Internasionale kongres oor vlieë aangebied

Ronelle Rademeyer - Wetenskaplikes van oraloor die wêreld is op pad na Namibië vir ’n kongres oor vlieë – die grootste saamtrek van wetenskaplikes ooit op eie bodem.Dié negende internasionale kongres oor dipterologie (die studie van vlieë) vind van 25 tot 30 November by die Safari Hotel se konferensiesentrum in Windhoek plaas.Dit is die eerste keer ooit dat dit in Afrika aangebied word.Volgens dr. Ashley Kirk-Spriggs, voorsitter van die kongres, word 270 wetenskaplikes uit 50 lande verwag. Altesaam 60 van dié afgevaardigdes is uit 12 Afrikalande na die kongres op pad.Van die wêreld se topwetenskaplikes in dié studieveld sal lesings aanbied oor onderwerpe soos die dodelike siektes wat deur vlieë aan mense en diere oorgedra word, die plae deur vrugtevlieë en die impak daarvan op internasionale handel, asook die gebruik van vlieë in moordondersoeke.Om 18:30 op 27 November sal die bekende forensiese bioloog, dr. Mark Benecke, ’n openbare lesing aanbied oor hoe vlieë en ander insekte misdaadondersoekers kan help om moorde en ander misdade te verstaan en op te los.Die ander openbare lesing vind om 18:30 op 29 November plaas en prof. Stephen Marshall, ’n entomoloog en fotograaf van Kanada, sal oor die fotografering van vlieë praat. Die titel van sy lesing is Bye bye birdie – Hello Year of the Fly. Dít na aanleiding van die bekendstelling van 2019 as die Jaar van die Vlieg – een van die items op die kongresprogram. ’n Ander hoogtepunt is die vrystelling van die handleiding Manual of Afrotropical Diptera.Die kongres word in samewerking met die ministerie van die omgewing en toerisme, die Gogabeb Opleiding- en Navorsingsentrum en die Namibië Wetenskaplike Vereniging aangebied, sê Kirk-Spriggs.Hy sê hy het al in 2002, toe die kongres in Brisbane, Australië, aangebied is, voorgestel Namibië word die volgende gasheerland. “Dit is vir my ’n groot mylpaal dat die kongres 16 jaar later uiteindelik Namibië toe kom.”Kirk-Spriggs, wat met ’n Namibiër getroud is, het vroeër jare by die Nasionale Museum in Windhoek gewerk. Hy is nou as dipteroloog aan die Nasionale Museum in Bloemfontein, Suid-Afrika, verbonde.“Vlieë is die belangrikste groep insekte wat daar is, want hulle versprei siektes na mense en diere en val groente- en vrugte-oeste aan. Hulle is egter terselfdertyd ook belangrike bestuiwers en breek afvalprodukte af.”Hy sê die meeste mense dink daar is slegs ’n paar tipes vlieë, maar dit is ver van die waarheid. “Daar is meer as 160 000 spesies wêreldwyd, waarvan sowat 20 000 in Afrika voorkom. Verder word gereken daar is omtrent 30 000 spesies op die vasteland wat nog ontdek en beskryf moet word.”

Internasionale kongres oor vlieë aangebied

Kommentaar

Republikein 2025-04-22

Meld asseblief aan om kommentaar te lewer

Internasionale kongres oor vlieë aangebied

Kommentaar

Republikein 2025-04-22

Meld asseblief aan om kommentaar te lewer

MELD AAN

Advertensie