Kom huis toe, Shaldon

Tanja Bause - Mnr. Shaldon Fergus Janzer het drie jaar gelede by sy oupa se huis in Khomasdal uitgestap en spoorloos verdwyn.

Sy ma, me. Valencia Nimrod, hoop steeds hy sal by die huis opdaag of haar bel.

“Shaldon, as Mammie iets verkeerd gedoen het, vergewe my asseblief. Kom net huis toe, alles sal regkom. Laat weet my net jy is oukei, asseblief, my kind, bel net,” sê sy.

Janzer was 27 toe hy op 5 Maart 2017 om 14:00 by die erf in Irisweg uitgestap het en nooit weer gesien is nie.

Volgens die polisie is hy laas in ’n wit trui met ’n kappie, blou denim en swart All Star-tekkies gesien.

“Ons het drie jaar lank in Kaapstad gebly en hy was daar op hoërskool. Hy het vriende daar, so miskien is hy in die Kaap,” sê Nimrod.

Sy is in verbinding met Pink Ladies in Suid-Afrika, ’n organisasie wat met die opsporing van vermiste kinders help.

“Ek is ook in kontak met die Suid-Afrikaanse polisie. Shaldon kan homself dalk in Mitchells Plain in die Kaap bevind.

“Hy het ’n werk gehad, maar het van die werk begin wegbly en ek het begin vermoed hy gebruik dwelms. Dit maak nie saak nie, want dit verander nie ’n moeder se liefde vir haar kind nie. Shaldon ken my nommer uit sy kop, hy moet net bel,” sê sy.

Nimrod doen ’n beroep op almal wat Shaldon geken het of mense wat intussen met hom in verbinding was om haar by 081 377 0982 of insp. Nambili by 081 124 8725 te kontak.

– [email protected]