Huishulp vir sielkundige waarneming gestuur

Ellanie Smit

Die 26-jarige huishulp wat wat in hegtenis geneem is nadat sy glo haar pasgebore baba vermoor en die lykie vermink het, is vir geesteswaarneming gestuur.

Me. Yoolokeni Haipinge het gister haar eerste verskyning in die landdroshof in Katutura gemaak.

Sy staan tereg op aanklagte van aborsie, moord, regsverydeling en die skending van ’n lyk.

Volgens staatsaanklaer Victoria Likius is die saak tot 14 Januarie volgende jaar uitgestel vir verdere ondersoek, die voltooiing van ‘n geesteswaarnemingsverslag en vir die beskuldigde om toegang tot regshulp te verkry.

Geen borgtog is toegestaan nie en Haipinge bly in aanhouding.

Die beskuldigde het voor landdros Olivia van der Colff verskyn.

Sy is Maandag in hegtenis geneem ná die voorval wat tussen Saterdag en Sondag in Rocky Crest plaasgevind het.

Haipinge het na bewering geboorte geskenk in ‘n bad in die huis waar sy as ’n huishulp werk.

Sy het toe glo die baba in plastieksakke toegedraai en die lykie in ‘n kas in haar slaapkamer versteek, het die nasionale polisiewoordvoerder, adj.komm. Kauna Shikwambi, gesê.

“Ná ‘n tyd het sy na bewering die plastieksakke verwyder, die baba se lyfie oopgesny, die ingewande verwyder en dit in ‘n asdrom gegooi.”

Volgens Shikwambi het die huiseienaar Maandag ‘n slegte reuk in die huis opgemerk. Sy het die huishulp se kamer deursoek en na bewering op die plastieksak met die oopgesnyde lykie, wat besig was om te ontbind, afgekom. Polisiebeamptes het later die ingewande in ‘n asdrom gevind.

Shikwaambi het gesê hierdie tipe voorvalle is ’n groot terugslag vir hul pogings om geslagsgeweld te bekamp.

“Almal verdien om vry van geweld te leef. Wanneer sal dit einde kry?”