Kabinet sny voorgestelde NamRA-salarisse
'n Konsultant se oorspronklike voorstel het voorsiening gemaak vir 13 bestuurders wat elkeen maandeliks tot N$170 000 – of N$2,04 miljoen per jaar – sou verdien.
Mathias Haufiku en Ogone Tlhage – Die kabinet het verlede jaar 'n voorstel wat die ministerie van finansies ter tafel gelê het om die omstrede salarisstruktuur van die Namibiese Inkomste-agentskap (NamRA) te bekragtig, van die hand gewys.
Die kabinet het beswaar teen dié syfers gemaak en het konsensus bereik dat die bedrae “nie verdedigbaar is nie”, het 'n bron aan ons susterkoerant Namibian Sun gesê.
In 2019 is 'n konsultant versoek om 'n personeelstruktuur en vergoedingskale vir die agentskap voor te stel. Dit is in samewerking met die ministerie van finansies en die Bank of Namibia (BoN) gedoen.
“Hulle wou eintlik hê NamRA se vergoedingspakkette moes die regulasies van die Wet op die Beheer van Openbare Ondernemings (Pega) oorskry – plus 'n bykomende 15%,” het 'n bron aan Namibian Sun gesê.
“Die kabinet het die voorstel van die hand gewys. Die kabinet het besluit om hulle streng aan Pega Vlak 3 te verbind, soos wat deur die ministerie van staatsondernemings goedgekeur en geïmplementeer is.”
Die konsultanteverslag bevat volledige vergoedingskale, met 'n voorgestelde maandelikse salaris van N$225 000 – ofte wel N$2,7 miljoen per jaar – vir die kommissaris. Die struktuur het voorsiening gemaak vir 13 bestuurders wat elkeen maandeliks tot N$170 000 – of N$2,04 miljoen per jaar – sou verdien.
Die kabinet het 'n hersiene voorstel goedgekeur waarvolgens NamRA se hoof N$2,08 miljoen per jaar kan verdien – sowat N$700 000 minder as die salaris wat aanvanklik voorgestel is.
NamRA is vroeër vanjaar op die been gebring met 'n wegspringbegroting van N$79 miljoen.
RIGLYNE
Amptelike dokumente wat Namibian Sun onder oë gehad het, dui aan die kabinet het die ministerie van staatsondernemings opdrag gegee om NamRA se vergoedingsklassifikasie as 'n Vlak 3-staatsonderneming te hersien.
“Die kabinet het gelas dat alle vergoeding vir NamRA se personeellede binne die goedgekeurde vergoedingsindeling moet wees,” lui 'n dokument gedateer 25 Augustus 2020.
Die ministeries van staatsondernemings en finansies is ook aangesê om die ontwikkeling van 'n sakeplan, sowel as inkomsteramings en prestasiedoelwitte vir die belastinginvorderaar, te vergemaklik.
Die minister van staatsondernemings, mnr. Leon Jooste, het Maandag gesê NamRA se sakeplanne moet nog ingedien word. Hy het nie aangedui of daar 'n sperdatum vir hierdie indiening is nie.
“Daar was geen versoek om vrystelling nie en hulle (NamRA) is dus verplig om die riglyne te volg,” het hy bygevoeg.
Die kommissaris en die uitvoerende span werk op prestasiegebaseerde kontrakte van vyf jaar, terwyl die res van die personeel voltyds in diens is.
Terwyl die kabinet die eksterne werwing van senior, middelbestuur en spesiale eenhede goedgekeur het, het diegene wat onder die Direktoraat Binnelandse Inkomste gewerk het, onlangs die werwingstrategie van die agentskap bevraagteken, met aantygings van nepotisme en uitsluiting.
Ongeveer 1 200 personeellede van die direktorate van binnelandse inkomste en doeane en aksyns sal na NamRA oorgeplaas word.
Ontevrede werkers beweer hulle is die versekering gegee dat hulle voorkeur sal geniet, maar nou word van hulle verwag om met buitestanders mee te ding. Daar is glo ook aan sommige gesê dat hulle na ander ministeries oorgeplaas sal word as hulle nie die mas opkom nie.
Werknemers voer ook aan dat salarisstrukture nie met die betrokke vakbonde gedeel word nie.
“Daar is geen kommunikasie met die huidige werkers nie; dinge word net op ons afgedwing, ongeag hoe dit ons beïnvloed,” lui die klagskrif.
