Hoërhof staan weens Covid-19 tot 15:00 stil

Denver Kisting – Die griffier van die hoërhof, me. Elsie Schickerling, het vanoggend in ’n interne skrywe gesê alle hoërhofsake wat vandag op die rol is, word uitgestel tot 15:00.
Dit geld vir die Windhoek-hoërhof en die een op Oshakati, sê sy.
Regters moet dié aankondiging vanoggend in die hof maak, lui die brief.
Schickerling sê regter-president Petrus Damaseb sal voor 15:00 ’n aankondiging maak oor die weg vorentoe.
Bemiddelings wat tussen vandag en 27 Maart geskeduleer was, word gekanselleer, sê die griffier.
Sy sê ’n personeelvergadering is vir 16:00 vandag belê waar meer inligting na verwagting gedeel sal word.
Dié maatreëls volg nadat twee gevalle van Covid-19 die afgelope naweek in Namibië bevestig is.
Mnr. Ockert Jansen, die woordvoerder van die regbank, het die egtheid van die brief by navraag bevestig.
[email protected]