017 effens afwaarts sal aanpas in die lig van die sterker rand die afgelope ruk (vergeleke met die eerste helfte van die jaar).Die Reserwebank se voorspelling in Julie was 6,6% vir 2016 en 6% vir 2017. Nedbank self het sy verwagting verlaag tot ’n gemiddelde 6,2% vir 2016 en 5,7% vir 2017.Nedbank verwag ’n hoogtepunt van 6,2% in die vierde kwartaal van die jaar, vergeleke met hul vorige voorspelling van 6,8% en die Reserwebank se Julie-voorspelling van 7,1%.Volgens die ontleders is net ’n derde van die totale inflasiemandjie nou bo 6%, vergeleke met 88% in Februarie. Die prys van groente en graan bly in dubbelsyfers en algehele kosprysinflasie was in Julie 11,3%. Volgens Nedbank is die prys van witmielies 25% goedkoper as in Julie, die vorige keer toe die Reserwebank oor rentekoerse besluit het, maar dis steeds 25% meer as ’n jaar gelede.RandWat die rand betref, bereken Nedbank dat die rand met 1,95% teenoor die dollar versterk het sedert die Reserwebank se vorige rentekoersbesluit. Die rand het egter in ’n breë band van R13,28 tot R14,72 per dollar verhandel.“Die vooruitsig vir die rand bly uiters onseker. Gegewe die sterk moontlikheid van verdere politieke onstuimigheid en volgehoue kommer oor verdere moontlike afgraderings van Suid-Afrika se soewereine risikogradering, verwag ons ’n swakker neiging later in die jaar.”Lesetja Kganyago, president van die Reserwebank, het onlangs gesê die rand is op die oomblik die grootste risiko vir inflasie. - Netwerk24

Hoër rentekoers onwaarskynlik, meen ekonome

Kommentaar

Republikein 2025-04-29

Meld asseblief aan om kommentaar te lewer

Hoër rentekoers onwaarskynlik, meen ekonome

Kommentaar

Republikein 2025-04-29

Meld asseblief aan om kommentaar te lewer

MELD AAN

Advertensie