NamRA se uitvoerende hoof, mnr. Sam Shivute, het in 'n verklaring wat die afgelope naweek uitgereik is, gesê: “Ons is bewus van die moontlikheid dat die instelling van die agentskap dalk nie deur almal verwelkom sal word nie, veral nie deur diegene wat wil hê die huidige status quo – waar sommige steeds hul belastingverpligtinge ontduik – moet volgehou word nie.”
- [email protected]
Die kabinet het beswaar teen dié syfers gemaak en het konsensus bereik dat die bedrae “nie verdedigbaar is nie”, het 'n bron aan ons susterkoerant Namibian Sun gesê.
In 2019 is 'n konsultant versoek om 'n personeelstruktuur en vergoedingskale vir die agentskap voor te stel. Dit is in samewerking met die ministerie van finansies en die Bank of Namibia (BoN) gedoen.
“Hulle wou eintlik hê NamRA se vergoedingspakkette moes die regulasies van die Wet op die Beheer van Openbare Ondernemings (Pega) oorskry – plus 'n bykomende 15%,” het 'n bron aan Namibian Sun gesê.
“Die kabinet het die voorstel van die hand gewys. Die kabinet het besluit om hulle streng aan Pega Vlak 3 te verbind, soos wat deur die ministerie van staatsondernemings goedgekeur en geïmplementeer is.”
Die konsultanteverslag bevat volledige vergoedingskale, met 'n voorgestelde maandelikse salaris van N$225 000 – ofte wel N$2,7 miljoen per jaar – vir die kommissaris. Die struktuur het voorsiening gemaak vir 13 bestuurders wat elkeen maandeliks tot N$170 000 – of N$2,04 miljoen per jaar – sou verdien.
Die kabinet het 'n hersiene voorstel goedgekeur waarvolgens NamRA se hoof N$2,08 miljoen per jaar kan verdien – sowat N$700 000 minder as die salaris wat aanvanklik voorgestel is.
NamRA is vroeër vanjaar op die been gebring met 'n wegspringbegroting van N$79 miljoen.
RIGLYNE
Amptelike dokumente wat Namibian Sun onder oë gehad het, dui aan die kabinet het die ministerie van staatsondernemings opdrag gegee om NamRA se vergoedingsklassifikasie as 'n Vlak 3-staatsonderneming te hersien.
“Die kabinet het gelas dat alle vergoeding vir NamRA se personeellede binne die goedgekeurde vergoedingsindeling moet wees,” lui 'n dokument gedateer 25 Augustus 2020.
Die ministeries van staatsondernemings en finansies is ook aangesê om die ontwikkeling van 'n sakeplan, sowel as inkomsteramings en prestasiedoelwitte vir die belastinginvorderaar, te vergemaklik.
Die minister van staatsondernemings, mnr. Leon Jooste, het Maandag gesê NamRA se sakeplanne moet nog ingedien word. Hy het nie aangedui of daar 'n sperdatum vir hierdie indiening is nie.
“Daar was geen versoek om vrystelling nie en hulle (NamRA) is dus verplig om die riglyne te volg,” het hy bygevoeg.
Die kommissaris en die uitvoerende span werk op prestasiegebaseerde kontrakte van vyf jaar, terwyl die res van die personeel voltyds in diens is.
Terwyl die kabinet die eksterne werwing van senior, middelbestuur en spesiale eenhede goedgekeur het, het diegene wat onder die Direktoraat Binnelandse Inkomste gewerk het, onlangs die werwingstrategie van die agentskap bevraagteken, met aantygings van nepotisme en uitsluiting.
Ongeveer 1 200 personeellede van die direktorate van binnelandse inkomste en doeane en aksyns sal na NamRA oorgeplaas word.
Ontevrede werkers beweer hulle is die versekering gegee dat hulle voorkeur sal geniet, maar nou word van hulle verwag om met buitestanders mee te ding. Daar is glo ook aan sommige gesê dat hulle na ander ministeries oorgeplaas sal word as hulle nie die mas opkom nie.
Werknemers voer ook aan dat salarisstrukture nie met die betrokke vakbonde gedeel word nie.
“Daar is geen kommunikasie met die huidige werkers nie; dinge word net op ons afgedwing, ongeag hoe dit ons beïnvloed,” lui die klagskrif.
NamRA se uitvoerende hoof, mnr. Sam Shivute, het in 'n verklaring wat die afgelope naweek uitgereik is, gesê: “Ons is bewus van die moontlikheid dat die instelling van die agentskap dalk nie deur almal verwelkom sal word nie, veral nie deur diegene wat wil hê die huidige status quo – waar sommige steeds hul belastingverpligtinge ontduik – moet volgehou word nie.”
- [email protected]
Kommentaar
Republikein
Geen kommentaar is op hierdie artikel gelaat nie