Jongste oor Covid-19: Baie minder in hospitale

Hoewel twee keer meer nuwe gevalle van Covid-19 vandag deur gesondheidsowerhede bevestig is as gister, is die aantal persone in hospitale dramaties minder.
In sy daaglikse bulletin sê die ministerie van gesondheid en maatskaplike dienste die bekamping van ‘n verdere toename is in die publiek se hande.
Teen Donderdag was 73 gevalle gehospitaliseer en steeds net vier in intensiewesorg (ICU).
Die 1 041 gevalle wat aangekondig is, bring die rollende sewedaegemiddeld op 376 te staan.
Hierdie gemiddeld is meer as tydens die piek van die eerste golf, digby die kruin van die tweede en soortgelyk aan die situasie op 1 Junie vanjaar, vroeg in die pandemie se derde golf.
Op 1 Junie 2021 was daar 286 persone in die hospitaal en 53 in die ICU.
Huidige syfers is onderskeidelik 74% en meer as 90% minder.
Die data ondersteun voorlopige navorsing in Suid-Afrika wat bevind het die Omicron-variant veroorsaak dusver meestal matiger simptome en baie minder mense in die ICU benodig byvoorbeeld suurstof.
Navorsers het egter gekwalifiseer dat die situasie kan verander.
Die afgelope Donderdag het die Wêreldgesondheidsorganisasie (WHO) gesê byna 99% van alle Covid-gevalle wêreldwyd word steeds aan die Delta-variant toegeskryf.
Hoewel Namibië eers vroeg in Julie die teenwoordig van die Delta in die land bevestig het, was die eerste monsters wat vir die variant getoets is reeds in Mei geneem.
Soos elders is daar nie ‘n groot toename in sterftes nie.
Op 1 Junie vanjaar is 11 sterftes bevestig teenoor die twee van vandag.
Beide persone het Woensdag tuis in die Zambezi-streek gesterf en die twee vroue was onderskeidelik 89 en 103 jaar oud. Nie een van hulle was ingeënt nie.
Die huidige, gemiddelde sterftesyfer in Namibië, direk of indirek toegeskryf aan Covid-19, is 0,4 persone per dag (bereken volgens die datum van sterftes en nie die dag van aankondigings nie).
Op 1 Junie was die gemiddeld 11 sterftes per dag – bykans 30 keer meer.


BESONDERHEDE
Die persentasie toetse met positiewe uitslae het van 21,2% tot 27,2% toegeneem.
Van die nuwe gevalle is 608 in Windhoek bevestig.
Ander distrikte met tien of meer gevalle is: Walvisbaai 90, Swakopmund 76, Usakos 38, Otjiwarongo 36, Okahandja 32, Oshakati 17, Lüderitz en Outjo 16, Karasburg en Rehoboth 15, Opuwo, Onandjokwe en Rundu 10 elk.
Volgens owerhede word nog 43 gevalle as herstel beskou. Die algehele herstelkoers staan op 95,2% en daar is tans 2 793 aktiewe gevalle en 259 persone word in amptelike kwarantyngeriewe gehuisves.
Kwarantynsyfers toon ook nie ‘n dramatiese toename nie.
Nog 41 gesondheidswerkers het positief getoets. Die syfer bly ‘n spieëlbeeld van die toename in totale verspreiding.
Die afgelope sewe dae het 141 gesondheidswerkers positief getoets.
Die afgelope Dinsdag is 3 660 nuwe intentings teen Covid-19 gerapporteer – die meeste op een dag sedert 25 Oktober.
Donderdag, die dag voor die langnaweek, is minder as 1 000 nuwe inentings gerapporteer, maar sewe van die 14 streke het nie syfers ingestuur nie.
Dusver het nog net 591 persone aangemeld vir ‘n derde dosis van Sinopharm – skaars 4% van diegene wat ses maande gelede reeds volledig met die entstof ingeënt was.
Die regering het gesê mense kan vir ‘n ekstra spuit aanmeld, maar eers ses maande na die vorige. Sover bekend is ‘n amptelike omsendbrief nog nie uitgestuur wat die toediening van ekstra dosisse van ander entstowwe magtig nie.