‘Interdik mag nie korrupsie toesmeer’

Ronelle Rademeyer - Die inligting waaroor die weekblad The Patriot wil berig, is anders as wat die Sentrale Intelligensiediens van Namibië (NCIS) en die regering aanvoer, nié geheime inligting soos deur die wet op dié instelling omskryf word nie.

Dit het te doen met die aankoop van plase en ’n eiendom in Windhoek-Wes waarvan die titelaktes vrylik by die aktekantoor beskikbaar is.

Die twee plase, beide in die Otjozondjupastreek, is in 2015 vir onderskeidelik N$40 miljoen en N$17 miljoen gekoop en vir die huis in Windhoek-Wes het die regering N$8,2 miljoen opgedok.

Verder is die vereniging van oudspioene, wat na bewering die eiendomme vir die private gebruik van sy lede en hul families beskikbaar stel, nie deel van die NCIS nie en gevolglik nie aan sy wetgewing onderhewig nie.

Dit blyk ook dat die Intelligensiediens by twee geleenthede staatsgeld ter waarde van N$1,1 miljoen aan hierdie private vereniging oorbetaal het.

Só het mnr. Norman Tjombe Vrydag namens die koerant en sy redakteur, mnr. Mathias Haufiku, in die hoërhof in Windhoek betoog.

Groot belangstelling heers in die saak waarin die land se spioenasiediens deur middel van ’n interdik die koerant probeer muilband deur hom op die Wet op die Beskerming van Inligting van 1982 en die Namibië Sentrale Intelligensiedienswet van 1997 te beroep.

Die openbare galery in hof F was stampvol toe die regsverteenwoordigers van die applikante en die respondente vir bykans vier ure lank ononderbroke hul argumente voor regter Harald Geier gevoer het.

Die aansoek is op 12 April by die hof ingedien nadat Haufiku die direkteur van die NCIS, mnr. Ben Likando, in ’n teksboodskap laat weet het die koerant is van plan om ’n berig oor hierdie eiendomme te publiseer en dat hy vrae daaroor aan hom wil rig.

GEKLASSIFISEERDE INLIGTING

Mnr. Philemon Malima, direkteur-generaal van die NCIS, voer in sy gefundeerde eedsverklaring aan die inligting wat Haufiku in sy teksboodskap gesê het die koerant gaan publiseer “is sensitiewe en/of geklassifiseerde inligting en die onwettige besit, verspreiding en publisering daarvan word deur die wet verbied”.

Haufiku reageer in sy beantwoordende eedsverklaring daarop en sê die breë en omvattende interdik wat die NCIS en die regering vra, sal die reg op vryheid van spraak en mediavryheid skend.

Hy sê die berig wat hy wil publiseer, het te make met beweringe van korrupsie deurdat eiendom wat deur die regering vir die gebruik van die Intelligensiediens gekoop is, nou vir private doeleindes aangewend word. Dit is nie teen een van die voorgenoemde wette of enige ander wet om sulke misbruik en korrupsie te openbaar nie, sê Haufiku.

Adv. Dennis Khama, vir die NCIS en die regering, het betoog die hof weet nie of die Intelligensiediens hierdie eiendom vir “’n groter saak” gebruik nie, aangesien sy optrede geheim is.

Hy voer aan dit is internasionaal aanvaarbare gebruik in die intelligensiekringe van demokratiese lande om inligting geheim te hou wat ’n veiligheidsrisiko inhou.

Geier het gesê die hof se vraag is wat as die betrokke wetgewing gebruik word om ’n misdaad of misdadige aktiwiteite toe te smeer.

“As die interdik beteken omwettige aktiwiteite gaan toegesmeer word, moet die hof steeds die wetgewing handhaaf?”

Hy het ook daarop gewys dat die interdik wat versoek word, só wyd is dat dit tot “ewigdurende swye” sal lei.

Tjombe het in sy betoog gesê die applikante moes die sensitiewe inligting in ’n aparte in camera-aansoek uiteengesit het en nie vir ’n breë interdik gevra het wat vermeende korrupsie sal toesmeer nie.

Geier sal op 31 Mei sy uitspraak lewer.