Invalshoek - Koester jou kultuurgoed

Rudi Koekemoer - Ek het onlangs so 'n bietjie deur my “bakkiesblad” geblaai en kom toe op ‘n plasing van Heinz af wat die lagspiere behoorlik gekielie het: “My worst fear is going overseas and being chased by a dog that doesn’t understand what VOETSEK means!”. Dit het my opnuut laat besef hoe kleurryk ons taal is, want elkeen wat al deur ‘n hond gejaag is, sal die soetsuur humor hierin verstaan. Ek is seker elke taal in die wêreld het unieke uitdrukkings en geregte wat net in daardie bepaalde kulturele konteks verstaan kan word.Ou Johannes staan daar eenkant teen die kraal se hek en stop sy pyp met Black & White tabak. Sy gesig lyk soos ‘n geërodeerde landskap, met wegstaanore soos ‘n bakoorjakkals, waterige oë soos ‘n fonteinpadda en maer boude soos ‘n woestynpou. Hy rook eintlik al jare soos ‘n skoorsteen, wat eintlik die plaaseienaar, Rocco, dwars in die krop steek.Rocco kom by die plaasopstal aan met sy Toyota-bakkie en sien vir Johannes in sy ledigheid staan. Sy stem is soos ‘n koffiemeul wanneer hy vir Johannes die leviete voorlees en verduidelik dat ledigheid die duiwel se oorkussing is. Hy sê vir Johannes hy krap met ‘n kort stokkie aan ‘n groot leeu se gat met al die ledigheid.Johannes druk toe die pyp se kooltjie dood, kap die ou tabak teen ‘n klip uit en gee ‘n verleë glimlag wat ‘n stel wegstaantande soos ‘n stalvark ontbloot.Rocco verduidelik daar gaan vandag sommer ‘n moer-by-potjie gemaak word en Johannes moet ‘n paar stukkies kameeldoringhout gaan bymekaarmaak. Hy het ook vir Johannes gevra om die hoofhek te gaan toemaak, want anders kom wei die pajamadonkies weer in die hoofkamp.Liana staan in die kombuis en berei solank die kerrie-afval vir die grootmense voor. Sy moet vanmiddag solank begin Hertzog-koekies, koeksisters, melktert, malvapoeding en armmanspoeding vir Saartjie – wat al oor die onderdeur loer - se verjaarsdagpartytjie voorberei.Saartjie het ook ‘n spesiale bestelling vir suiker-kaneel pannekoek ingesit, maar Liana sal eers kyk of sy tyd kry om dit ook aanmekaar te slaan. Mens kan mos nie net soetgoed eet nie en moet darem ook die innerlike versterk met ‘n verskeidenheid van southappies. Liana het besluit om vetkoek met kerriemins en bobotie met geelrys te maak, want dan kan die dag se tema sommer kerriekos wees en dan is daar oorskietkos vir môre, want die kuiergaste kom van heinde en verre vir hierdie gedoente.Rocco loer vinnig by die kombuis in en gee te kenne dat al die geure wat uit die kombuis kom hom darem nou hongerpyne gee. Liana sê hy moet maar eers vir hom rooibostee maak en Ouma se beskuit neem.Dan is daar nog van gisteraand se rugtjoppies, skilpadjies, pofadder en roosterbrood oor. Daar staan ook biltong en droëwors in bakkies onder die gehekelde lappies indien die koue braaivleis dalk te swaar op die maag gaan wees.Liana se toe vir Rocco: “En wanneer jy klaar is, moet jy jouself handig maak en help om die stoep skoon te maak, want jou hande is mos nie rond nie. Sobyso, jy het mos nie eintlik iets anders om nou te doen nie.”Ek is seker julle kan sommer die uitdrukkings en woorde hierbo sommer sien, proe, ruik en voel, want dit is deel van ons kultuurerfenis.Daar is die Boeing so pas oor. . .

Invalshoek - Koester jou kultuurgoed

Kommentaar

Republikein 2025-04-29

Meld asseblief aan om kommentaar te lewer

Invalshoek - Koester jou kultuurgoed

Kommentaar

Republikein 2025-04-29

Meld asseblief aan om kommentaar te lewer

MELD AAN

Advertensie