Judge Judy kom tot ’n einde

Ná 25 jaar sal die regbank op televisie nooit weer dieselfde wees nie nadat Judge Judy bevestig het dat haar gewilde reeks tot ’n einde kom.

Dit beteken egter nie dat Judy Sheindlin van Judge Judy-faam haar hamer gaan neerlê nie, het sy Maandag aan Ellen DeGeneres op die Ellen Show gesê.

Sheindlin sê CBS, die kanaal waar haar reeks uitgesaai word, het besluit dat die 2020-2021-seisoen die laaste Judge Judy-reeks gaan wees.

“Ek het ’n 25 jaar lange huwelik met CBS gehad en dit was suksesvol. Volgende jaar sal dit ons 25ste seisoen wees, ons silwer herdenking.”

Sy sê CBS het besluit om die 25 jaar se episodes te verkoop sodat dit nog baie jare uitgesaai kan word.

Sheindlin sê tydens haar onderhoud met DeGeneres dat sy in 2022 in die reeks Judy Justice te sien sal wees.

Sy wil egter nie verklap op watter kanaal haar nuwe reeks uitgesaai sal word nie.

The Hollywood Reporter berig Sheindlin is een van die bes betaalde TV-persoonlikhede. Sy verdien jaarliks $47 miljoen.

Die episode waarin Judge Judy met DeGeneres oor haar nuwe reis praat, sal Maandagaand Amerikaanse tyd uitgesaai word. – Netwerk24/Saamgestel deur Meghan Lawrence