Jong flank bly lank geskors

Andrew Poolman - ’n Skorsing van vier jaar uit alle rugby-bedrywighede is die voorland vir Cameron Xavier McNab (20), wat as eerste oortreder aan die gebruik van ’n verbode anaboliese steroïed skuldig bevind is.
McNab, ’n flank wat soms ook as slot deur die Namibiese o.20-span en sy klubspan FNB Unam ingespan is, word tot op 26 April 2020 nie toegelaat om te speel, af te rig of op enige ander wyse by georganiseerde rugby betrokke te wees nie.
Wêreldrugby het voor die naweek die uitslag van die McNab-saak op sy webblad teen verbode middels (keeprugbyclean.worldrugby.org) gepubliseer.
McNab is vroeg in April vanjaar in Windhoek buite kompetisie aan ’n toets onderwerp as deel van die Wêreldrugby Onder 20 Trofee-toernooi se toetsprogram. Twee verbode anaboliese steroïede is bevind, wat op die farmaseutiese handelsmerke Turinabol en Dianabol bekend is.
Die speler se tugverhoor is op 26 Julie vanjaar gehou.
McNab was vir die laaste twee jare ’n nasionale o.20-speler wat by die junior toernooie in Portugal en Zimbabwe in aksie was. Getuienis is gelewer dat hy tydens eersgenoemde toernooi ’n mondelinge opleidingsessie oor verbode middels bygewoon het wat deur ’n koördineerder van Wêreldrugby aangebied is. Die speler het hier ook die 2015-handleiding ontvang waarin die volle WADA-lys van verbode middels verskyn.
Die tugkomitee het dus bevind dat McNab breedvoerig ingelig was oor die risiko’s en gevare wat met sportlui se gebruik van medikasie, voedsel- en dieetkundige aanvullings gepaard gaan.
Sy beëdigde verklaring waarin hy dit stel dat hy as ’n Namibië-speler “nooit” blootgestel was aan ’n spesifieke inligtingsessie waarin alle moontlike verbode middels bespreek is nie, is dus tydens kruisverhoor as vals bevind.
In die bevinding word ook uitgewys dat die speler ’n jaar tevore in Portugal ook (skoon) getoets is.
In McNab se verklaring het hy verduidelik dat hy tot in November/Desember 2015 as ’n lid van die Sharks rugby-akademie aanvullings met die etikette “Animal M Stak”, “Hellfire EPH 150” en “Jack3d” ontvang en gebruik het.
Voor die tugkomitee het hy egter sy getuienis verander – dat hy op 5 Maart vanjaar vir die eerste keer Jack 3d ingekry het toe hy voor ’n premierliga-klubwedstryd in Windhoek ’n enkele lepelvol van ’n spanmaat se voorraad geneem het. McNab het glo staatgemaak op die spanmaat se versekering dat die produk geen verbode bestanddele het nie.
Jack 3d en Hellfire is egter aanvullings wat vir hul effek as stimulante ontwerp is. “Animal M Stak” is ’n nie-hormonale anaboliese produk (vir die effek van spierbou). McNab het nie vir stimulante positief getoets nie.
Tydens McNab se toets in April vanjaar het hy op ’n vraag van die toetsbeampte geantwoord dat hy in die vorige sewe dae net ’n vitamien B-aanvulling gebruik het. ’n Geskrewe kontrolevorm word daar deur die speler onderteken.
Die speler het verklaar dat sy verbode toetsuitslag net toegeskryf kan word aan die teenwoordigheid van die genoemde drie aanvullings – wat hy sonder voornemens van kullery ingeneem het.
Tydens die verhoor het hy ook vir die eerste keer getuig dat sy oom (wat nie ’n dokter is nie) voor die toets vir hom ’n blou pil vir die behandeling van griep gegee het.
’n Kennersmening van die WADA-geakkrediteerde laboratorium in Switserland is voorgelê dat die teenwoordigheid van Metandienone (Dianabol) vir 20 dae ná inname opgespoor kan word. Tekens van dehridochlorometieltestosteroon (Turinabol) kan vir 40 tot 50 dae in die liggaam bly.

BEROU
McNab het sy spyt oor die positiewe toets soos volg uitgedruk: “Ek het nooit gedink ek sou myself in so ’n posisie bevind, terwyl ek soveel respek vir die spel rugby het nie.
“Ek keur nie die gebruik van verbode middels in rugby of in enige ander sport goed nie. Ek bevind my dus in ’n posisie waar ek my land, my Rugby-unie, my kollegas in die sport en in die besonder my eie hoë aspirasies en persoonlike doelwitte in die sport in die steek gelaat het.
“Ek het ook spyt oor die skade wat aan die beeld van Wêreldrugby as ’n sport gedoen is, veral in die pogings om dissipline in die spel te bevorder.”

VERANTWOORDELIKHEID
Regulasie 21.10.5.1 maak voorsiening dat ingeval die speler of iemand anders bewys kan lewer dat geen betekenisvolle skuld of aanspreeklikheid bestaan nie omdat die positiewe toets die gevolg van ’n bedorwe produk is, so ’n speler met ’n waarskuwing of ’n maksimum skorsing van twee jaar kan wegkom.
Wêreldrugby se regslui het getuig dat die feit dat die speler middels gebruik het wetend dat dit ’n risiko van oortreding inhou, maak sy aanspraak nietig dat hy geensins (of minimaal) aanspreeklik gehou kan word nie. ’n Internet-soektog oor Jack 3d sou byvoorbeeld aandui dat dit die verbode bestanddeel DMAA het, wat “helder rooi vlae en ’n luide alarm” moes beteken het.
McNab kon ook nie bewys lewer dat die anaboliese steroïede se oorsprong in enige van die genoemde produkte was nie. Die tugkomitee het dus bevind dat die anaboliese steroïde onafhanklik ingeneem moes gewees het.
Dit is ook as onwaarskynlik bevind dat een lepelvol “bedorwe” Jack 3d die oorsprong van twéé anaboliese steroïede kon wees.
Die tugkomitee was nie tevrede dat die speler die bewyslas van sy inname van die verbode middels as onbedoeld weerlê het nie – vanweë die speler se getuienis wat nie betroubaar bevind is nie, asook die bewustheid wat die speler van Wêreldrugby se program teen verbode middels moes hê.
Die speler het verder erken dat hy die genoemde produkte ingeneem het om sy vertoning tydens oefensessies aan te help.
Tydens die 48 maande wat McNab geskors bly, mag hy dus nie oefen by, of die fasiliteite van ’n klub, rugby-unie of ander lidorganisasie van Wêreldrugby gebruik nie. Hy mag ook nie meeding of in enige ander aktiwiteit deelneem wat in regulasie 21.10.12.2 uiteengesit word nie.
• McNab is in sy regsaak deur mnr. Christopher Stanley verteenwoordig.
• Republikein verneem dat nog ’n Namibiese speler wat onlangs ’n positiewe toets gelewer het, die skrumskakel Arthur Bouwer, se tugverhoor nie voor Oktober sal plaasvind nie.