Kinders gaan gebuk onder armoede

Augetto Graig – Sowat 43,3% van die Namibiese bevolking gaan onder multidimensionele armoede gebuk.
Meer as die helfte van Namibiese kinders (51,3%) word deur dié soort armoede benadeel en kry swaarder as volwassenes in die land.
Die Namibië Statistiekagentskap (NSA) het verlede week die Multidimensionele Armoede-indeks vrygestel wat inligting van die Namibiese Huishoudelike Inkomste en Bestedingsopname (NHIES) van 2015-’16 ontleed.
Multidimensionele armoede word hoofsaaklik gemeet aan die toegang tot onderwys, skoon drinkwater, sanitasie, behuising, vervoergeriewe, inligting en kommunikasietegnologie, elektrisiteit, toegang tot gesondheidsgeriewe, voedselsekerheid en ’n tekort aan kindervoeding.
’n Huisgesin met minder as 30% toegang tot enige van dié dienste word as multidimensioneel armoedig beskou.
Volgens die direkteur-generaal van die beplanningskommissie, mnr. Obeth Kandjoze, is die indeks ’n belangrike hulpbron om die rigting van nasionale ontwikkeling te bepaal. Hy sê Namibië maak ’n geruime tyd reeds staat op ’n geldgebaseerde maatstaaf om armoede te meet.
“Dit beteken ons het armoede bepaal deur te kyk na hoeveel iemand aan voedsel en basiese behoeftes bestee. Iemand wat meer as ’n bepaalde bedrag bestee het, is nie as armoedig geklassifiseer nie,” het hy verduidelik.
Gemeet aan dié maatstaf het Namibië ’n vermindering getoon in armoedige en erg armoedige inwoners van onderskeidelik 35,5% en 21% in 2004, na 17% en 10% in 2015-’16, sê Kandjoze.
“Armoede is egter meer ingewikkeld as dit en het verskeie fasette,” het hy benadruk. Die indeks toon dat ten spyte van Namibië se status as ’n middelinkomsteland met gemiddelde menslike ontwikkeling, armoede steeds baie wydverspreid voorkom.
Altesaam 43,3% van die bevolking is multidimensioneel armoedig, en 20,3% is kwesbaar tot multidimensioneel armoedig.
Sowat 41% van Namibiërs moet klaarkom sonder vervoer, 40,4% sonder sanitasie, 40% sonder elektrisiteit vir kosmaak en beligting, 30% sonder behuising en 24% ervaar voedseltekorte.
By dieselfde geleentheid het mnr. Seng Pang, die Verenigde Nasies (VN) se koördineerder in Namibië, gesê die indeks is ’n beduidende prestasie vir die Namibiese regering. Hy sê Covid-19-pandemie het egter vordering met die bekamping van armoede belemmer.
“Die gepaardgaande werk- en inkomsteverliese sal steeds druk uitoefen op sowel geldelike armoede as multidimensionele armoede, met die kwesbare gemeenskappe en hul kinders wat uitermatig geraak word,” waarsku hy.
Armoede onder Namibiese kinders word in die indeks as ’n reuse-probleem uitgelig.
Daarvolgens ly meer as die helfte, of sowat 51,3% van Namibiese kinders, onder multidimensionele armoede.
“Die kind wat in armoede gebore is, sal in armoede grootword en kinders kry wat ook in armoede sal grootword,” beskryf Pang die bose kringloop.
In vergelyking met volwassenes ly Namibiese kinders jonger as 17 meer in elke meetbare opsig.
Sowat 79,5% van Namibiërs jonger as 17 moet sonder vervoer klaarkom, 72,7% sonder sanitasie, 71,3% sonder elektrisiteit en 51,5% sonder behuising.
Terwyl sowat ’n kwart (25,3%) van inwoners in stedelike gebiede multidimensionele armoede beleef, staan die koers op 59,3% in landelike gebiede.
Meer vroue is armoedig in vergelyking met mans.
Gemarginaliseerde groepe kry swaarder met 93,4% van Khoisansprekers wat multidimensioneel behoeftig is, gevolg deur 67,8% van Rukavangosprekers en 54,2% van Namibiërs in die Zambezistreek.
Hierteenoor is 2,6% van Duitssprekende Namibiërs multidimensioneel arm, 3,3% van Engelssprekendes en 7,4% van Afrikaanssprekendes. Die indeks het gewys die grootste kwessie wat tot multidimensionele armoede in Namibië bydra, is die gebrek aan sanitasie.
Die Kunene, Kavango-Oos en -Wes-, Zambezi, Ohangwena en Omaheke is die armste streke in die land.
– [email protected]

FOTO’s ter illustrasie