Intelligensiediens sleep weekblad hof toe

Ronelle RademeyerDie Sentrale Intelligensiediens van Namibië (NCIS) het gister 'n dringende aansoek by die hoërhof ingedien vir 'n interdik teen The Patriot wat dié weekblad verbied om geheime inligting oor eiendomme in sy besit te publiseer.Dit volg nadat die redakteur, mnr. Mathias Haufiku, die direkteur van die NCIS, mnr. Ben Likando, vroeër die week in 'n teksboodskap in kennis gestel het dat die koerant voornemens is om in sy uitgawe vandag 'n berig oor hierdie eiendomme te publiseer. Hy het Likando ingelig dat hy hom nie telefonies in die hande kry nie en graag sekere vrae in dié verband aan hom wil rig.'sensitiewe inligting'Me. Hilda Namandjebo-Basson, uitgewer van dié koerant, het gister by hof A in die hoërhof in Windhoek aan Republikein gesê The Patriot is om 11:27 in kennis gestel dat 'n dringende aansoek om die publikasie van die berig te verbied, om 14:00 aangehoor sal word. Mnr. Philemon Malima, direkteur-generaal van die NCIS, sê in sy gefundeerde eedsverklaring die inligting wat Haufiku in sy teksboodskap gesê het die koerant gaan publiseer “is sensitiewe en/of geklassifiseerde inligting en die onwettige besit, verspreiding en publisering daarvan word deur die wet verbied”. Hy sê verder volgens artikel 16 van die Namibië Sentrale Intelligensiedienswet van 1997 kan die publisering van dié inligting strafregtelike gevolge hê.'waarheid oor plase'Vanweë die geheime aard van die inligting brei hy nie in die hofstukke uit oor die eiendomme en bates waaroor The Patriot wil berig nie.Dit blyk wel dat die eiendomme verband hou met die vereniging van voormalige lede van die NCIS, oftewel oudspioene.Die politieke aktivis mnr. Job Amupanda het vroeër gister die volgende op sosiale media geplaas: “Die intelligensie het 'n dringende aansoek gebring om 'n vreeslose joernalis, Mathias Haufiku, te verbied om die waarheid oor die plase wat hulle gekoop het, te publiseer. Die regime wil in die geheim sake doen. Maar die waarheid is soos room in 'n glas met melk!”Malima voer in sy eedsverklaring aan “die kuns en praktyke van die intelligensieberoep word in ooreenstemming met beoefende handelspraktyke gedoen” en sê hierdie gevestigde protokolle en praktyke van geheimhouding is nodig vir die uitvoering van enige intelligensiediens se funksies.“Indien die respondente toegelaat word om inligting oor die eiendomme en bates te publiseer, sal daar nie meer enige element van geheimhouding wees nie en dit maak die benutting van hierdie eiendomme en bates waardeloos,” sê hy.Ná 'n vergadering in kamers met regter Harald Geier het die regsverteenwoordigers van die partye ooreengekom dat die verhoor tot volgende Vrydag uitgestel word. Die respondente, wat Haufiku, Basson-Namandjebo en The Patriot is, moet teen Maandag hul beantwoordende eedsverklarings by die hof indien.nie gepubliseerVerder het hulle ook ingestem om nie in hul uitgawe van vandag 'n berig oor die eiendomme te publiseer nie. Die NCIS en die regering is deur adv. Dennis Khama en die staatsprokureur, mnr. Mathias Kashindi, verteenwoordig, terwyl die menseregteprokureur, mnr. Norman Tjombe, namens die respondente optree.

Intelligensiediens sleep weekblad hof toe

Kommentaar

Republikein 2025-04-21

Meld asseblief aan om kommentaar te lewer

Intelligensiediens sleep weekblad hof toe

Kommentaar

Republikein 2025-04-21

Meld asseblief aan om kommentaar te lewer

MELD AAN

Advertensie