Houtskool: Meeste produsente tree reg op

Ronelle Rademeyer - Die skuld vir die magdom veldbrande wat die afgelope ses maande in veral die noordelike, oostelike en sentrale dele van die land voorkom, word verkeerdelik voor die deur van geregistreerde houtskoolprodusente gelê, sê die uitvoerende hoof van die Namibiese Houtskoolvereniging (NCA), mnr. Michael Degé.Hy sê algemene nalatigheid op plase deur byvoorbeeld nie voorsorg te tref wanneer tuinvullis verbrand word nie, asook die optrede van boere op hervestigingsplase wat nie die NCA se reëls en regulasies vir veilige houtskoolproduksie nakom nie, is die groot sondaars.“Ek wil die NCA se kant van die saak stel, want die siening oor wie vir veldbrande verantwoordelik is, is nie objektief nie,” sê hy en voeg by die oorgrote meerderheid van lede volg die regte prosedures wanneer hulle houtskool maak.“Die departement van bosbou (in die ministerie van die omgewing, bosbou en toerisme) is tans besig met ’n landswye opname na die oorsaak van die veldbrande. Dit is ongelukkig laat in die seisoen daarvoor; hulle moes dit van die begin af gedoen het, want nie alle veldbrande is aangemeld nie,” sê Degé.Hy sê ’n ondersoek deur die Namibië Landbou-unie (NLU) toon dat nalatige houtskoolproduksie op hervestigingsplase ’n groot oorsaak is.Republikein het vroeër berig dat wyle mnr. Chris Coetzee keer op keer die ontstaan van veldbrande op die Queen Sofia-hervestigingsplaas uit sy vliegtuig waargeneem het. Hy het twee weke gelede verongeluk toe hy die soveelste moniteringsvlug oor die gebied tussen Outjo en Otavi onderneem het waar daar sedert September voortdurend veldbrande was.Degé wys daarop dat sosiale media ook in baie gevalle tot verkeerde persepsies oor veldbrande en die skuldige partye bydra. “In 2011 was daar meer veldbrande as vanjaar, maar die rol van sosiale media (soos WhatsApp-groepe) in die verspreiding van nuus daaroor, was nog nie so groot soos nou nie,” sê hy.Die departement van bosbou skort die houtskoolpermitte op van plase wat by hulle aangemeld word. As hulle vind dat houtskool onwettig vervaardig word, word alle toerusting, hout en houtskool gekonfiskeer en die houtskoolprodusent beboet, sê Degé. “Ons doen dus ’n beroep op boere om plase wat nie die reëls en regulasies volg nie – en veral in die afwesigheid van brandstroke – by die naaste bosboukantoor aan te meld. Ons versoek dat die inligting ook na die NCA gestuur word sodat dit opgevolg kan word,” het hy in ’n verklaring oor dié vereniging se standpunt gesê.“Ons kan rapporteer dat die meerderheid van ons lede die korrekte prosedures vir die vervaardiging van houtskool volg en dat dit ’n klein minderheid is wat die hele bedryf in gevaar stel,” sê hy.Intussen het die kabinet opdrag gegee die ministerie van die omgewing, bosbou en toerisme moet ook ’n opname doen van die toerusting wat nodig is om veldbrande volhoubaar te bestuur, en dit met die Omgewingsbeleggingsfonds (IEF) se hulp aanskaf.Dit volg nadat die minister, mnr. Pohamba Shifeta, op 13 Oktober ’n verslag oor die veldbrande aan die kabinet voorgelê het. Daarin sê hy die veldbrande in die Etosha Nasionale Park was grootliks beplan en maak deel uit van die bewaringbestuursplan.Die kabinet het ook opdrag gegee dat die ministerie samewerking met ander regeringsinstansies, streekrade, tradisionele owerhede en die private sektor, insluitend die landbou-unies en boereverenigings, verstewig sodat veldbrande beter bestry kan word. –ronelle@republikein.com.naKASSIEDordabis brand weerElvira Hattingh - Boere en vrywilligers het vanaf Dinsdagmiddag ‘n reuseveldbrand in die Dordabis-omgewing bestry.Een persoon is Dinsdag in die brand beseer terwyl nog vyf brandbestryders in ‘n stadium deur die vuur vasgekeer was, maar later kon ontsnap.Die brand het Dinsdagnag voortgewoed en in die rigting van die plase Waldburg en Stolzenfeld beweeg. Dit is aangedryf deur ‘n sterk suidewind. Tóé het dit reeds op die plase Brack Wes, Tsatsachas, Elisenhöhe en Langbeen gebrand. Die vuur het ook oor die C23-grootpad gespring.Die wind het talle kere van rigting verander en brandbestryders uitoorlê, wat laatnag reeds baie “moeg en moedeloos” was.Teen Woensdagoggend was die brand op die plaas Langbeen onder beheer, maar het ‘n groot vuur op die gemeenskaplike grense van die plase Elisenhöhe, Stolzenfeld en Koanus gewoed. Die gebied is deur brandbestryders as “moeilik begaanbaar met baie bosse” beskryf en wat slegs deur 4x4-voertuie aangedurf behoort te word.Woensdagaand is berig dat groot skade aangerig is op die plase van die Russiese miljardêr, mnr. Rashid Sardarov.Die veldbrande in dié omgewing was teen gister onder beheer.

Houtskool: Meeste produsente tree reg op

Kommentaar

Republikein 2025-04-18

Meld asseblief aan om kommentaar te lewer

Houtskool: Meeste produsente tree reg op

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie