Jo sing vir Debbie

Jo Black se tweede album, Voel jy die genade, is op 8 Februarie vanjaar uitgereik en het in die eerste 10 dae ná sy vrystelling goue status bereik.

Die eerste enkelsnit op die album, wat dieselfde titel het, pryk reeds sedert Januarie vanjaar op trefferparades van radiostasies landswyd, en die musiekvideo is tot dusver al meer as 860 000 keer op YouTube gekyk.

Nou is hy terug met ’n splinternuwe rockballade, “Bitter”, wat nie net beloof om die hartsnare te roer nie, maar ook aanklank sal vind by gehore van alle ouderdomme.

Hy dra dié lied aan sy vrou, Debbie, op.

Dit is die tweede enkelsnitvrystelling van sy nuutste album af, wat in samewerking met Inhoud Huis Musiek vrygestel is.

“’n Mens besef nooit hoe nodig jy iemand het, tot daar ’n kans is dat jy daardie mens kan verloor nie,” verklap Jo oor die boodskap agter sy nuutste enkelsnit, wat hy saam met Johan Vorster geskryf het.

“‘Bitter’ is een van die beskrywendste woorde in Afrikaans. Jy kan bitter kwaad, bitter bly, bitter mooi, bitter stout of bitter lief wees. Dié is ’n lied om vir my vrou te beskryf hoe bitter nodig ek haar het.”

Die snit se meesleurende wysie is nie net strelend op die oor en hart nie, maar is ook een van daardie liedjies wat in jou kop bly vassteek – lank ná jy dit vir die eerste keer gehoor het en jou uitnooi om saam te sing, omdat die tema so toepaslik en universeel is.

“Ek hoop die publiek ervaar ook die dieper emosie agter die musiek. Ons het immers al almal ons harte op iemand verloor,” voeg hy by.

Die musiekvideo, wat deur Daniel Rademeyer en Jannes Erasmus vervaardig is, is in Jo se restaurant, The Bearded Butcher, wat eersdaags sy deure oopmaak, verfilm en beeld die kontras tussen mans en vroue uit.

Hierdie treffende video sal op 3 Mei 2019 bekend gestel word.