Katutura kry Old Mutual-tak

Maria Eiseb



Katutura se nuwe Old Mutual-tak het verlede Vrydag by die Black Chain-inkopiesentrum geopen.

Die opening het 'n horde inwoners gelok.

Tydens die opening het mnr. Kosmas Egumbo, die groep se uitvoerende hoof, gesê Old Mutual is 'n suksesvolle maatskappy wat verskeie sosioëkonomiese inisiatiewe geïmplementeer het om die regering se visie van 'n getransformeerde en selfonderhoudende Namibië te ondersteun.

“Die Katutura-tak is dus te wyte aan ons toewyding daaraan om ons finansiële dienste en produkte nader aan ons bestaande en potensiële kliënte in die omgewing te bring,” het Egumbo gesê.

Mnr. Muesee Kazapua, Windhoek se burgemeester, het by die geleentheid gesê besighede wat in Katutura oopmaak, bring dienste en produkte na gewone mense toe.

“Local is lekker. As dit by die mense en vir die mense is, dan het julle die beste ding gedoen,” het hy gesê.

Kazapua het Egumbo belowe as hy kantore in die toekoms in die informele nedersettings wil oprig, die stad se deure vir hulle oop sal wees.

“As julle dienste na die mense wil bring, is ons verplig om jul versoek aan te hoor. Ons sal dit 'n prioriteit maak,” het hy belowe.

Volgens Egumbo sal die nuwe kantoor sowat 25 werknemers hê - onder meer kliëntediensbeamptes, verkoopsadviseurs en finansiële konsultante.

Me. Phillipine Somses, een van die finansiële adviseurs, het gesê sy sien uit na 'n goeie verhouding met die gemeenskapslede en die onderneming se nuwe en ou kliënte.

“Alles sal glad verloop, ons is hier vir die mense,” het sy gesê.

'n Anonieme gemeenskapslid het gesê kliëntediens is vinnig wanneer 'n nuwe polis uitgeneem word, maar daar word met uitbetalings gesloer.

“Voor mense polisse uitneem, moet die voordele en nadele daarvan duidelik uiteengesit word. Hulle moet nie net op die geld fokus wat hulle sal kry nie,” het sy gesê.

“Ons neem baie maklik polisse uit, want ons sien net die bedrag raak wat uitbetaal sal word. Ons kyk nie na die fyner besonderhede nie,” het sy gesê.

“Ek is nogal bly oor die nuwe kantoor wat na die mense gebring is. Nou hoef die oumense nie meer moeite te doen om dorp toe te gaan nie. Hulle sal sommer kan stap en hier gehelp word,” het sy bygevoeg.