Hupstoot vir individue se ambisie

Die Namibiese Nasionale Olimpiese Komitee (NNOK) het gister die name van altesame 16 belwonde jong sportmanne en -vroue aangekondig aan wie beurse toegeken is met die oog op voorbereiding vir die 2020 Tokio Olimpiese Spele en die 2018 Olimpiese Jeugspele.

Beurse is toegeken aan nege juniors wat aanspraakmakers is om vir die 2018 Olimpiese Jeugspele te kwalifiseer, terwyl ook vir sewe seniors voorsiening gemaak word om by hoëprestasie fasiliteite te gaan oefen in hul strewe om vir die 202 Olimpiese Spele in Tokio te kwalifiseer.

Die sportkodes wie se atlete ter sprake is, is atletiek, boks, boogskiet, fietsry, perdesport, gimnastiek, roei, stoei, swem en triathlon.

Die geldwaarde van die beurse om vir Tokio 2020 te kwalifiseer, beloop US$715 per maand (nagenoeg N$10 000) per atleet. Vir elke junior atleet is US$5 500 (sowat N$76 500) opsy gesit om kwalifisering vir die Olimpiese Jeugspele te verseker.

Atlete is geïdentifiseer op grond van die internasionale kriteria wat deur Olimpiese Solidariteit gestel word vir die toekenning van beurse aan individuele atlete wat op internasionale vlak in ’n Olimpiese somersport deelneem.

Die kriteria sluit in dat die atlete hul tegniese vernuf en potensiaal bewys om vir die 2020 Olimpiese Spele in Tokio te kwalifiseer. Kandidate moet ook aan die standaarde van sportetiek voldoen, soos deur die Olimpiese handves en die Internasionale Olimpiese Komitee vasgestel. Hulle moet die wêreldkode teen verbode middels eerbiedig en mag geen skuldigbevinding aan ’n opkikkeroortreding op hul rekord hê nie.

Die sestien uitsoekatlete moet inderdaad die NNOK op die hoogte van enige reisreëlings hou, omdat atlete te enige tyd beskikbaar moet wees vir opkikkertoetse wat nie vooraf bekend gemaak word.

Die NNOK se sekretaris-generaal, me. Joan Smit, het verklaar dat dié beheerliggaam elke atleet se vordering en uitslae noukeurig sal monitor en dat elkeen se geskiktheid vir die program onder die vergrootglass bly.

“Soos wat Olimpiese Solidariteit vereis, moet die NNOK kwartaalliks verslag lewer oor elke atleet se vordering en hul kanse om vir Tokio 2020 te kwalifiseer,” sê Smit.

Atlete word toegelaat om die beursgeld te gebruik vir betalings van oefenfasiliteite of afsprake met afrigters wat in hul sport spesialiseer. Gereelde mediese en sportwetenskaplike bystand, verblyfkoste, versekering teen ongelukke en siekte, sakgeld en beperkte reiskoste om aan die relevante Olimpiese kwalifiserende byeenkomste deel te neem, is van die ander toegelate uitgawes.

Die beursprogram het amptelik op 1 September vanjaar in werking getree en sal net periodiek hernu word, op voorwaarde dat die atlete wel die kwalifisering vir Tokio 2020 behaal.

Die drie groot internasionale multi-sportbyeenkomste in 2018 is die Statebondspele by Gold Coast in Australië (4 tot 15 April), die Afrika Jeugspele in Algiers (17 tot 27 Julie) en die Olimpiese Jeugspele in Buenos Aires (6 tot 18 Oktober).

Die lys ontvangers van beurse is die volgende atlete:

VIR TOKIO 2020 OLIMPIESE SPELE

Maike Diekmann (23 jaar), roei.

Jonas Junias Jonas (24 jaar), boks.

Matias Hamunyela (25 jaar), boks.

Tristan de Lange (20 jaar), fietsry.

Jean-Paul Burger (21 jaar), triathlon.

Nestori Thomas (20 jaar), boks.

Tryagain Ndevelo (18 jaar), boks.

VIR 2018 OLIMPIESE JEUGSPELE

Adriaan Grobler (17 jaar), boogskiet.

Sadé de Sousa (17 jaar), atletiek.

Ivan Danny Geldenhuys (16 jaar), atletiek.

Alexander Miller (17 jaar), fietsry.

Nadine Flemming (17 jaar), perdesport.

Lance Potgieter (16 jaar), gimnastiek.

Heleni Stergiadis (16 jaar), swem.

Ronan Wantenaar (16 jaar), swem.

Hafeni Asino (16 jaar), stoei.