Is dit 'menopause', griep of is dit net warm?

Karin Eloff - Oor 'n maand is ek 44. Ver van oud af, ek weet. Ek luister nog Rammstein, dra nog nie pastel- tweestukpakkies nie, en ek kou darem nog my tjoppies met my eie tande. Ek is nie heeltyd bedonnerd nie, ek huil nie agtuur in die oggend nie en ek het nog altyd net drie hare op my kop gehad – niks het regtig verander nie. Maar die afgelope maand kry ek hot flushes. Hoe is dit moontlik?! Snags word ek wakker van iets wat voel of iemand 'n oond binne-in my aangeskakel het. Ons slaap reeds onder 'n dun kombersie, in T-hemde en met die venster wawyd oop. Maar so vyf keer 'n nag word ek in 'n gloed wakker en moet ek die sweet van my aangesig afvee.Spruit sê sy kry ook warm snags, maar nie só dat sy daarvan wakker word nie. Een kollega sê sy kry ook warm snags, maar 'n ander kollega sê menopousale simptome op 44 is tóg moontlik. Ek voel beter en ek voel slegter. My nagtelike gloede gaan steeds voort, en nee, daar's niks romanties daaraan nie. Dan begin ek bedags ook gloede kry – veral as ek die bal vir die hond gooi, die skottelgoed was of jaag om 'n storie klaar te sub. En toe kom die keelseer en ander verkouedinge. Verlig dink ek, okay, dis nie menopause nie, dis net 'n verkoue of 'n griep. Maar hoe kan mens 'n maand lank gloede kry en dán eers 'n verkoue? Ek google weer die simptome van menopouse. Nee, ek het dit beslis nie alles nie. Ek huil net as ek binnelandse sake of NaTIS toe moet gaan, ek slaap nog baie lekker (behalwe nou vir die gloede) en daar ís darem nog so drie mans op hierdie planeet wat my daaraan herinner dat ek nie net 'n ma is nie. Maar vanwaar dan nou die warm gloede? Dan doen ek bietjie navorsing oor die weer. Junie, Julie en Augustus is glo winter in Namibië. In Johannesburg het ek van Junie af reeds wintersore en -vingers gehad. Seergeswel en jeukend van die koue, want ek is letterlik allergies vir koudkry. En Joburg se winters sny deur jou hele lyf, tot in jou bene in. Daar is net geen manier om warm te word nie, behalwe om in 'n warm bad te lê vir ure. En elke keer as jy uitklim, het jy berading nodig om oor die ergste trauma te kom. Joburg se koue maak letterlik seer, dis al hoe ek dit kan beskryf.Maar hier kry ek uiteenlopende opinies. Party mense sê wag maar, jy gaan nog vrek van die koue, ander sê nee wat, dit raak nie veel erger as nou nie. Ek en Spruit het vir ons sagte, fluffy truie aangeskaf by Mr. Price, maar ons kon nog nie een keer snoesig daarin verkeer nie. Spruit het selfs 'n sjerpa-kombers vir haar verjaarsdag gekry, maar naweke van weier om onder 50 komberse uit te kom, bestaan nie hier nie, lyk dit my. En ek het nog nie eers aan 'n verwarmer gedink nie. Ek's verward, my liggaam is duidelik ook verward. Miskien is dit net my lyf se manier om by warmer weer aan te pas, die gloede. Of miskien is dit net ek wat weier om te aanvaar ek word ook ouer. Maar of dit nou menopause, griep of net global warming is, gloede is nie pret nie. Hiermee betuig ek dus my innige empatie met almal wat gloei – of dit nou in die lig of in die donker is.

Is dit 'menopause', griep of is dit net warm?

Kommentaar

Republikein 2025-04-28

Meld asseblief aan om kommentaar te lewer

Is dit 'menopause', griep of is dit net warm?

Kommentaar

Republikein 2025-04-28

Meld asseblief aan om kommentaar te lewer

MELD AAN

Advertensie