Klubskuif vir Van Lill in Frankryk

Andrew Poolman Pieter-Jan van Lill is tans met sy Franse klub Aviron Bayonnais (ook bekend as Bayonne) in onderhandelinge gewikkel om die Namibiese voorspeler se skuif na 'n nuwe klub af te handel.Van Lill (36) word die afgelope dae in die Franse rugbymedia verbind met 'n skuif na Valence-Romans Drôme Rugby, wat tot nou in die tweede vlak van Frankryk se beroepsligas (Pro D2) meegeding het. In die pas afgelope seisoen het Valence-Romans egter aan die onderpunt van die 16 spanne geëindig (drie gewen uit 22 wedstryde) en sal dus in die nuwe seisoen na die derde vlak (Fédérale 1) gerelegeer word.Van Lill het verlede maand aan Republikein gesê hy wil nog een seisoen as beroepspeler in Frankryk speel voordat hy en sy gesin na Namibië terugkeer. Hy het gister onderneem om die koerant se vrae te beantwoord sodra al die formaliteite met sy genoemde nuwe klub afgehandel is.Die Namibiese veteraan agtsteman en slot speel reeds sedert 2015 by Bayonne, maar sy kontrak het ten einde geloop. Gedurende sy tyd by die ligbloues het die klub in beide Pro D2 meegeding én bevordering na die Top 14 verwerf, waar hulle die afgelope seisoen elfde uit 14 spanne klaargemaak het voordat die coronavirus alles voortydig tot stilstand gedwing het.In die Bayonne-trui het Van Lill altesame 90 wedstryde in die Pro D2-liga gespeel en 25 keer terwyl hulle in die Top 14 meegeding het. Hy was ook in vyf wedstryde van die klub se aanslag op die Europese Uitdaagbeker betrokke. Voor Bayonne het hy ook een seisoen elk vir Dax en Aurillac gespeel.Die gebore Keetmanshoper en gekwalifiseerde tandarts se ondervinding van topklas rugby behoort dus 'n aanwins te wees wanneer hy by sy nuwe Franse klub aansluit. Van Lill (117 kg, 1.93 meter) is 'n vaardige lynstaanspeler en bekend as 'n sterk baldraer wat aan enige span voorwaartse momentum kan verskaf.Valence-Romans het glo reeds sy planne vir die nuwe seisoen begin smee deur die aanwinste van Jody Jenneker (Suid-Afrikaanse haker van die Top 14-klub Castres), Akuila Tabualevu (Fidjiaanse senter van die Pro D2-klub Rouen), Dug Codjo (Franse vleuel van Oyonnax) en Segundo Tuculet (Argentynse sewesspeler en veelsydige agterspeler van Ealing Trailfinders in Engeland) te verseker.VYFTIG-KLUBHoewel Van Lill by verlede jaar se Wêreldbeker in Japan deur 'n beenbesering gepla was, het hy nietemin teen Italië en Nieu-Seeland sy toetsverskynings nommer 50 en 51 vir sy land gemaak.Op die nasionale rekordlys vir die meeste toetse is hy vierde, ná Eugene Jantjies (70), Chrysander Botha (55) en Tinus du Plessis (52), gevolg deur Darryl de la Harpe (50) en Johnny Redelinghuys (49).Hy was in elf toetse die Namibiese kaptein (sewe gewen, vier verloor) en het sewe drieë gedruk.In die proses het hy verlede jaar ook aangesluit by die uitsoekgroepie spelers wat in drie Wêreldbekertoernooie vir Namibië gespeel het. Dit kon inderdaad vier keer gewees het, indien 'n ontydige besering aan sy knieligamente en eksamenverpligtinge nie verhinder het dat hy vir die 2007 Frankryk-toernooi oorweeg kon word nie nadat hy die vorige jaar sy toetsdebuut teen Kenia in Nairobi gemaak het. Sy ouboet Jurgens, ook 'n agtsteman, het in elf toetse gespeel en was lid van die 2003 Wêreldbeker-span na Australië.

Klubskuif vir Van Lill in Frankryk

Kommentaar

Republikein 2025-04-16

Meld asseblief aan om kommentaar te lewer

Klubskuif vir Van Lill in Frankryk

Kommentaar

Republikein 2025-04-16

Meld asseblief aan om kommentaar te lewer

MELD AAN

Advertensie