Invalshoek - Relevante kliëntediens

Rudi Koekemoer - Oudergewoonte het ek Vrydagoggend my stapskoene en wintersklere aangetrek vir ons gebruiklike oggendstappie voor die dag se verpligtinge.

Swakopmund is besonders koud die afgelope week en ek moes sommer my mussie ook opsit om die kop en ore te beskerm.

Ons het die paadjie see toe aangepak en by Pebble Beach se parkeerterrein, so duskant Myl 4, strekoefeninge gedoen voor ons huiswaarts sou keer. Terwyl ons so staan en strek, let ek al die stukkende mossels op wat verstrooi lê op die parkeerterrein.

Dit het my herinner aan ‘n skouspel wat ek die anderdag ervaar het . . .

Seemeeue het swartmossels, wat uitgespoel het op die strand, gaan oppik, na die teeroppervlakte van die parkeerterrein gevlieg en dit op die harde oppervlak laat val sodat die mossels kon oopbreek vir die meeue om aan te smul. Ek kon my oë nie glo nie, want ek het dit nog nooit van tevore gesien nie. Ek kon nie glo dat voëls so innoverend kan wees nie.

Gewoonlik klets ons nie baie tydens die oggendstappies nie. Daar word oor allerlei dinge gedink en die dag word stilweg beplan.

Die seemeeu-ervaring het my opnuut laat dink – weet nie hoekom nie - aan die afgelope dekade se navorsing en kritiek wat gelewer is oor die nuwe generasie van jongmense in die werksplek.

Die realiteit is dat die Baby Boomers (gebore tussen 1946 en 1964) tans op aftrede staan terwyl reeds twintig persent van Millennials (gebore tussen 1981 en 1996), ook bekend as Generasie Y, leierskapposisies beklee.

Om die waarheid te sê, ek geniet die nuwer generasies se openlikheid en vermoë om te redeneer oor kontemporêre, en selfs kontroversiële temas rondom aspekte wat diversiteit, inklusiwiteit, politiek, etiese kwessies, sosiale verantwoordelikheid, moderne werkmetodes en doelgerigte werk insluit. Hulle daag die status quo uit en dwing ouer generasies om tradisionele metodes te bevraagteken, wat vir dekades as vanselfsprekend aanvaar is.

Ek is deel van Generasie X (gebore vanaf 1965 tot 1980) en het self baie tradisionele opvattings oor geërfde sakemodelle wat deur oorlewering as wenmodelle voorgeskryf is. Die nuwer generasies stimuleer my denke en vra die regte vrae, wat my soms my uit my gemaksone dwing en aanspoor om tradisionele denke en werkmetodes te bevraagteken.

Is dit nie juis die Millennials wat ons nuwe kliëntebasis is nie? Lewer ons nog relevante diens?

Dit is noodsaaklik vir werkgewers om die werksomgewing te herontwerp om die nuwe, inligtingsgedrewe generasies te kan aantrek, te inspireer en die volle potensiaal te ontsluit om ook die veranderende kliënteprofiel te bedien. Die Millennials vorm tans die kern van die ekonomiese aktiewe bevolking en dus moet hulle bedien word deur mense wat hulle behoeftes verstaan; wat in hulle skoene staan.

Indien ons uitgeleefde sakemodelle gaan toepas, sonder die nodige innovering, sal ons nie meer relevante produkte en dienste lewer nie.

Dit was vir my inspirerend toe ek die Pupkewitz-groep se inisiatief gesien het om ‘n Millennial-span aan te stel wat die groep oor sakemodelle, produkte en dienste raad te gee. Mag dit ‘n voorbeeld vir ander sakeondernemings wees.

Daar hoor ek ‘n seemeeu roep!