Kommer oor voëlgriep in SA
Die uitbrekings van voëlgriep op verskeie plekke in Suid-Afrika bekommer die plaaslike bedryf.
Die toenemende voorkoms van voëlgriep in Suid Afrika het pluimvee- en eierprodusente in Namibië op 'n hoë vlak van waaksaamheid en streng bio-veiligheidsmaatreëls geld by die onderskeie bedrywe in die land.
“Die Pluimveeprodusentevereniging van Namibië monitor die situasie en is in gereelde kontak met die Namibiese direktoraat veeartsenydienste (DVS),” sê die Namibië Landbou-unie (NLU) in sy weeklikse nuusbrief.
DVS het intussen die maatreëls hersien waarvolgens pluimvee en pluimveeprodukte van SA na Namibië ingevoer kan word. Hierdie strenger maatreëls is verlede week geïmplementeer.
Die noodplan vir Namibië, sou 'n uitbreking van voëlgriep voorkom, is ook opgedateer. Aangesien voëlgriep nie slegs deur pluimvee en pluimveeprodukte versprei kan word nie, maar ook deur wilde voëls, is die implementering van uiterste streng bio-veiligheidsmaatreëls deur alle produsente kritiek belangrik, sê die NLU.
Intussen berig Netwerk24 die omvang van voëlgriep onder Suid-Afrikaanse hoenders is straks veel erger as wat reeds bekend is.
Me. Annette Steyn, DA-LP, het Sondag gesê sy is bewus van enkele hoenderboere wat hul hoenders uitslag en die vleis verkoop sodra hulle vermoed die H5N8-virus het op hul plaas uitgebreek “sodat hulle darem 'n inkomste maak”. Die vleis van siek hoenders is wel veilig vir menslike gebruik.
Voëlgriep is 'n aanmeldbare siekte, maar Steyn sê voordat die nasionale departement van landbou nie bekend maak of boere vergoed gaan word en hoe lank die kwarantyn duur nie, sal van die hoenderboere eerder die uitbreking van die siekte stil hou.
Boere het geen sekerheid oor of hulle vergoed gaan word indien hulle hul voëls van kant maak nie. Tot op hede het Senzeni Zokwana, minister van landbou, bosbou en visserye, gesê sy departement het nie geld nie, maar daar is geen aanduiding of die tesourie dalk geld van elders sal kan vind nie.
Boere weet ook nie hoe lank nadat die hoenders van kant gemaak word, hulle weer hoenders mag aanskaf nie omdat die departement geen riglyne daaroor uitgestuur het nie.
Die departement van landbou se veeartse beweeg nie van plaas tot plaas om toetse te doen nie, juis omdat hulle bang is hulle versprei die siekte só. Daarom maak hulle op hoenderplase staat om aan te meld wanneer die siekte uitgebreek het.
Steyn is uiters gefrustreerd omdat dit nie lyk asof die departement die nodige gebeurlikheidsplanne vir die siekte vooraf opgestel het nie, al was dit bykans moontlik om die pad wat die siekte van Europa af suidwaarts gevolg het, soos wat wilde voëls gemigreer het, op 'n landkaart te volg.
“Dit was dieselfde met die verspreiding van kommandowurms,” sê Steyn.
Dit is die heel eerste keer dat voëlgriep onder Suid-Afrikaanse hoenders uitbreek. Die siekte laat hoenders en eende vrek.
Netwerk24 het die afgelope week self vergeefs probeer om inligting uit die nasionale departement te kry. Die nuutste inligting van die departement af is 'n twee weke oue verklaring dat daar 24 bevestigde gevalle van voëlgriep landswyd is.
Steyn beskryf die hantering van voëlgriep as 'n “gemors”.
Volgens die DA is gevalle van H5N8 al in ses provinsies aangemeld. Volgens die DA se berekeninge werk 111 000 mense regstreeks of onregstreeks in die pluimveebedryf. Meer as 600 000 voëls is volgens die DA al van kant gemaak. - Eie berig en Netwerk24
“Die Pluimveeprodusentevereniging van Namibië monitor die situasie en is in gereelde kontak met die Namibiese direktoraat veeartsenydienste (DVS),” sê die Namibië Landbou-unie (NLU) in sy weeklikse nuusbrief.
DVS het intussen die maatreëls hersien waarvolgens pluimvee en pluimveeprodukte van SA na Namibië ingevoer kan word. Hierdie strenger maatreëls is verlede week geïmplementeer.
Die noodplan vir Namibië, sou 'n uitbreking van voëlgriep voorkom, is ook opgedateer. Aangesien voëlgriep nie slegs deur pluimvee en pluimveeprodukte versprei kan word nie, maar ook deur wilde voëls, is die implementering van uiterste streng bio-veiligheidsmaatreëls deur alle produsente kritiek belangrik, sê die NLU.
Intussen berig Netwerk24 die omvang van voëlgriep onder Suid-Afrikaanse hoenders is straks veel erger as wat reeds bekend is.
Me. Annette Steyn, DA-LP, het Sondag gesê sy is bewus van enkele hoenderboere wat hul hoenders uitslag en die vleis verkoop sodra hulle vermoed die H5N8-virus het op hul plaas uitgebreek “sodat hulle darem 'n inkomste maak”. Die vleis van siek hoenders is wel veilig vir menslike gebruik.
Voëlgriep is 'n aanmeldbare siekte, maar Steyn sê voordat die nasionale departement van landbou nie bekend maak of boere vergoed gaan word en hoe lank die kwarantyn duur nie, sal van die hoenderboere eerder die uitbreking van die siekte stil hou.
Boere het geen sekerheid oor of hulle vergoed gaan word indien hulle hul voëls van kant maak nie. Tot op hede het Senzeni Zokwana, minister van landbou, bosbou en visserye, gesê sy departement het nie geld nie, maar daar is geen aanduiding of die tesourie dalk geld van elders sal kan vind nie.
Boere weet ook nie hoe lank nadat die hoenders van kant gemaak word, hulle weer hoenders mag aanskaf nie omdat die departement geen riglyne daaroor uitgestuur het nie.
Die departement van landbou se veeartse beweeg nie van plaas tot plaas om toetse te doen nie, juis omdat hulle bang is hulle versprei die siekte só. Daarom maak hulle op hoenderplase staat om aan te meld wanneer die siekte uitgebreek het.
Steyn is uiters gefrustreerd omdat dit nie lyk asof die departement die nodige gebeurlikheidsplanne vir die siekte vooraf opgestel het nie, al was dit bykans moontlik om die pad wat die siekte van Europa af suidwaarts gevolg het, soos wat wilde voëls gemigreer het, op 'n landkaart te volg.
“Dit was dieselfde met die verspreiding van kommandowurms,” sê Steyn.
Dit is die heel eerste keer dat voëlgriep onder Suid-Afrikaanse hoenders uitbreek. Die siekte laat hoenders en eende vrek.
Netwerk24 het die afgelope week self vergeefs probeer om inligting uit die nasionale departement te kry. Die nuutste inligting van die departement af is 'n twee weke oue verklaring dat daar 24 bevestigde gevalle van voëlgriep landswyd is.
Steyn beskryf die hantering van voëlgriep as 'n “gemors”.
Volgens die DA is gevalle van H5N8 al in ses provinsies aangemeld. Volgens die DA se berekeninge werk 111 000 mense regstreeks of onregstreeks in die pluimveebedryf. Meer as 600 000 voëls is volgens die DA al van kant gemaak. - Eie berig en Netwerk24
Kommentaar
Republikein
Geen kommentaar is op hierdie artikel gelaat nie