Kaapstad 'die beste stad in Afrika': PwC-studie

Francois Williams - Kaapstad is Afrika se stad van geleenthede, volgens 'n onlangse navorsingsverslag van die ouditgroep PwC wat 31 stede wêreldwyd volgens sekere kriteria vir stedelike sukses gemeet het.

Hiervolgens is Kaapstad 24ste uit al 31 die stede op die lys en 6de uit die stede van middelinkomste-lande (wat hom agter Beijing, Kuala Lumpur, Moskou, Sjanghai en Mexikostad plaas), maar wel 1ste in Afrika.

Johannesburg is net ná Kaapstad op 25ste wêreldwyd en 2de in Afrika, en Lagos, die enigste ander Afrikastad op die wêreldlys, is laaste op die 31ste posisie.

Die PwC-verslag, wat Maandag op 'n geleentheid van die Wes-Kaapse handelsbevorderingsagentskap, Wesgro, bekend gestel is, meet die stede volgens 66 aanwysers wat ­gegroepeer is onder tien faktore:

• Intellektuele kapitaal en innovasie;

• Tegnologie-gereedheid;

• Vervoer en infrastruktuur;

• Gesondheid, veiligheid en sekuriteit;

• Volhoubaarheid en die natuurlike omgewing,

• Demografie en leefbaarheid;

• Gemak om sake te doen;

• Koste;

• Ekonomiese invloed; en

• Toegang.

Kaapstad het die meeste punte behaal in die kategorieë vir koste, gemak om sake te doen, vervoer en infrastruktuur, en volhoubaarheid en die natuurlike omgewing.

Matige puntetellings is behaal vir intellektuele kapitaal en innovasie, en vir gesondheid, veiligheid en ­sekuriteit.



SOKKIES OPTREK

Aspekte waarmee Kaapstad sy sokkies moet optrek, sluit in ekonomiese invloed, tegnologie-gereedheid, toegang, en demografie en leefbaarheid.

Dominic Boyle, senior bestuurder vir stede en verstedeliking by PwC, sê hoewel Kaapstad boaan die lys is vir tegnologie-gereedheid in Afrika, is die stad ver agter ander inter­nasionale stede.

“Amsterdam hou byvoorbeeld 900 tegnologie-geleenthede per jaar, en voorste stede soek voort­durend maniere om verbindings te verbeter.

Hoewel Kaapstad vordering maak, skiet hy ver te kort wanneer hy met ander stede vergelyk word.”



VERSLAG BIED AANBEVELINGS

Die verslag bied die volgende aanbevelings om Kaapstad se posisie te verbeter:

• Maak onderwys en veiligheid topprioriteite.

• Omarm tegnologie en innovasie en moenie bang wees om te eksperimenteer nie.

• Leer van die beste stede hoe om innoverende oplossings in werking te stel.

• Bou op die sukses van die Kaapse toerismebedryf.

• Benut Groot Data om belangrike probleme op te los.

• Samewerking tussen die owerheid, sakesektor en burgerlike samelewing sal latente potensiaal ontsluit.

Tim Harris, uitvoerende hoof van Wesgro, meen dit is reeds 'n ­pluimpie vir Kaapstad dat die stad hoegenaamd die lys van 31 stede gehaal het.

 – Netwerk24