Konsultante moet Psemas hervorm
Die ministerie van finansies sê verskaffers van gesondheidsdienste moet wag tot die hervorming van die staat se mediese fonds voltooi is.
Henriette Lamprecht
Die ministerie van finansies het besluit om ‘n holistiese benadering te volg tot die verskeie struikelblokke wat die staat se mediese fonds (Psemas) teister.
Deel van dié benadering is die aanstelling van ‘n konsortium van konsultante onder leiding van dr. Johan van Zyl. Die fokus sal onder meer weer val op die fonds se tariewe, voordele en struktuur van bydraes, sowel as die Psemas-kontrak met diensverskaffers wat reeds etlike jare sonder enige wysigings voortsloer.
In die lig hiervan sê die ministerie van finansies kan dit nie nou enige kommentaar lewer oor tariewe van die Vereniging vir Mediese Fondse in Namibië (Namaf) van 2014 wat sewe jaar later steeds deur diensverskaffers gebruik moet word nie. Die ministerie sê by monde van sy woordvoerder, mnr. Wilson Shikoto, die hervormingsproses moet eers voltooi word, voordat dit hieroor gaan kommentaar lewer. Die span konsultante sal na verwagting teen die einde van vanjaar hul verslag indien.
Shikoto verwys na lede van die Namibiese Tandheelkundige Vereniging (NDA) wat vroeër aangedui het dit is glad nie meer lonend vir lede om teen dié tariewe te werk nie en dat hulle moet “inbetaal” op konsultasies. In die lig hiervan het die NDA gesê dit gaan vanaf 1 November nie meer Psemas-lede behandel alvorens die tariewe nie verhoog word nie. Psemas-lede moet derhalwe eers vir hul konsultasies betaal en dan self by die fonds eis.
Shikoto verwys hierop na bepaling 10.6 van die standaardterme en -voorwaardes van die Psemas-kontrak waaraan dié diensverskaffers moet voldoen.
Hy het beklemtoon die ministerie neem die kwessies ernstig op wat deur die NDA geopper is en is gefokus om te verseker die hervorming van Psemas sal binne vasgestelde tydsraamwerke plaasvind.
“Ons moedig daarom diensverskaffers aan wat ‘n kontrak met Psemas het om lede teen die 2014-tariewe te behandel totdat die hervorming voltooi is,” het Shikoto gesê.
Hy het ook verwys na verskeie samesprekings wat die afgelope paar maande op verskillende platforms met die NDA gevoer is oor die verhoging van standaardtariewe. Die hervorming van Psemas het ten doel om die skema te herstruktureer vir interne kostebesparing. ‘n Alternatiewe model vir diensverskaffing sowel as die omstrede tariewe vorm deel van dié proses. – [email protected]
Die ministerie van finansies het besluit om ‘n holistiese benadering te volg tot die verskeie struikelblokke wat die staat se mediese fonds (Psemas) teister.
Deel van dié benadering is die aanstelling van ‘n konsortium van konsultante onder leiding van dr. Johan van Zyl. Die fokus sal onder meer weer val op die fonds se tariewe, voordele en struktuur van bydraes, sowel as die Psemas-kontrak met diensverskaffers wat reeds etlike jare sonder enige wysigings voortsloer.
In die lig hiervan sê die ministerie van finansies kan dit nie nou enige kommentaar lewer oor tariewe van die Vereniging vir Mediese Fondse in Namibië (Namaf) van 2014 wat sewe jaar later steeds deur diensverskaffers gebruik moet word nie. Die ministerie sê by monde van sy woordvoerder, mnr. Wilson Shikoto, die hervormingsproses moet eers voltooi word, voordat dit hieroor gaan kommentaar lewer. Die span konsultante sal na verwagting teen die einde van vanjaar hul verslag indien.
Shikoto verwys na lede van die Namibiese Tandheelkundige Vereniging (NDA) wat vroeër aangedui het dit is glad nie meer lonend vir lede om teen dié tariewe te werk nie en dat hulle moet “inbetaal” op konsultasies. In die lig hiervan het die NDA gesê dit gaan vanaf 1 November nie meer Psemas-lede behandel alvorens die tariewe nie verhoog word nie. Psemas-lede moet derhalwe eers vir hul konsultasies betaal en dan self by die fonds eis.
Shikoto verwys hierop na bepaling 10.6 van die standaardterme en -voorwaardes van die Psemas-kontrak waaraan dié diensverskaffers moet voldoen.
Hy het beklemtoon die ministerie neem die kwessies ernstig op wat deur die NDA geopper is en is gefokus om te verseker die hervorming van Psemas sal binne vasgestelde tydsraamwerke plaasvind.
“Ons moedig daarom diensverskaffers aan wat ‘n kontrak met Psemas het om lede teen die 2014-tariewe te behandel totdat die hervorming voltooi is,” het Shikoto gesê.
Hy het ook verwys na verskeie samesprekings wat die afgelope paar maande op verskillende platforms met die NDA gevoer is oor die verhoging van standaardtariewe. Die hervorming van Psemas het ten doel om die skema te herstruktureer vir interne kostebesparing. ‘n Alternatiewe model vir diensverskaffing sowel as die omstrede tariewe vorm deel van dié proses. – [email protected]
Kommentaar
Republikein
Geen kommentaar is op hierdie artikel gelaat nie