Hospitaal op Swakop brei uit
'n Neonatale saal en nuwe akkommodasie vir jong ma's ter waarde van N$27 miljoen word by die staatshospitaal op Swakopmund opgerig en behoort teen Februarie 2022 voltooi te wees.
Erwin Leuschner
“Die geriewe gaan 'n reuseverskil in die Erongostreek maak, veral in terme van die kanse op oorlewing van pasgebore babas. Dit het veral betrekking op vroeggebore babas wat sonder spesiale behandeling hoërisikogevalle is,” sê die eerste minister, me. Saara Kuugongelwa-Amadhila.
Sy was Vrydag aan die woord tydens die simboliese begin van konstruksie van 'n moderne neonatale saal by die staatshospitaal op Swakopmund. Die nuwe geriewe sal 28 beddens huisves, insluitend 12 standaardbeddens, ses vir spesiale sorg, ses vir intensiewe sorg en vier vir isolasie.
Dit sal ook doktersgeriewe en bystandkamers akkommodeer, terwyl 'n nuwe kraameenheid met 12 beddens ook opgerig word.
Volgens Kuugongelwa-Amadhila bevorder die beplande geriewe die smee van 'n band tussen ma en baba, sowel as borsvoeding.
“Die regering het nie net aan die konstruksie van die geriewe gedink nie, maar ook aan poste vir pediaters en ander spesialisposte wat nodig sal wees en binnekort geadverteer sal word,” het sy gesê.
Die kraamsaal op Swakopmund het tans net 26 beddens en vier broeikaste vir pasgebore babas.
“Vir baie jare was die enigste intensiewesorgeenheid vir pasgebore babas in Windhoek. Met die nuwe geriewe op Swakopmund kan dié babas nou ook hier geakkommodeer word en sal die hele Erongostreek bedien.”
Volgens Kuugongelwa-Amadhila is gesondheid 'n regeringsprioriteit, met verskeie soortgelyke projekte wat oraloor die land voltooi is. Dit sluit 'n nuwe kliniek op Arandis in wat in 2018 gebou is en 'n nuwe kliniek op Utuseb langs die Kuisebrivier wat amptelik in Februarie ingewy is. Albei die geriewe kos meer as N$30 miljoen.
– [email protected]
“Die geriewe gaan 'n reuseverskil in die Erongostreek maak, veral in terme van die kanse op oorlewing van pasgebore babas. Dit het veral betrekking op vroeggebore babas wat sonder spesiale behandeling hoërisikogevalle is,” sê die eerste minister, me. Saara Kuugongelwa-Amadhila.
Sy was Vrydag aan die woord tydens die simboliese begin van konstruksie van 'n moderne neonatale saal by die staatshospitaal op Swakopmund. Die nuwe geriewe sal 28 beddens huisves, insluitend 12 standaardbeddens, ses vir spesiale sorg, ses vir intensiewe sorg en vier vir isolasie.
Dit sal ook doktersgeriewe en bystandkamers akkommodeer, terwyl 'n nuwe kraameenheid met 12 beddens ook opgerig word.
Volgens Kuugongelwa-Amadhila bevorder die beplande geriewe die smee van 'n band tussen ma en baba, sowel as borsvoeding.
“Die regering het nie net aan die konstruksie van die geriewe gedink nie, maar ook aan poste vir pediaters en ander spesialisposte wat nodig sal wees en binnekort geadverteer sal word,” het sy gesê.
Die kraamsaal op Swakopmund het tans net 26 beddens en vier broeikaste vir pasgebore babas.
“Vir baie jare was die enigste intensiewesorgeenheid vir pasgebore babas in Windhoek. Met die nuwe geriewe op Swakopmund kan dié babas nou ook hier geakkommodeer word en sal die hele Erongostreek bedien.”
Volgens Kuugongelwa-Amadhila is gesondheid 'n regeringsprioriteit, met verskeie soortgelyke projekte wat oraloor die land voltooi is. Dit sluit 'n nuwe kliniek op Arandis in wat in 2018 gebou is en 'n nuwe kliniek op Utuseb langs die Kuisebrivier wat amptelik in Februarie ingewy is. Albei die geriewe kos meer as N$30 miljoen.
– [email protected]
Kommentaar
Republikein
Geen kommentaar is op hierdie artikel gelaat nie