Ju/’hoansi doen regstappe teen besettings

Catherine Sasman - Bykans nege jaar ná onwettige besettings van die Gam-boere in die Nyae Nyae-bewaringsgebied en ’n gebrek aan optrede van die ministeries van die omgewing en toerisme, en landbou, water en bosbou, het die Ju/’hoansi tradisionele owerheid besluit om regstappe te doen.“Soos ons bure in N?aJaqna was ons verdraagsaam en het behoorlike regsprosesse gevolg, maar dit het nie die gewenste uitwerking gehad nie. Ons is gedwing om hierdie siviele aksie te neem om te verseker dat ons grond en hulpbronne teruggegee word aan die gemeenskap aan wie dit behoort. Ons is gereed om die saak na wêreldhowe te neem as dit nodig is,” het hoofman Tsamkxao ?Oma van die tradisionele owerheid gesê.Die Regshulpsentrum (LAC) verskaf regsadvies aan die owerheid teen ses van die onwettige besetters.Die owerheid het op 8 Februarie ‘n ultimatum aan die Gam-boere gegee om die Nyae Nyae-bewaringsgebied te verlaat. Dié tydperk het reeds verstryk. Mnr. Asser Mbai, Nudo-president, het op 9 Februarie in sy vergadering met pres. Hage Geingob namens die Gam-boere vir ingryping gevra. Die hoërhof het in 2013 beslis die Gam-boere moet die Nyae Nyae-gebied verlaat en 2 177 beeste is deur die ministerie van landbou, water en bosbou gekonfiskeer. Geingob is aangehaal dat hy by die vergadering genoem het ‘n nuwe oplossing moet gevind word ongeag die hoërhof-besluit.Sowat 32 Gam-boere het tussen April en Mei 2009 die Nyae Nyae-gebied met hul beeste ingevaar nadat hulle die veeartsenykordonheining geknip het. Ná die uitsettingsbevel van die hoërhof het van die Gam-boere egter in die Tsumkwe-omgewing aangebly en hul diere wei steeds onwettig daar.Mev. Lara Diez van die Nyae Nyae-ontwikkelingstigting het gesê strafsake is by die polisie aanhangig gemaak en ondersoek, maar geen vervolging is gedoen nie.'GEEN STAPPE'Diez het gesê nóg die ministerie van die omgewing en toerisme, nóg die ministerie van landbou, water en bosbou het stappe teen die Gam-boere gedoen om die onwettige besetting te stop.Die Nyae Nyae-ontwikkelingstigting het gesê besettings vanuit die Kavangostreek in die bewaringsgebied is vroeër vinnig hanteer.“Grond en die reg op natuurlike hulpbronne word in Namibië ernstig opgeneem. As sulke regte verwerp word, sal dit tot anargie lei, waartydens mense grond en hulpbronne onwettig gryp,” het die stigting gesê.Die stigting sê die land se regstelsel het die San-randgemeenskap geheel en al in die steek gelaat.Voorts sê die organisasie die twee ministeries ignoreer die wetgewing waaronder die bewaringsgebied gestig is en waarvolgens die San-gemeenskap geregtig is op die gebruik van grond en hulpbronne. “’n Baie onwelkome situasie het ontstaan waar mense wat die grond wettiglik beset en hulpbronne volhoubaar gebruik hul eie bewyse teen die boere moet insamel, wat diere bewustelik onwettig laat wei sonder om die volhoubaarheid daarvan in ag te neem, terwyl die owerhede en ministeries slegs toekyk,” sê die Nyae Nyae-stigting.

Ju/’hoansi doen regstappe teen besettings

Kommentaar

Republikein 2025-04-18

Meld asseblief aan om kommentaar te lewer

Ju/’hoansi doen regstappe teen besettings

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie