Klagte sluit onder meer geldwassery en bedrog in

Jacqueline Louw Die borgtogaansoek van mnr. Laurentius Julius en twee Chinese burgers, mnre. Tao Huizhong en Huang Jinrong, in 'n saak wat betrekking het op etlike duisende invoertransaksies en buitelandse valuta-oorbetalings, is gister voor landdros Venatius Alweendo afgehandel.Die klagte teen Tao hou verband met beweerde transaksies van US$12.3 miljoen wat deur sy maatskappy Golden Phoenix ingedien is en waarvan na bewering net US$300 000 tot US$400 000 verklaar is – 'n verskil van minstens US$11.9 miljoen. Golden Star, die maatskappy waarby Huang na bewering betrokke is, word gekoppel aan transaksies ter waarde van US$2.4 miljoen waarvan slegs US$100 000 aan doeane verklaar is.Mnr. Sisa Namandje, wat namens Tao en Huang optree, het gister argumenteer dat sy kliënte onregmatig aangehou word omdat hulle nie oor die gronde vir hul inhegtenisname in 'n taal wat hul kan verstaan, ingelig is nie. Tao en Huang verstaan glo nie Engels nie. Namandje het ook aangevoer dat die staat se saak ondermyn word deurdat daar nie met enige getuienis in verband met geldwassery en bedrog gelei is nie. Hy het gesê die getuienis van die staat hou verband met die aktiwiteite van korporatiewe entiteite, terwyl sy kliënte in hul persoonlike kapasiteit aangekla is. Volgens hom kan die beskuldigdes nie vir die handelinge van hul onderskeie maatskappye aanspreeklik gehou word nie.Namandje het aan die hof uitgewys dat die staat nie skedules 1 en 2 waarna in artikels 49 en 51 van die doeane en aksynswet verwys word, ingedien het nie. Hy het argumenteer die staat se bewering dat sy kliënte die waarde van goedere onderverklaar het, is dus nie van toepassing nie. “Die staat skets die prentjie dat hierdie mense [die beskuldigdes] die oorsaak van die gebrek aan geld in die land is,” het Namandje in sy betoog gesê.Hy het die hof versoek dat Tao en Huang borgtog van onderskeidelik N$100 000 en N$50 000 betaal.Adv. Louis Botes, wat namens Julius optree, het aangevoer dat sy kliënt aansienlike bates en groot besighede in Namibië het en dus geen rede het om op vlug te slaan nie. Indien hy in aanhouding bly, sal sy besighede wat werk aan nagenoeg 130 mense verskaf, ten gronde gaan. Hy het die hof versoek dat Julius op borgtog van N$1.5 miljoen (wat tot N$2 miljoen verhoog kan word) vrygelaat word.Staatsaanklaer Rowan van Wyk, wat die borgtogaansoek van die drie beskuldigdes sterk teenstaan, het aangevoer dat die ondersoeke nog nie afgehandel is nie en daar 'n groot risiko is dat die beskuldigdes met getuies en dokumente sal inmeng. Tao en Huang het geen eiendom of familie in Namibië, behalwe hul onderskeie eggenote nie. Van Wyk het ook strydighede in dié twee se getuienis aan die hof uitgewys. In verband met Julius het hy betoog dat nagenoeg 1 600 buitelandse valuta-transaksies met sy maatskappy, Extreme Customs Clearing Services, verbind word. “Of daar inderdaad invoere was of slegs 'n skema van geldwassery, is deel van ons voortgesette ondersoek”, het hy die hof meegedeel en versoek dat borgtog vir al drie beskuldigdes geweier word. Alweendo sal sy uitspraak Maandag lewer.

Klagte sluit onder meer geldwassery en bedrog in

Kommentaar

Republikein 2025-04-09

Meld asseblief aan om kommentaar te lewer

Klagte sluit onder meer geldwassery en bedrog in

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie