Krieket wys erns met ontwikkeling
Organiseerders het vertroue dat die Sesse-toernooi landswyd tot die identifisering van nuwe talent sal bydra.
Andrew Poolman
Spelers vanoor die ganse land is genooi vir Krieket Namibië en Africa Personnel Services (APS) se ses-aan-'n-kant skoletoernooi wat volgende maand begin.
Vyf afsonderlike ligas word vir seuns aangebied (onder 10, o.11, o.13, o.14 en o.16) en twee ligas vir meisiespanne (o.13 en o.19).
In elke uithoek van die land kan skole, klubs of selfs ouers spanne van ses versamel, wat mekaar eerste sal takel om elke dorp se kampioenspan te bepaal. Hierna vorder die kompetisie na streekvlak, van waar elk een verteenwoordiger tot die nasionale eindtoernooi sal deurdring.
Die formaat van die kompetisie is nie 'n uitklop nie, maar eerder rondomtalie, om in elke ronde elke span 'n meer regverdige kans te gee om hom as die beste te bewys.
Die eerste ronde wedstryde is vir 9 en 10 September geskeduleer, met die streke se uitspeelronde oor die volgende twee dae en die nasionale finaal op 18 en 19 September.
Krieket Namibië se uitvoerende hoof, mnr. Johan Muller, het by gister se bekendstelling gesê: “'n Volle wedstryd duur net een uur. Die veld is kleiner, daar is min veldwerkers en heelwat gapings vir kolwers om die grenstou te vind. Ons is baie opgewonde dat geografiese afstande, of klein skole teen groot skole, nie 'n beperkende faktor of 'n betroubare aanduider van sukses sal wees nie.”
Die hoofborg APS se besturende direkteur, mnr. Robert de Villiers, sê die maatskappy deel Krieket Namibië se droom om dié sport as 'n moontlike loopbaankeuse vir jong mense te bied. Beduidende vordering is reeds in dié opsig bereik, het hy ook uitgewys.
“Ons nasionale span, die Eagles, het verlede week opnuut die land op die wêreldkaart geplaas met hul verowering van die Internasionale Krieketraad se toekenning vir die beste prestasie deur 'n land met assosiaatstatus.
“Hierdie prestasies plaas egter ook die druk op Namibië om internasionaal meer mededingend te word. Dit beteken ons moet ons basis met groter spelersgetalle uitbrei. Ons is opgewonde dat die APS Sesse sal bydra om meer opwindende talent vir die land na vore te bring. APS is reeds betrokke om geleenthede op verskeie ouderdomsvlakke te skep.
“Almal van ons wat lief vir krieket is, kan 'n ambassadeur wees wat die land internasionaal bekend stel. Ek moedig jongelinge aan om krieket as 'n sport te leer ken. Dit is baie opwindend en dit help ontwikkel jou as 'n individu en 'n produktiewe landsburger.
“Een van die vele voordele is dat ernstige beserings meer onwaarskynlik as in verskeie ander kodes is.
“Krieket leer jou ook om ten spyte van teenstand terug te veg en bo uit te kom. Terwyl jy kolf, is dit nie net die elf opponente wat jou probeer uithaal nie; van jou spanmaats sit ook op die kantlyn in afwagting dat jy jou paaltjie verloor sodat hulle ook kolfkans kan kry,” het De Villiers geskerts.
By Krieket Namibië is me. Hestelle Haccou die kontakpersoon by wie belangstellende skole en spanne kan inskryf.
VETERANE
Krieket Namibië maak ook vordering met sy vestiging van 'n liga vir manspelers van 40 jaar en ouer.
Vier sulke uitnodigingspanne sal reeds komende naweek in twee vertoonwedstryde by WHS Old Boys se toernooi by die FNB Vegkop-stadion betrokke wees. By 'n geleentheid Vrydagaand sal meer besonderhede oor die veteraneliga bekend gemaak word, in die opbou na die amptelike afskop in November.
'n Namibiese uitnodigingspan het vroeër vanjaar vir die eerste keer aan die Wêreldbeker vir spelers van 50-plus in Kaapstad deelgeneem.
– [email protected]
Spelers vanoor die ganse land is genooi vir Krieket Namibië en Africa Personnel Services (APS) se ses-aan-'n-kant skoletoernooi wat volgende maand begin.
Vyf afsonderlike ligas word vir seuns aangebied (onder 10, o.11, o.13, o.14 en o.16) en twee ligas vir meisiespanne (o.13 en o.19).
In elke uithoek van die land kan skole, klubs of selfs ouers spanne van ses versamel, wat mekaar eerste sal takel om elke dorp se kampioenspan te bepaal. Hierna vorder die kompetisie na streekvlak, van waar elk een verteenwoordiger tot die nasionale eindtoernooi sal deurdring.
Die formaat van die kompetisie is nie 'n uitklop nie, maar eerder rondomtalie, om in elke ronde elke span 'n meer regverdige kans te gee om hom as die beste te bewys.
Die eerste ronde wedstryde is vir 9 en 10 September geskeduleer, met die streke se uitspeelronde oor die volgende twee dae en die nasionale finaal op 18 en 19 September.
Krieket Namibië se uitvoerende hoof, mnr. Johan Muller, het by gister se bekendstelling gesê: “'n Volle wedstryd duur net een uur. Die veld is kleiner, daar is min veldwerkers en heelwat gapings vir kolwers om die grenstou te vind. Ons is baie opgewonde dat geografiese afstande, of klein skole teen groot skole, nie 'n beperkende faktor of 'n betroubare aanduider van sukses sal wees nie.”
Die hoofborg APS se besturende direkteur, mnr. Robert de Villiers, sê die maatskappy deel Krieket Namibië se droom om dié sport as 'n moontlike loopbaankeuse vir jong mense te bied. Beduidende vordering is reeds in dié opsig bereik, het hy ook uitgewys.
“Ons nasionale span, die Eagles, het verlede week opnuut die land op die wêreldkaart geplaas met hul verowering van die Internasionale Krieketraad se toekenning vir die beste prestasie deur 'n land met assosiaatstatus.
“Hierdie prestasies plaas egter ook die druk op Namibië om internasionaal meer mededingend te word. Dit beteken ons moet ons basis met groter spelersgetalle uitbrei. Ons is opgewonde dat die APS Sesse sal bydra om meer opwindende talent vir die land na vore te bring. APS is reeds betrokke om geleenthede op verskeie ouderdomsvlakke te skep.
“Almal van ons wat lief vir krieket is, kan 'n ambassadeur wees wat die land internasionaal bekend stel. Ek moedig jongelinge aan om krieket as 'n sport te leer ken. Dit is baie opwindend en dit help ontwikkel jou as 'n individu en 'n produktiewe landsburger.
“Een van die vele voordele is dat ernstige beserings meer onwaarskynlik as in verskeie ander kodes is.
“Krieket leer jou ook om ten spyte van teenstand terug te veg en bo uit te kom. Terwyl jy kolf, is dit nie net die elf opponente wat jou probeer uithaal nie; van jou spanmaats sit ook op die kantlyn in afwagting dat jy jou paaltjie verloor sodat hulle ook kolfkans kan kry,” het De Villiers geskerts.
By Krieket Namibië is me. Hestelle Haccou die kontakpersoon by wie belangstellende skole en spanne kan inskryf.
VETERANE
Krieket Namibië maak ook vordering met sy vestiging van 'n liga vir manspelers van 40 jaar en ouer.
Vier sulke uitnodigingspanne sal reeds komende naweek in twee vertoonwedstryde by WHS Old Boys se toernooi by die FNB Vegkop-stadion betrokke wees. By 'n geleentheid Vrydagaand sal meer besonderhede oor die veteraneliga bekend gemaak word, in die opbou na die amptelike afskop in November.
'n Namibiese uitnodigingspan het vroeër vanjaar vir die eerste keer aan die Wêreldbeker vir spelers van 50-plus in Kaapstad deelgeneem.
– [email protected]
Kommentaar
Republikein
Geen kommentaar is op hierdie artikel gelaat nie