Kom ons help die wat platsak is

|AWEBAHE JOHANNES ||HOESEB SKRYF:

Sommige winkels se winkelrakke bevat nie meer genoeg kruideniersware nie. Dit is as gevolg van paniek­inkopies ter voorbereiding van die afsonderingsperiode wat die nasie ingehok binnenshuis moet deurbring.

Een van die voorstelle wat na vore gebring is, was dat die regerings­amp­tenare wat eers op die einde van die maand besoldig word ook hul salarisse moes kry voordat die afbakening oftewel afsonderingsperiode van Erongostreek en Khomasstreek sou begin om hulle ook in staat te stel om kosvoorrade betyds aan te koop.

Hierdie voorstel het my gedagtegang teruggelei na die jaar 2008 toe ek as adjunk-direkteur van onderwys verbonde was aan die Kunenestreek, en 'n gesprek gevoer het met 'n kollega, oudmeester Dawid D. Herero, wat op die randjie van aftrede gehunker het. Ek het hom meegedeel ek wou nie graag daardie komende naweek in Khorixas deurbring nie: my geldsake was ietwat beroerd en ek het sommer afgesluit met: "Ek is eerlik gesproke eenvoudig net platsak, Meester!"

Hy haak toe af en sê: "Meester, jy is darem in 'n meer gunstige posisie as ek. Jy het geld gehad en het nou nie meer genoeg om jou wense te vervul nie. Ek het het van die begin af niks nie. Dus kan ek nie soos jy sê dat ek nou platsak is nie.

"Geld vertoef nie lank by iemand wat geen respek daarvoor betoon nie. Dit kuier ook glad nie weer by 'n mens wat dit nie ken nie.

"Diegene wat net sê 'ou my geld', ken nie geld nie en geld vermy sulke mense. Jy moet geld oppie naam noem, want elke muntstuk of papiernoot het 'n eienskap wat eie daaraan is.

"As jy geld opfrommel en sonder meer in jou vuil broeksak of stukkende beursie inboender sodat dit lateraan skeur, dan is dit die spreekwoordelike laaste sien van die blink kantien!"

Hierdie nare waarheid en ware naarheid oor geldloosheid of platsak wees het hierdie gediggie inspireer.



Platsak



Blote verbystap naby 'n bank

Laat my binne-in tuur vir lank



Hoop dat my sakke gevul word

My geestesdroom van vol word



Snaaks dat my broeksak heel is

Selfs my beursie nie stukkend is



Geld het maar verdwynvermoëns

My vermy sonder skuldgevoelens

Ek erken dat geld draaie kom gooi

Maak maar by my net tydelik kooi



Waarlik geld hou nie van morsjorse

Vertoef vir kortstonde by kerkmuise



Is dit my broeksak wat te vlak is?

Of my beursiebodem wat plat is?



Andere gee raad van geld spaar

Egter niks geld om te kan spaar



Platsak wees is 'n nare waarheid

Geldloosheid is 'n ware naarheid